Yoane 5
5
Bambevo mu Beteseda
1Landa mambu yai, fete ya baYuda vandaka, ye Yesu tombokaka ku Yelusalemi.
2Mu Yelusalemi na mwelo ya mameme, zinga ikele kubingwa mu kiEbele Beteseda. Muna vandaka mavula ya kaba ndambu tanu.
3Mu yau lalaka kibuka ya bambevo ye bampofo ye ya batembidi ye ya tanda, bau vingila vundula ya masa.
4Wanjo ya Mfumu vandaka na kifu ya kota mu zinga ye vundula masa, konsomuntu kota ntete bu masa vundulwa, yandi beluka na konso maladi ya vandaka na yandi.
5Kuna vandaka muntu mosi, ya vandaka na maladi mvu makumi tatu ye nana.
6Bu Yesu monaka yandi kulala, yandi zaba yandi imene kubela ntangu mingi, yandi tubaka kwa yandi: Nge zola kubeluka ?
7Mbevo vutulaka kwa yandi: Mfumu, mono ikele na muntu ve bu masa vundulwa, kutula mono mu zinga, kansi bu mono ikele kwiza yankaka imene kukulumuka nantwala na mono.
8Yesu tubaka kwa yandi: Telema, baka mbeto ya nge, tambula. Mat. 9:6
9Nswalu, muntu yina belukaka yandi bakaka mbeto ya yandi, ye tambulaka. Ye kilumbu yina vandaka kilumbu ya luvundu. Yoa. 9:14
BaYuda zola kufwa Yesu
10Mpilayai baYuda tubaka kwa yandi ya belukaka: Yai ikele kilumbu ya luvundu, nsiku pesa nzila ve sambu na nge kunata mbeto. 2 Mose 20:10; Yel. 17:21; Mat. 12:2
11Yandi vutulaka kwa bau: Yandi ya belulaka mono tubaka kwa mono: Baka mbeto ya nge tambula.
12Bau yuvulaka yandi: Nani muntu yina tubaka kwa nge: Baka mbeto ya nge, tambula ?
13Kansi yandi ya belukaka, zabaka ve kana nani, kadi Yesu dikatulaka, sambu na kibuka mingi vandaka mu sika yina.
14Nanima, Yesu monaka yandi mu tempelo ye tubaka kwa yandi: Tala, nge imene kubeluka sala masumu diaka ve, kana mambu ya luta ya ntete takubwila nge. Yoa. 8:11
15Buna muntu yina kwendaka ye tubaka kwa baYuda yandi ikele Yesu ya belulaka mono.
16Sambu na mambu yai, baYuda zomaka Yesu, sambu na yandi salaka mambu yai na kilumbu ya luvundu.
17Kansi yandi vutulaka kwa bau: Tata ya mono sala ti ntangu yai; mono mpe sala.
Yesu ye Tata bau ikele mosi
18Sambu na mambu yai, baYuda luta kusosa kufwa yandi, sambu na yandi kufwaka nsiku ya lumbu ya luvundu, ye yandi mpe bingaka Nzambi, Tata ya yandi, yandi ikele dikitula mpilamosi Nzambi.
19Buna Yesu vutulaka ye tubaka kwa bau: Kieleka, kieleka, mono tuba kwa beno: Mwana lenda ve kusala mambu yandi mosi, kansi yina ya yandi monaka Tata kusala; kadi mambu yonso ya yandi salaka, yina Mwana mpe sala mutindu mosi. Yoa. 8:38
20Kadi Tata zola Mwana ya yandi ye ikele kusonga yandi mambu yonso ya yandi kibeni sala, ye yandi tasonga yandi mpe, bisalu ya luta yina, na beno tayituka. Yoa. 3:35
21Kadi bonso Tata fulukisaka bafwa ye pesaka bau moyo, buna Mwana ikele kupesa moyo kwa konso ya yandi zola.
22Kadi Tata kibeni ikele kufundisa muntu ve, kansi yandi imene kupesa mfundusu yonso kwa Mwana, Mat. 11:27; 28:18; Yoa. 17:2
23Na bantu yonso tazitisa Mwana, bonso bau zitisa Tata. Konsomuntu ya zitisa Mwana ve, ikele kuzitisa Tata ve, ya fidisaka yandi.
24Kieleka, kieleka, mono tuba kwa beno: Konsomuntu ikele kuwa ndinga ya mono, ye kwikila yandi ya fidisaka mono, ikele na moyo mvu ya mvu, ye kuma mu mfundusu ve, kansi yandi imene kukatuka na lufwa, ye kwiza ku moyo. Luk. 23:43; Yoa. 3:18; 6:40, 47; Ef. 2:6
25Kieleka, kieleka, mono tuba kwa beno: Lokula ikele kwiza, yo ikele tangu yai, bu bafwa takuwa ndinga ya Mwana ya Nzambi, ye bau ya kuwa tavanda na moyo. Lom. 6:4; Ngal. 2:20; Ef. 2:1, 5; 5:15
26Kadi bonso Tata ikele na moyo mu yandi kibeni, mpilayai yandi pesaka kwa Mwana kuvanda na moyo mu yandi kibeni mpe.
27Yandi pesaka yandi ngolo kuzenga mfundusu, sambu na yandi ikele Mwana ya muntu.
28Yituka ve, sambu na mambu yai, kadi lokula takwiza na bau yonso ya ikele na bandiamu takuwa ndinga ya yandi, Dan. 12:2; 1 Kol. 15:52; 1 Tes. 4:16
29bau tabasika, ya salaka mbote ku mfulukulu ya moyo; ya salaka mbi, takwiza ku mfulukulu ya mfundusu. Mat. 25:46
30Mono lenda kusala kima mosi ve, mu mono kibeni; bonso mono kuwa, mono fundisa, ye mfundusu ya mono ikele ya lunungu, sambu na mono sosa luzolo ya mono mosi ve, kansi luzolo ya yandi ya fidisaka mono. Yoa. 6:38
31Kana mono tuba kitemo sambu na mono kibeni, kitemo ya mono ikele kieleka ve.
32Yankaka ikele kutuba kitemo sambu na mono; mono zaba, kitemo yai ya yandi ikele kutuba sambu na mono ikele kieleka. Yes. 42:1; Mat. 17:5; Yoa. 8:14, 18
33Beno fidisaka kwa Yoane ye yandi tubaka kitemo kieleka. Yoa. 1:19
34Kansi kitemo ya mono baka ikele ya muntu ve, kansi mono tuba mambu yai, na beno lenda kuvuluswa.
35Yandi vandaka mwinda ya lema ye kienzula: ye beno zolaka ntangu fioti kuyangalala mu mwini ya yandi.
36Kansi kitemo ya mono ikele, na yo luta yina ya Yoane, kadi bisalu ya Tata pesaka mono kumanisa yau, bisalu yai ya mono sala, kutuba kitemo sambu na mono, na Tata imene kufidisa mono. Yoa. 10:25; 14:11
37Ye Tata ya fidisaka mono, yandi tubaka kitemo sambuna mono, beno imene kuwa ndinga ya yandi ta ntangu mosi ve, keti mona nitu ya yandi. Mat. 3:17; 17:5; Yoa. 6:27; 12:28; 2 Pet. 1:17; 2 Mose 33:20; 5 Mose 4:12; 1 Tim. 6:16; 1 Yoa. 4:12
38Ye mambu ya yandi ikele kuvanda mu beno ve, kadi yandi ya yandi fidisaka, beno kwikilaka yandi ve.
39Sosa mu masonukwa, sambu na beno banza, mu yau beno ikele na moyo mvu ya mvu, yai ikele yau ya tuba kitemo sambu na mono. Luk. 16:29; Bis. 17:11; Yes. 8:20; 34:16; 5 Mose 18:15; Yel. 23:5; Dan. 9:24; Yoa. 1:45
40Ye beno zola kwiza kwa mono ve, na beno lenda kuvanda na moyo.
41Mono ikele kubaka nkembo tuka bantu ve.
42Kansi mono zaba beno, na beno ikele na zola ya Nzambi ve mu beno.
43Mono kwizaka mu nkumbu ya Tata ya mono, kansi beno baka mono ve; kana yankaka takwiza mu nkumbu ya yandi mosi, beno tabaka yandi.
44Mpila nki beno lenda kukwikila, bu beno sosana nkembo, kansi beno sosa ve nkembo ya katuka na Nzambi kibeni kaka ?
45Banza ve na mono tafundisa beno kwa Tata. Mosi ikele tafundisa beno, ikele Mose, mu yandi beno ikele kutula vuvu.
46Kadi kana beno kwikila Mose, beno lenda kukwikila mono mpe, kadi yandi sonikaka sambu na mono. 1 Mose 3:15; 22:18; 49:10; 5 Mose 18:15, 18
47Kansi kana beno kwikila ve masonukwa ya yandi, buna mpila nki beno takwikila bandinga ya mono ?
Currently Selected:
Yoane 5: NTK50
Highlight
Share
Copy
Want to have your highlights saved across all your devices? Sign up or sign in
Nouveau Testament en Kikwango © BAliiance Biblique de la RD Congo, 1950.
