Luka 22
22
Yuda Iskalioti yekula Yesu
1Fete ya mampa ya konda kufuniswa ya bau ikele kubinga Pake vandaka mfinama. 2 Mose 12:15; Mat. 26:1; Mal. 14:1
2Bambuta banganga ye bansoniki sosaka, mpila nki bau lenda kufwa yandi kadi bau tita bantu.
3Buna Satana kotaka mu Yuda, ya bingwa Iskalioti, mosi ya bau kumi ye zole. Mat. 26:14; Mal. 14:10; Yoa. 13:27
4Yandi kwendaka kusolula na bambuta banganga ye bankuluntu ye baminkengi, mpila nki yandi lenda kuyekula yandi kwa bau.
5Bau yangalala, bau tulaka ndinga na bau sikamosi, sambu na kupesa yandi mbongo.
6Yandi ndimaka bau, ye sosaka ntangu ya lunga kuyekula yandi kwa bau, bu kibuka ikele ve.
Yesu ikele kudia Pake
7Kilumbu ya mampa ya konda kufunuswa kwizaka, yina ya bau ikele kufwa dimeme ya Pake. Mat. 26:17; Mal. 14:12
8Yesu fidisaka Petelo ye Yoane kutuba: Beno kwenda kuyidikila beto Pake beto lenda kudia yo.
9Bau tubaka kwa yandi: Wapi ndambu nge zola, beto kwenda kuyidikila yo ?
10Yandi tubaka kwa bau: Tala, bu beno kota mu mbanza, muntu takutana na beno ya ikele kunata dibungu ya masa; landa yandi, kota mu nzo ya yandi ikele kukota.
11Beno tuba kwa mfumu ya nzo: Nlongi ikele kutuba kwa nge: Wapi nzo ya banzenza ya mono fwiti kudia Pake na banlonguki ya mono ?
12Yandi tasonga beno sika nene ya zulu ya nzo ya imene kuyidikwa, kuna yidika yo.
13Bau kwendaka ye monaka bonso yandi tubaka kwa bau, bau yidika Pake.
Kintwadi ya meza ya Mfumu
14Bu lokula longaka, yandi vanda na meza na bamtumwa ya yandi. Mat. 26:30; Mal. 14:17
15Yandi tubaka kwa bau: Mu lutondo mingi mono tonda kudia Pake yai na beno, ntete mono imene kumoniswa ve mpasi;
16kadi mono tuba kwa beno; Mono takudia yo diaka ve, ti bu mambu lunga mu kimfumu ya Nzambi.
17Yandi bakaka kopo. Bu yandi pesaka matondo, yandi tubaka: Beno baka yai, ye kabana yo;
18kadi mono tuba kwa beno: Tuka ntangu yai mono takunwa diaka ve yina ya ikele kubasika mu mabundu ya nti ya vinia, ti na kimfumu ya Nzambi takwiza.
19Yandi bakaka dimba. Bu yandi pesaka matondo, yandi bukunaka yo, ye pesaka kwa bau, kutuba: Yai ikele nitu ya mono ya imene kupeswa sambu na beno. Beno sala yai mu bambukilu ya mono. Mat. 26:26; Mal. 14:22, 27; 1 Kol. 11:23
20Mpilayai kopo mpe, bu bau 22:9-31 imene kudia, yandi tubaka: Kopo yai ikele ya luwawanu yampa mu menga ya mono, ya tiamuka sambu na beno.
21Kansi tala, diboko ya yandi ya tayekula mono ikele na mono awa na meza. Nk. 41:9; Yoa. 12:21
22Kansi kieleka Mwana ya muntu ikele kwenda bonso yo solwaka, kansi ndola kwa muntu yina ya yekula yandi.
23Bau yantikaka kuyuvulana: buna nani ya bau tasala mambu yai ?
Banlonguki tulana ntembe
24Bau vandaka na ntembe mpe nakati na bau, kana nani nakati na bau taluta nene. Mat. 20:24; Mal. 10:41
25Kansi yandi tubaka kwa bau: Bantinu ya bapaien ikele kuyala bau, bau ikele ngolo va bau ya ikele kubingwa basadi ya nkenda.
26Beno ikele ve mpilayai; kansi yandi ya ikele nene nakati na beno; bika yandi vanda bonso nleke, ye yandi ya ikele mfumu vanda bonso sielo. Luk. 9:48
27Kadi nani luta nene, yandi ya vanda na meza, keti yandi ya sadila ? Ikele yandi ve ya vanda na meza ? Kansi mono ikele nakati na beno bonso yandi ya sadila. Mat. 20:28; Yoa. 13:14; Fili. 2:7
28Kansi beno ikele bau ya vandaka na mono mu mpukumunu ya mono.
29Mono tapesa beno kimfumu bonso Tata pesaka mono, Luk. 12:32
30buna beno lenda kudia ye kunwa na meza ya mono mu kimfumu ya mono; ye beno tavanda va bakiti ya nkembo ye fundisa makanda ya Isaeli kumi ye zole. Nzai. 3:21
Yesu tuba sambu na kubuya ya Petelo
31Yesu tubaka: Simoni, Simoni, tala Satana lombaka nge na yandi lenda kuveva nge bonso nkeni; Yobi 1:7; Mat. 26:34; Mal. 14:30; Yoa. 13:36; 1 Pet. 5:8
32Kansi mono lombilaka nge, na lukwikilu ya nge kumana ve. Bu nge pindula, siamisa bampangi ya nge.
33Yandi tubaka kwa yandi: Mfumu, mono lunga kwenda na nge ku boloko ye ku lufwa.
34Yandi tubaka: Petelo, kansi mono tuba kwa nge: Kilumbu yai nsusu tadila ve, ti nge tabuya mono mbala tatu, na nge zaba mono ve.
Yesu songa banlonguki ya yandi mpasi ya ikele kwiza
35Yandi tubaka kwa bau: Bu mono fidisaka beno na konda ngoto ya mbongo, ye makuba, ye nsampatu, buna beno kondaka kima ? Bau tubaka: Kima ve.
36Yandi tubaka kwa bau: Kansi ntangu yai yandi ya ikele na ngoto ya mbongo, bika yandi baka yo, mpilayai makuba mpe, kansi yandi ya ikele na mbele ya mvita ve, bika yandi teka kinkutu ya yandi, ye sumba yo.
37Kadi mono tuba kwa beno, na masonukwa yai fwiti kumaniswa mu mono: Yandi tangwaka nakati na bankwa kimpumbulu. Kadi mambu ya sonamaka sambu na mono imene kumaniswa.
38Bau tubaka: Mfumu, tala, awa ikele mbele zole ya mvita. Yandi tubaka kwa bau: Yo lunga.
Yesu lomba mu Ngetesemane
39Yandi basikaka, ye kwendaka, bonso vandaka kifu ya yandi, ku mongo ya Olive, ye banlonguki landaka yandi mpe. Mat. 26:30, 36; Mal. 14:26, 32; Yoa. 18:1
40Bu yandi kumaka na sika yina, yandi tubaka kwa bau: Beno lomba, na beno kota ve mu mpukumuni.
41Yandi kibeni katukaka na bau ndambu ya lenda kuma ditadi ya loswa, yandi fukamaka na makungunu, ye lombaka, kutuba:
42Tata, kana nge zola, katudila mono kopo yai, kansi luzolo ya mono ve, bika luzolo ya nge salwa.
43Ye kuna monikaka kwa yandi wanjo ya Mfumu.
44Yandi vandaka na mpasi ya luta mingi mu ntima, yandi luta kulomba ngolo, kifuta ya yandi vandaka mpilamosi matela ya menga kubwa va ntoto. Yoa. 12:27; Eb. 5:7
45Bu yandi telemaka na lombilu ya yandi, yandi kwizaka kwa banlonguki, yandi kutaka bau kulala tulu sambu na ntantu,
46yandi tubaka kwa bau: Sambu na nki beno lala ? Telema ye lomba, na beno kota ve mu mpukumuni.
Bau simba Yesu
47Bu yandi vandaka kutuba, tala, kibuka kwizaka sikamosi, na yandi ya bingwa Yuda, mosi ya bau kumi ye zole, yandi kwendaka nantwala na bau, ye kwizaka mfinama kwa Yesu kufiba yandi. Mat. 26:47; Mal. 14:43; Yoa. 18:3
48Kansi Yesu tubaka kwa yandi: Yuda, nge yekula Mwana ya muntu na mfibulu ?
49Bu bau ya zunga yandi monaka mambu ya ikele kubwa, bau tubaka: Mfumu, beto bula bau mbele ?
50Mosi ya bau bulaka sielo ya nganga nene, yandi zengaka dikutu kibakala ya yandi.
51Kansi Yesu vutulaka ye tubaka: Bika bau. Yandi valakana dikutu ya yandi ye belulaka yandi.
52Yesu tubaka kwa bambuta banganga ye bankuluntu ya minkengi ya tempelo, ye bambuta ya bantu kwiza ya kwa yandi: Beno ikele ya kubasika bambele ye bankawa bonso kusimba ntani.
53Kilumbu na kilumbu mono vandaka na beno mu tempelo, beno lambulaka maboko va mono ve, kansi yai ikele lokula ya beno, ya ngolo ya tombe.
Bau nata yandi kwa nganga nene
54Bau simbaka yandi, ye nataka yandi ye kotisaka yandi mu nzo ya nganga nene, kansi Petelo landaka ntama nanima. Mat. 26:57, 69; Mal. 14:53, 66; Yoa. 18:12, 23
55Bu bau kwika tiya nakati ya kianzala, ye bau imene kuvanda sikamosi, buna Petelo vandaka nakati na bau.
56Kansi sielo nkento monaka yandi, bu yandi vandaka na mwini ya tiya, yandi talaka yandi ti, ye tubaka: Muntu yai mpe vandaka na yandi.
57Kansi yandi buyaka, kutuba: Nkento, mono zaba yandi ve.
58Na ntangu fioti yankaka monaka yandi, ye tubaka: Nge mpe ikele mosi ya bau. Kansi Petelo tubaka: Muntu, mono ikele ve ya bau.
59Nanima na lokula mosi diaka, yankaka kutuba mutindu mosi: Kieleka, muntu yai vandaka na yandi mpe, kadi yandi ikele mwisi Ngalili.
60Petelo tubaka: Muntu, mono zaba ve ya nge ikele kutuba: Nswalu, bu yandi tubaka, nsusu dilaka.
61Mfumu pindukaka, ye talaka Petelo. Ye Petelo bambukaka mambu ya Mfumu mpila nki yandi tubaka kwa yandi: Kilumbu yai ntete nsusu imene kudila ve, nge tabuya mono mbala tatu.
62Yandi basikaka nanganda, ye dilaka ngolo.
63Babakala ya simbaka Yesu bau sekaka yandi, ye bulaka yandi; Yes. 50:6; Mat. 26:67; Mal. 14:65
64ye bau fukilaka yandi lele va meso, ye yuvulaka yandi, kutuba: Bikula! Nani yai ya imene kubula nge ?
65Bau tubaka mambu mingi yankaka sambu na yandi ye tubaka mbi sambu na yandi.
Yesu fundiswa
66Bu kuma kia, bambuta ya bantu ye bambuta banganga ye bansoniki kutakana sikamosi, ye bau twalaka yandi kwa bafundisi ya bau, kutuba: Kana nge ikele Klisto, tuba kwa beto ? Mat. 26:59; Mal. 14:55
67Kansi yandi tubaka kwa bau: Kana mono tuba kwa beno, beno takwikila ve;
68kansi kana mono yuvula beno ndinga, beno tavutula yo ve.
69Tuka ntangu yai Mwana ya muntu tavanda na diboko kibakala ya ngolo ya Nzambi. Nk. 110:1
70Bau yonso tubaka: Buna nge ikele Mwana ya Nzambi ? Yandi tubaka kwa bau: Beno tuba, mono ikele yandi.
71Bau tubaka: Nki kitemo yankaka ya beto ikele kusosa ? Kadi beto kibeni imene kuwa yo na munoko ya yandi.
Currently Selected:
Luka 22: NTK50
Highlight
Share
Copy
Want to have your highlights saved across all your devices? Sign up or sign in
Nouveau Testament en Kikwango © BAliiance Biblique de la RD Congo, 1950.
