Bisalu Ya Bantumwa 17
17
Paulu yantika kulonga mu Tesalonika
1Bu bau imene kuluta mu Amfipoli ye Apolonia, bau kwizaka ku Tesalonika, kuna vandaka nzo ya sambilu ya baYuda. 1 Tes. 2:1
2Paul kotaka kwa bau, bonso vandaka kifu ya yandi, longaka bau mambu ya masonukwa bilumbu tatu ya kilumbu ya luvundu. Luk. 4:16; Bis. 13:14; 18:4
3Yandi tendulaka ye songaka Klisto fwiti kumona mpasi ye fulukiswa tuka bafwa, Yesu yai ya mono samuna kwa beno ikele Klisto. Luk. 24:26; Bis. 9:22; 26:23
4Bankaka ya bau kwikilaka ye kotaka sikamosi na Paulu ye Sila, ye kibuka nene ya baElene ya vuminaka Nzambi ye bankento mingi ya luzitu. Bis. 14:1; 28:24
5BaYuda fulukaka na kimpala, bau bakaka bantu ya bumolo nakati na bantu ya mpamba, bau kutakanaka bantu mingi ye salaka makelele mingi mu mbanza, bau kotaka mu nzo ya Yasoni, ye sosaka kubasisa bau kwa bantu.
6Bu bau monaka bau ve, bau bendaka Yasoni ye bampangi yankaka kwa banyadi ya mbanza, ye bokaka: Bantu yai ya imene kupindula nsi yamvimba, imene kwiza mpe awa. Bis. 16:20
7Yasoni imene kubaka bau, bayai yonso ikele kubuya bansiku ya Kaisali, bau tuba ntinu yankaka ikele, yandi Yesu. Luk. 23:2; Yoa. 19:12, 15
8Bau salaka bantu yonso ye banyadi ya mbanza vandaka na makasi, bu bau kuwaka mambu yai.
9Bu bau imene kubaka kibau ya Yasoni ye bankaka, bau bikaka bau kwenda.
Paulu ye Sila kwenda ku Belea
10Nswalu bampangi fidisaka Paulu ye Sila mu mpimpa ku Belea; bu bau kumaka kuna, bau kwenda ku nzo ya sambilu ya baYuda. Bis. 9:25
11Bantu yai lutaka mbote na bantu ya Tesalonika, sambu na bau bakaka mambu mu ntima ya yidikwa, ye bau sosaka mu masonukwa kilumbu na kilumbu kuzaba kana mambu yina ikele kieleka.
12Buna mingi ya bau kwikilaka, bankento mingi mpe ya baElene ya luzitu ye babakala mingi. Bis. 13:50
13Bu baYuda ya Tesalonika kuwaka na Paulu samunaka mambu ya Nzambi mu Belea mpe, bau kwizaka kuna mpe, ye telemisaka ntima ya bibuka kuvanda na makelele.
14Buna nswalu bampangi fidisaka Paulu kwenda ti mbu, kansi Sila ye Timoteo bikaka kuna.
15Bau ya filaka Paul twalaka yandi ti ku Atene, Paulu pesaka bau nsikudukusu kwa Sila ye Timoteo na bau takwiza kwa yandi nswalu, bau katukaka. 1 Tes. 3:1
Paulu longa mu Atene
16Bu Paulu vingilaka bau mu Atene, ntima ya yandi bakaka ntantu, bu yandi monaka mbanza ikele kufuluka na biteki.
17Yandi tubaka na baYuda ye bantu ya vuminaka Nzambi mu nzo ya sambilu, ye na bau ya kutanaka na yandi na zandu kilumbu na kilumbu.
18Bankaka ya bayindudi ya Epikuli ye ya Stoika tubaka ntembe na yandi, ye bankaka tubaka: Muntu yai ya bituba-tuba tatuba nki ? Kansi bankaka tubaka: Yandi ikele nsamuni ya banzambi ya nzenza, sambu na yandi samunaka nsamu mbote ya Yesu, ye mfulukulu.
19Bau simbaka yandi ye twalaka yandi ku mongo ya Aleopango, ye tubaka: Beto lenda kuzaba malongi yampa yai ikele nki, ya nge ikele kutuba ? Mal. 1:27
20Kadi nge ikele kutwala mambu ya nzenza ku makutu ya beto. Mpilayai beto zola kuzaba kana mambu yai ikele nki. Bis. 2:12
21Kadi bantu ya Atene yonso ye banzenza ya vandaka kuna, sadilaka ntangu ya bau mu mambu yankaka ve, kansi kaka kusonga keti kuwa nsangu yampa.
22Paulu telemaka nakati mongo ya Aleopango ye tubaka: Beno bantu ya Atene, mono mona mu mambu yonso beno ikele kusambila banzambi mingi,
23kadi bu mono lutaka, mono monaka bima ya beno ikele kusambila, mono monaka zikwa ya ikele na sonama yai: KWA NZAMBI YA KONDA ZABAKANA. Yandi ya beno sambila, mu konda ngangu, mono ikele kusamuna yandi kwa beno.
24Nzambi ya salaka nsi ye bima yonso ya ikele mu yo, yandi ikele Mfumu ya zulu ye ya ntoto, yandi ikele kuvanda ve mu tempelo ya tungwa na maboko. 1 Mose 1:1; Yes. 66:1; Yoa. 4:24; Bis. 7:48; 14:15
25Ye maboko ya bantu lenda kusadila yandi ve, bonso yandi ikele na nsatu ya kima, sambu na yandi kibeni ikele kupesa kwa yonso moyo ye mwela ye bima yonso. Nk. 50:8; 1 Mose 2:7
26Yandi salaka makanda yonso ya bantu katuka na tata mosi, sambu na kuvanda na ntoto yonso, yandi songaka nsungi ya zengwa, ye kitezo ya ntoto ya bau tavanda. 1 Mose 1:27; 5 Mose 32:8
27Na bau tasosa Nzambi, kana bau lenda kwiza mfinama na yandi ye mona yandi, kansi yandi ikele ntama ve na beto muntu na muntu. Yes. 55:6; Lom. 1:19
28Kadi mu yandi beto ikele na moyo, ye tambula, ye vanda; bonso bansoniki yankaka ya beno ya bankunga tubaka: Kadi beto ikele bana ya yandi.
29Mpilayai, bu beto ikele bana ya Nzambi, beto fwiti kubanza ve na Nzambi ikele mpilamosi wola keti palata keti matadi, ya ikele kusalwa na ngangu ye mayele ya muntu. Nk. 115:4; Yes. 46:5
30Sambu na yai, Nzambi vibidila ntangu yina ya kondwa ngangu, kansi ntangu yai, yandi sikidikisa bantu yonso mu sika yonso na bau fwiti kupindula mabanza. Bis. 14:16
31Sambu na yandi imene kutula kilumbu ya yandi tafundisa bantu ya nsi mu lunungu, mu muntu yina ya yandi solaka, sambu na yai; yandi silaka vuvu kwa bantu yonso, na yandi fulukisaka yandi tuka bafwa. Nk. 9:8; Bis. 10:42
32Bu bau kuwaka mambu ya mfulukulu ya bafwa, bankaka sekaka, kansi bankaka tubaka: Beto takuwa nge na mambu yai ntangu nkaka.
33Buna Paulu katukaka nakati na bau.
34Kansi babakala yankaka bundanaka na yandi ye kwikilaka, mu bau vandaka mpe Dionisio muntu ya Aleopango, ye nkento mosi nkumbu ya yandi Damali, ye bankaka sikamosi na bau.
Currently Selected:
Bisalu Ya Bantumwa 17: NTK50
Highlight
Share
Copy
Want to have your highlights saved across all your devices? Sign up or sign in
Nouveau Testament en Kikwango © BAliiance Biblique de la RD Congo, 1950.
