Bisalu Ya Bantumwa 26
26
Paulu songa mambu ya yandi kwa Angalipa
1Angalipa tubaka kwa Paulu: Nge peswa nzila kuditubila. Buna Paulu lambulaka diboko ya yandi, ye kuditubila:
2Mono ikele na kiese, ntinu Angalipa, na mono lenda kuditubila nantwala na nge bubu, sambu na mambu yai yonso ya mono fundwa na baYuda,
3kadi nge ikele kuzaba ya luta mbote bifu yonso ye biuvu ya baYuda; sambu na yai mono lomba nge kuwa mono mu mvibudulu.
4Mambu ya moyo ya mono tuka kinleke mu kikanda ya mono ye mu Yelusalemi, baYuda yonso zaba yo.
5Bau zabaka mono tuka ntete, kana bau zola kusonga kitemo, mono vandaka mufalisi ya landaka sambilu ya beto ya Nzambi ya luta sungama. Bis. 22:3; 23:6; Fili. 3:5
6Kansi ntangu yai mono ikele kutelema awa kufundiswa sambu na vuvu ya nsilulu ya Nzambi silaka kwa batata ya beto. Bis. 13:32; 28:20
7Ye makanda ya beto kumi ye zole sadila Nzambi mu mpimpa ye ntangu, sambu na bau ikele na vuvu kubaka nsilulu yina. O ntinu, sambu na vuvu yai, baYuda imene kufunda mono. Bis. 24:15
8Sambu na nki beno lenda kukwikila ve, kana Nzambi ikele kufulukisa bafwa ?
9Mono kibeni banzaka mpe mono fwiti kusala mambu mingi ya mbi kwa nkumbu ya Yesu ya Nazaleti. Bis. 8:3; 9:1; 22:4
10Mono salaka mpilayai mpe mu Yelusalemi, mono tulaka banlongo mingi mu boloko, bu mono bakaka ngolo ya bambuta banganga, ye bau kufwaka bau, mono ndimaka na yo.
11Mono zomaka bau mbala mingi mu banzo ya sambilu yonso, mono salaka bau kutuba mbi, sambu na mono vandaka makasi mingi na bau, mono zomaka bau ti bambanza nzenza.
12Bu mono kwendaka ku Damasko, na ngolo ye peswa nzila ya bambuta banganga,
13buna, O ntinu, bu mono vandaka na nzila, na midi mono monaka mwini ya katukaka na zulu, yo luta ntangu ngolo ye kienzula ndambu yonso na mono ye bau ya tambulaka na mono. Bis. 9:3; 22:6
14Bu beto yonso kubwaka va ntoto, mono kuwaka ndinga tuba kwa mono mu kiEbeleo: Sauli, Sauli, sambu na nki nge zoma mono ? Yo ikele mpasi na nge kubula dikulu ya nge va nti ya nsongi.
15Mono tubaka: Mfumu, nge ikele nani ? Mfumu tubaka: Mono ikele Yesu, ya nge zoma.
16Kansi nanguka kutelema na makulu ya nge, kadi mono monikaka kwa nge sambu na mambu yai, kutula nge sielo ye ntemo ya mambu ya nge monaka ye ya tamonika kwa nge. Yeh. 2:1
17Mono tavulusa nge na maboko ya bantu yai ye ya bapaien, kwa bau ya mono ikele kufidisa nge,
18kukangula meso ya bau, na bau lenda kupindula tuka tombe ku mwini, ye tuka ngolo ya Satana kwa Nzambi, na bau lenda kubaka vidiswa ya masumu ye difwa sikamosi na bau ya ikele ngolo sambu na lukwikilu mu mono. Yes. 35:5; 60:1; Bis. 20:32; Ef. 1:18; 2:2; Kolo. 1:13
19Sambu na yai, O ntinu Angalipa, mono buyaka ve mona-meso ya katuka na zulu, Ngal. 1:16
20kansi mono samunaka ntete kwa bau mu Damasko ye mu Yelusalemi ye nsi yamvimba ya Yuda, ye kwa bapaien, na bau fwiti kupindula mabanza ye vutuka kwa Nzambi, ye sala bisalu ya lunga mpindulu ya mabanza. Mat. 4:17; Bis. 9:20, 28
21Sambu na yai baYuda simbaka mono mu tempelo ye sosaka kufwa mono. Bis. 21:27
22Sambu na mono imene kubaka lusadusu ya katuka na Nzambi, mono ikele kutelema ti bubu, kusonga kitemo kwa bafioti ye banene, mono tuba kima yankaka ve kansi kaka yina ya bambikudi ye Mose tubaka takwiza. Bis. 24:14
23Na Klisto fwiti kumona mpasi, ye yandi ikele yantete ya mfulukulu ya bafwa, yandi samunaka mwini kwa bantu yai ye kwa bapaien. Luk. 24:26; 1 Kol. 15:20; Kolo. 1:18; Nzai. 1:5
24Bu yandi ikele kutuba mambu ya yandi mpilayai, Festo tubaka na ndinga ya ngolo: Paulu, nge imene kulauka, ngangu mingi ya nge imene kulaukisa nge.
25Kansi Paulu tubaka: Mono lauka ve, Festo ya nene, kansi mono ikele kutuba mambu ya kieleka ye ya ngangu.
26Kadi ntinu zaba mambu yai, ye mono ikele kutuba kwa yandi mu kieleka, kadi mono zaba kieleka mambu yai swekwa kwa yandi ve, kadi mambu yai salwaka mu fuma ve. Yoa. 18:20
27Ntinu Angalipa, nge kwikila bambikudi ? Mono zaba nge kwikila bau.
28Kansi Angalipa tubaka kwa Paulu: Bika fioti nge zola kukwikidisa mono kituka nkwa Klisto.
29Kansi Paulu tubaka: Mono zola kwa Nzambi, mu fioti keti mu mingi, nge kaka ve, kansi bau yonso ya kuwa mono bubu, tavanda bonso mono, kansi na tuvambu yai ve.
30Ntinu ye nyadi ya Benike ye bau ya vandaka na bau telemaka. Bis. 23:9, 29; 25:25
31Bu bau katukaka, bau tubanaka, kutuba: Muntu yai imene kusala mambu ve ya lunga lufwa keti tuvambu.
32Angalipa tubaka kwa Festo: Muntu yai lenda kukangulwa kana yandi imene kuyuvula kwa Kaisali ve. Bis. 25:11; 28:19
Currently Selected:
Bisalu Ya Bantumwa 26: NTK50
Highlight
Share
Copy
Want to have your highlights saved across all your devices? Sign up or sign in
Nouveau Testament en Kikwango © BAliiance Biblique de la RD Congo, 1950.
