Luka 20

Yesu longa mu tempelo

1Yo vandaka mu kilumbu mosi, bu yandi longaka bantu mu tempelo ye samunaka nsamu mbote, bambuta banganga, ye bansoniki ye bambuta ya bantu kwizaka kwa yandi. Mat. 21:23; Mal. 11:27

2Bau tubaka kwa yandi, kutuba: Tuba kwa beto, mu ngolo nki nge ikele kusala mambu yai ? Keti nani imene kupesa nge ngolo yai ? Bis. 4:7; 7:27

3Yandi vutulaka, kutuba kwa bau: Mono mpe tayuvula beno mambu mosi, beno tuba yo kwa mono.

4Mbotika ya Yoane, yo katukaka na zulu keti na bantu ?

5Bau yuvulanaka, kutuba: Kana beto tuba tuka zulu, yandi tavutula: Sambu na nki beno kwikilaka yandi ve ?

6Kansi kana beto tuba: Tuka bantu, buna bantu yonso takufwa beto na matadi; sambu na bau imene kukwikila, Yoane ikele mbikudi.

7Bau vutulaka, bau zaba ve sika yo katuka.

8Yesu tubaka kwa bau: Buna mono mpe tuba kwa beno ve, mu ngolo nki mono ikele kusala mambu ya mpilayai.

Kingana ya dilanga ya vinia

9Yandi yantikaka kutuba kingana yai kwa bantu: Muntu kunaka dilanga ya vinia, yandi bikaka yo kwa basadi, yandi kwendaka ku ntoto yankaka ntangu mingi. Mat. 21:33; Mal. 12:1; Yel. 2:21; Nk. 80:8-11; Yes. 5:1; Yel. 2:31

10Mu nsungi ya lunga, yandi fidisaka mpika ya yandi kwa basadi, na bau tapesa yandi mabundu ya dilanga ya vinia, kansi basadi bulaka yandi mingi, bau sindikaka yandi maboko mpamba.

11Yandi fidisaka mpika yankaka diaka, kansi bau bulaka yandi mpe, ye sadilaka yandi mambu ya nsoni, ye sindikaka yandi na maboko mpamba mpe.

12Yandi fidisaka ya tatu diaka, bau lwadisaka yandi bamputa mpe, ye basisaka yandi.

13Kansi mfumu ya dilanga yai ya vinia, tubaka: Mono tasala nki ? Mono tafidisa mwana bakala ya mono yazolwa, kana bau tavumina yandi.

14Bu basadi monaka yandi, bau yuvulanaka, kutuba, yai ikele mvingidi ya difwa; bika beto kufwa yandi buna difwa tavanda ya beto.

15Buna bau basisaka yandi nanganda ya dilanga ya vinia, ye kufwaka yandi. Buna mfumu ya dilanga ya vinia tasala nki kwa bau ?

16Yandi takwiza ye kufwa basadi yai ye pesa dilanga yai ya vinia kwa basadi yankaka. Bu bau kuwaka mambu yai bau tubaka: Yo vanda ve mpilayai.

17Yandi talaka bau ye tubaka: Buna yai ya sonama ikele nki ? Ditadi ya bantungi buyaka, solwaka ditadi ya ntu ya fuma. Nk. 118:22; Yes. 8:14; 28:16; Bis. 4:11; Lom. 9:33; 1 Pet. 2:7

18Konso muntu ya kubwa va ditadi yai, yandi tabukunwa, kansi va konsonani yo kubwila, yo tamwangisa yandi mpilamosi mfumfuta. Dan. 2:24; Zak. 12:7

19Bansoniki ye bambuta banganga sosaka kutula yandi maboko mu lokula yina, kansi bau titaka bantu, kadi bau zabaka, yandi tubaka kingana yai sambu na bau.

Bafalisi yunsa Yesu sambu na mpaku

20Bau langidilaka yandi, ye fidisaka banlangididi kukusa mpilamosi bau ikele balunungu, na bau lenda kubaka ndinga ya yandi kuyekula yandi kwa nkuluntu ye kwa ngolo ya nyadi. Mat. 22:15; Mal. 12:13

21Bau yuvulaka yandi, kutuba: Nlongi, beto zaba, nge ikele kutuba ye kulonga ya sungama, ye nge ikele kutala luse ya bantu ve, kansi nge ikele kulonga nzila ya Nzambi mu kieleka.

22Nsiku pesa nzila kupesa mpaku kwa Kaisali keti ve ?

23Yandi zabaka mayele ya bau, ye tubaka kwa bau:

24Beno songa mono mbongo denali mosi. Kifwanusu ya nani ye bisono ya nani ikele kuna ? Bau tubaka: Ya Kaisali.

25Yandi tubaka kwa bau: Buna beno futa kwa Kaisali bima ya Kaisali ye kwa Nzambi bima ya Nzambi. Lom. 13:7

26Bau lendaka ve kusimba yandi na ndinga yai nantwala ya bantu; ye bau yitukaka sambu na mvutulu ya yandi, ye vandaka napi.

Yesu tuba kwa basaduki sambu na mfulukulu ye bafwa

27Buna basaduki yankaka kwizaka kwa yandi, bau ya tuba; Mfulukulu ikele ve, bau yuvulaka yandi, kutuba: Mat. 22:23; Mal. 12:18

28Nlongi, Mose sonikaka kwa beto: Kana muntu ikele na mpangi, ye yandi kufwa, ye bika nkento, kansi konda mwana, mpangi ya yandi tabaka nkento yina, ye telemisa nkuna kwa mpangi ya yandi.

29Vandaka bampangi nsambwadi; ya ntete kwelaka nkento, yandi kufwaka ye konda mwana.

30Ye ya zole mpilamosi konda mwana.

31Ye ya tatu bakaka yandi, mpilayai nsambwadi yonso bikaka mwana ve ye kufwaka.

32Nanima nkento mpe kufwaka.

33Mu mfulukulu, yandi tavanda nkento ya nani ? Kadi nsambwadi kwelaka yandi.

34Yesu tubaka kwa bau: Bana ya nsi yai ikele kukwela, ye kwediswa.

35Kansi bantu ya banzwaka ya lunga kukuma na bantangu yina, ye mu mfulukulu ya bafwa, bau ikele kukwela ve, ye kukwediswa ve;

36bau lenda ve kufwa diaka, bau ikele mpilamosi banjo; bau ikele bana ya Nzambi, ye ikele bana ya mfulukulu.

37Kansi bafwa ikele kufulukiswa, Mose zabisaka beto na sika na nti fioti. Bu yandi bingaka Mfumu, Nzambi ya Abalahami, ye Nzambi ya Isaki ye Nzambi ya Yakobi. Bis. 7:32; Eb. 11:16

38Yandi ikele ve Nzambi ya bafwa, kansi ya bau ya moyo, kadi bau yonso ikele na moyo mu yandi.

39Bansoniki yankaka vutulaka, kutuba: Nlongi, nge imene kutuba mbote.

40Bau vandaka ve na kikesa kuyuvula yandi mambu diaka.

Yesu yuvula sambu na Mesia

41Yandi tubaka kwa bau: Mpila nki bau ikele kutuba: Klisto ikele mwana ya Davidi ? Mat. 22:41; Mal. 12:35

42Davidi kibeni ikele kutuba mu nkanda ya bankunga: Mfumu tubaka kwa Mfumu ya mono: Vanda na diboko kibakala ya mono. Nk. 110:1; Bis. 2:34; Eb. 1:13; 10:12

43Ti bu mono kitula bambeni ya nge, mfiduku ya makulu ya nge. 1 Kol. 15:25

44Davidi bingaka yandi Mfumu, mpila nki yandi ikele mwana ya yandi ?

Yesu luengisa banlonguki sambu na bafalisi

45Bu bantu yonso ikele kuwa, yandi tubaka kwa banlonguki ya yandi:

46Beno dikeba sambu na bansoniki, bau ikele kuzola kutambula na tuzaku nda, bau zola kupeswa mbote na sika ya mazandu, bau zola kiti ya ntete mu banzo ya sambilu, ye sika ya ntete mu bafete; Luk. 11:43

47bau ikele kumina banzo ya bafwola, ye bau lomba ntama mingi sambu na kusweka mbi ya bau. Bayai tabaka mbedoso ya luta ngolo.

Currently Selected:

Luka 20: NTK50

Highlight

Copy