Bisalu Ya Bantumwa 28
28
Paulu kumaka ku Melita
1Bu beto imene kuvuluswa, beto zabaka na sanga yina bingwaka Melita. Bis. 27:26, 39
2Bantu ya sanga yina songaka beto nkenda mingi, bau kwikaka tiya, ye bakaka beto yonso, sambu na mvula nokaka ye sambu na madidi. 2 Kol. 11:27
3Bu Paulu bakaka nkuni ye tulaka yau va tiya, nioka basikaka sambu na tiya ye simbaka va diboko ya yandi.
4Bu bantu ya nsi yina monaka nioka ya mbi va diboko ya yandi, bau tubanaka: Kieleka muntu yai ikele mufwi, kadi yandi vuluswaka na masa, kansi mfundusu tonda kubikaka yandi vanda na moyo ve. 5 Mose 32:24; Yobi 20:16; Luk. 13:2
5Kansi yandi losaka yo mu tiya ye monaka mpasi ta fioti ve. Luk. 10:19
6Kansi bau vingilaka yandi kuvimba keti kubwa na lufwa nswalu. Kansi bu bau vingilaka ntama mingi ye monaka mambu kwiza kwa yandi ve, buna bau pindulaka, ye tubaka na yandi ikele nzambi.
Paulu belula tata ya Pubilu
7Mfinama na sika yina vandaka ntoto ya mfumu ya sanga yina, nkumbu ya yandi Pubilu, yandi bakaka beto na luzolo ye sadilaka beto mu nzo ya yandi bilumbu tatu.
8Yo vandaka mpilayai, tata ya Pubilu lalaka na maladi ya fievre ye divumu kulata. Paulu kotaka kwa yandi ye lombaka ye tulaka yandi maboko ye belulaka yandi.
9Bu yai salwaka, bankaka mpe ya vandaka kubela mu sanga yina kwizaka ye belukaka,
10bau zitisaka beto mingi, bu beto katuka kuna, bau tulaka va masua bima yonso beto ikele na yau nsatu.
Paulu kuma ku Loma
11Nanima na ngonda tatu, beto katukaka kuna na masua ya Alesandia, ya vandaka na sanga mu nsungi ya madidi, yo vandaka na kidimbu Dioskuli.
12Beto semaka na Silakusa ye vandaka kuna bilumbu tatu.
13Tuka kuna beto zungaka ye kumaka ku Lengio, ye kilumbu ya landa mupepe ya sude telemaka ye kilumbu ya zole beto kwizaka ku Puteoli.
14Kuna beto monaka bampangi, bau yuvulaka beto kuvanda na bau bilumbu nsambwadi, nanima beto kumaka ku Loma.
15Bu bampangi kuwaka sambu na beto, bau kwizaka kutana na beto ti ku zandu ya Apio, ye basika Tatu ya kuvanda. Bu Paulu, monaka bau, yandi pesaka matondo kwa Nzambi ye bakaka kikesa.
Paulu longa baYuda
16Bu beto kotaka mu Loma, Paulu peswa nzila kuvanda na nzo ya yandi kibeni na soldat ya kukenga yandi. Bis. 24:23; 27:3
17Nanima na bilumbu tatu yandi kutikisaka bakuluntu ya baYuda. Bu bau kutakanaka, yandi tubaka kwa bau: Bampangi, mono imene kusala mambu ya mbi ve kwa bantu keti kwa bifu ya batata ya beto, kansi mu Yelusalemi bau pesaka mono ya kangwa na maboko ya baLoma. Bis. 23:1; 24:12; 25:8
18Bu bau yuvulaka mambu ya mono, bau zolaka kukangula mono, sambu na mambu ya lunga lufwa vandaka mu mono ve.
19Kansi bu baYuda buyaka yo, mono kwikidiswaka kuyuvula kwenda kwa Kaisali, mono vandaka na mambu ve kufunda kikanda ya mono. Bis. 25:11
20Sambu na yai mono bingaka beno kutala mono ye kutuba na mono, sambu na vuvu ya Isaeli ya mono ikele kukangwa na minyololo yai. Bis. 23:6; 24:21; 26:6; Ef. 6:20
21Bau tubaka kwa yandi: Beto bakaka nkanda tuka Yuda ve sambu na nge, mpe bampangi kwizaka awa ve kusonga keti kutuba mambu ya mbi sambu na nge.
22Kansi beto zola kuwa nge bonso nge banza, kadi beto zaba mu sika yonso bau ikele kutuba mbi sambu na balandi ya mvengumunu yai. Luk. 2:34; Bis. 24:5, 14
23Bau tulaka kilumbu ye bantu mingi kwizaka kwa yandi mu nzo ya yandi, yandi longaka mambu yina, ye songaka kitemo ya kimfumu ya Nzambi, yandi kwikidisaka bau sambu na Yesu ya ikele mu nsiku ya Mose ye mu bambikudi, tuka na suka ti nkokila.
24Bankaka kwikilaka mambu ya yandi tubaka, kansi bankaka kwikilaka ve.
25Bu bau lendaka kukanga ntima ya bau sikamosi ve, bau katukaka nanima na Paulu imene kutuba mambu mosi: Mpeve Yanlongo tubaka kieleka mu mbikudi Yesaya kwa batata ya beto,
26ye tubaka: Kwenda kwa bantu yai, ye tuba: Mu kuwa beno takuwa, kansi beno tazaba ve; mu tala beno tatala, kansi beno tamona ve.
27Kadi ntima ya bantu yai imene kwiza ngolo, makutu ya bau lenda kuwa ve; ye bau imene kukanga meso ya bau, kana bau tamona na meso ya bau ye kuwa na makutu ya bau ye zaba mu ntima ya bau, ye pindula mabanza, ye mono lenda kubelula bau.
28Sambu na yai, bika beno zaba, mpulusu yai ya Nzambi fidiswa kwa bapaien, bau takuwa yo mpe. Luk. 24:47; Bis. 13:46; 18:6; Nk. 98:2
29Bu yandi imene kutuba mambu yai, baYuda kwendaka ye tulanaka ntembe mingi.
Paulu mu Loma mvu zole
30Yandi vandaka mvu zole yamvimba mu nzo ya yandi kibeni futaka, yandi bakaka bau yonso ya kotaka kwa yandi.
31Yandi samunaka kimfumu ya Nzambi, ye longaka mambu sambu na Mfumu Yesu Klisto mu kikesa yonso, ye muntu mosi buyaka yandi ve.
Currently Selected:
Bisalu Ya Bantumwa 28: NTK50
Highlight
Share
Copy
Want to have your highlights saved across all your devices? Sign up or sign in
Nouveau Testament en Kikwango © BAliiance Biblique de la RD Congo, 1950.
