Bisalu Ya Bantumwa 22
22
Paulu tuba kitemo kwa bantu mingi
1Bampangi ye batata, kuwa mambu ya mono ditubila kwa beno.
2Bu bau kuwa na yandi ikele kutuba kwa bau mu ndinga ya kiEbele, bau vandaka napi mingi. Yandi tubaka:
3Mono ikele muYuda ya butukaka mu Talaso mu Kilikia, kansi mono kulaka mu mbanza yai na makulu ya Ngamalieli, mono longwaka bonso bifu mu nsiku ya batata ya beto, mono vandaka kikesa kwa Nzambi bonso beno ikele kilumbu yai. Bis. 5:34; 8:3; 26:9; Lom. 10:2; 2 Kol. 11:22; Ngal. 1:14
4Mono zomaka ti lufwa bau ya landaka nzila yai, mono kangaka ye yekulaka, babakala ye bankento mu boloko. Bis. 8:3; 26:9
5Nganga nene ye bambuta yonso ikele bantemo ya mono, bau mpe pesaka mono nkanda kwa bampangi mu Damasko, mono kwendaka kutwala bau ya ikele kuna ya kangwa ku Yelusalemi, sambu na monisa bau mpasi. Bis. 9:1
6Yo vandaka mpilayai, bu mono ikele kwenda ye mfinama ku Damasko ntangu ya midi, nswalu mwini ya ngolo katukaka na zulu ye kienzulaka ndambu yonso na mono. Bis. 9:3; 26:12; 1 Kol. 16:8
7Mono kubwaka va ntoto ye kuwaka ndinga tuba kwa mono: Sauli, Sauli, sambu na nki nge zoma mono ?
8Mono vutulaka: Mfumu, nge ikele nani ? Yandi tubaka kwa mono: Mono ikele Yesu ya Nazaleti, ya nge zoma.
9Bau ya vandaka na mono, monaka mwini, kansi kuwaka ve ndinga ya tubaka kwa mono.
10Mono tubaka: Mfumu, mono tasala nki ? Mfumu tubaka kwa mono: Telema, kwenda ku Damasko, kuna nge tasongwa mambu yonso ya nge fwiti kusala.
11Bu mono lendaka ve mona sambu na nkembo ya mwini yina, bau ya vandaka na mono, simbaka mono na diboko, mpilayai mono kumaka ku Damasko.
12Anania, muntu ya vumina Nzambi, bonso ikele mu nsiku, ya vandaka na kitemo ya mbote ya baYuda yonso ya vandaka kuna. Bis. 9:10
13Yandi kwizaka kwa mono, ye telemaka mfinama na mono, ye tubaka kwa mono: Mpangi Sauli, mona diaka. Mu ntangu yina meso ya mono kangulaka ye mono talaka yandi.
14Buna yandi tubaka: Nzambi ya batata ya beto imene kusola nge kuzaba luzolo ya yandi, ye kumona Nkwa Lunungu, ye kuwa ndinga na munoko ya yandi.
15Kadi nge tavanda ntemo ya yandi kwa bantu yonso, na mambu yai ya nge monaka ye kuwaka.
16Ntangu yai, sambu na nki nge vingila ? Telema, kubotikwa ye kusukulwa masumu ya nge, ye bombidila nkumbu ya Mfumu.
17Yo vandaka, bu mono vutukaka ku Yelusalemi, bu mono lombaka mu tempelo, mono natwaka mu mpeve. Bis. 9:26
18Mono monaka Mfumu tuba kwa mono: Sala ntinu, katuka nswalu na Yelusalemi kadi bau takwikila ve kitemo ya nge sambu na mono.
19Mono tubaka: Mfumu, bau kibeni zaba mono tulaka mu boloko ye bulaka bau ya kwikilaka nge mu banzo ya sambilu yonso,
20ye bu bau losaka menga ya ntemo ya nge Stefano, mono vandaka kuna mpe, mono ndimaka na yo ye kengaka lele ya bau ya kufwaka yandi. Bis. 7:57
21Yandi tubaka kwa mono: Kwenda, sambu na mono tafidisa nge ntama kwa bapaien. Bis. 9:15; 13:2; 26:17; Ngal. 1:15; 2:8; Ef. 3:8
Paulu muntu ya Loma
22Bau ndimaka ti na mambu yai. Buna bau bokaka ye tubaka: Katula muntu mutindu yai na ntoto! Kadi yo lunga ve yandi vanda na moyo. Bis. 21:36; 25:24
23Bu bau bokaka ye katulaka lele ya bau ye losaka mfumfuta ku zulu,
24Kommandant sikidikisaka bau kunata yandi ku nzo ya basoldat, ye songaka ye yuvula yandi na fimbu, na yandi lenda kuzaba sambu na nki bau bokaka mpilayai sambu na yandi.
25Bu bau imene kukanga yandi sambu na kubula yandi fimbe, Paulu tubaka kwa nkuluntu ya telemaka kuna: Nsiku pesa nzila kubula muntu ya Loma fimbu ya imene kufunduswa ve ?
26Bu nkuluntu kuwaka yo, yandi kwendaka kwa kommandant ye songaka yandi ye tubaka: Nge ikele kusala nki ? Sambu na muntu yai ikele mwisi Loma.
27Kommandant kwendaka ye tubaka kwa yandi: Tuba kwa mono, nge ikele mwisi Loma ? Yandi tubaka: E.
28Kommandant vutulaka: Mono sumbaka kimwisi Loma na mbongo mingi. Paulu tubaka: Kansi mono butukaka mwisi Loma.
29Buna bau ya zolaka kuyuvula yandi, katukaka na yandi nswalu, ye kommandant titaka mpe, bu yandi zabaka yandi imene kukanga mwisi Loma.
30Kilumbu ya landa, Kommandant zolaka kuzaba kieleka, sambu na nki baYuda imene kufunda yandi, yandi kangulaka yandi, ye sikidikisaka bambuta banganga ye bamfundisi yonsi takutakana; buna yandi twalaka Paulu ye tulaka yandi nantwala na bau.
Currently Selected:
Bisalu Ya Bantumwa 22: NTK50
Highlight
Share
Copy
Want to have your highlights saved across all your devices? Sign up or sign in
Nouveau Testament en Kikwango © BAliiance Biblique de la RD Congo, 1950.
