Luka 4
4
Yesu pukumunwa na diable
1Yesu fulukaka na Mpeve Yanlongo, yandi kutakaka na Yodani, ye twalwaka na Mpeve mu nsi ya mpamba. Mat. 4:1; Mal. 1:12
2Mu bilumbu makumi iya, yandi pukumunwaka na diable. Yandi kudiaka kima ve mu bilumbu yina, ye bu ya imene, yandi kuwaka nzala. 2 Mose 34:28; 1 Nt. 19:8
3Ye diable tubaka kwa yandi: Kana nge ikele Mwana ya Nzambi, tuba kwa ditadi yai, na yo kituka dimpa.
4Yesu vutulaka kwa yandi: Yo imene kusonama: Muntu ikele kuvanda na moyo sambu na mampa kaka ve. 5 Mose 8:3
5Diable tombokisaka yandi, ye songaka yandi bimfumu yonso ya nsi, mu ntangu fioti.
6Diable tubaka kwa yandi: Ngolo yai yonso ye nkembo ya yau, mono tapesa kwa nge, kadi yau imene kupeswa kwa mono, ye kwa konsonani ya mono zola, mono lenda kupesa yau.
7Mpilayai kana nge sambila nantwala na mono, yina yonso tavanda ya nge.
8Ye Yesu vutulaka ye tubaka kwa yandi; Yo imene kusonama: Nge fwiti kusambila Mfumu Nzambi ya nge, ye nge fwiti kusadila yandi kaka. 5 Mose 6:13; 19:20
9Yandi twalaka yandi ku Yelusalemi, ye tulaka yandi va nludi ya tempelo, ye tubaka kwa yandi: Kana nge ikele Mwana ya Nzambi, dilosa tuka awa ti nsi;
10kadi yo imene kusonama: Yandi tafidisa nge banjo ya yandi kukeba nge mbote.
11Ye bau tanata nge va maboko ya bau, na nge tabula dikulu va ditadi ve. Nk. 91:11
12Yesu vutulaka kutuba kwa yandi: Yo tubwa: Pukumuna Mfumu Nzambi ya nge ve. 5 Mose 6:16
13Bu diable manisaka mpukumunu yonso, yandi bikaka yandi ti ntangu ya lunga.
Yesu vutuka ku Ngalili
14Yesu vutukaka mu ngolo ya Mpeve ku Ngalili; nsangu ya yandi kwendaka mu nsi yina yonso ya zunga. Yoa. 4:43; Bis. 10:37; Mat. 4:12; Mal. 1:14
15Yandi longaka mu nzo ya bau ya sambilu, yandi kembiswa kwa bau yonso.
Yesu mu nzo ya sambilu mu Nazaleti
16Yandi kwiza ku Nazaleti sika ya yandi kulaka. Yandi kotaka mu nzo ya sambilu, bonso vandaka kifu ya yandi, mu kilumbu ya luvundu, yandi telemaka kutanga.
17Yandi peswaka nkanda ya mbikudi Yesaya, ye bu yandi imene kukangula nkanda, yandi monaka sika ya sonama:
18Mpeve ya Mfumu ikele va mono, kadi yandi imene kusita mono, kusamuna nsamu mbote kwa bansukami, yandi imene kufidisa mono kusamuna mpulusu kwa bampika; ye kumona kwa bampofo, ye kupesa nzila kwa bau ya lwadiswa,
19ye samuna mvu ya Mfumu, ya lunga kubaka.
20Yandi kangaka nkanda, ye vutulaka yo kwa sielo, ye vandaka; meso ya bantu yonso mu nzo ya sambilu talaka yandi.
21Yandi yantikaka kutuba kwa bau: Kilumbu yai, masonukwa yai imene kumaniswa mu makutu ya beno.
22Bau yonso tubaka kitemo sambu na yandi, bau yitukaka sambu na mambu ya nlemvo ya basikaka na munoko ya yandi, bau tubaka: Yandi yai ikele mwana ya Yosefi ve ? Mal. 6:2; Luk. 2:47; Yoa. 6:42; 7:46
23Yandi tubaka kwa bau: Kieleka, beno lenda kutuba kingana yai kwa mono: Munganga dibelula. Mambu yonso ya beto kuwaka, ya nge salaka mu Kapenaumi, sala yau awa mu ntoto ya nge mpe.
24Ye yandi tubaka: Kieleka, mono tuba kwa beno: Mbikudi ikele kubakwa ve mu ntoto ya yandi.
25Kansi mono tuba kwa beno mu kieleka: Bafwola mingi vandaka mu Isaeli mu bilumbu ya Elia, bu zulu kangamaka mvu tatu ye ngonda sambanu; bu malema vandaka mingi mu nsi yonso. 1 Nt. 17:1
26Kansi kwa mosi ve ya bau, Elia fidiswaka, kansi kwa fwola ya vandaka mu Salefeti, mu Sidoni.
27Mu Isaeli vandaka bankwa bwazi mingi mu bilumbu ya Elisa, mbikudi, kansi mosi ya bau belulwaka ve, kansi Namani, muntu ya Silia. 2 Nt. 5:8
28Bu bau yonso mu nzo ya sambilu kuwaka mambu yai, bau fulukaka na makasi,
29bau telemaka, ye basisaka yandi nanganda ya bwala, ye twalaka yandi ti mfinama ku dibulu va mongo ya bau tungaka bwala ya bau, na bau lenda kulosa yandi kuna.
30Kansi yandi lutaka nakati na bau, ye kwendaka.
Yesu kwenda ku Kapenaumi
31Yandi kulumukaka ku Kapenaumi mbanza mu Ngalili. Ye yandi longaka bau mu bilumbu ya luvundu. Mal. 1:21; Mat. 4:13
32Bau yitukaka sambu na malongi ya yandi, kadi mambu ya yandi vandaka ya ngolo. Mat. 7:28
Yandi belula mumu ya vandaka na mpeve ya sumuka
33Mu nzo ya sambilu vandaka muntu, ya vandaka na mpeve ya sumuka ya mbi. Yandi bokaka mu ndinga yanene: Mal. 1:23
34Ye tubaka: Nki mambu ikele na beto ye nge, nge Yesu ya Nazaleti ? Nge imene kwiza kufwa beto ? Mono zaba nge ikele nani, Nkwa Nlongo ya Nzambi.
35Yesu sembaka yandi kutuba: Vanda napi, ye basika mu yandi. Ye bu mpeve ya mbi losaka yandi nakati ya bau, yandi basikaka tuka yandi, yo salaka yandi mambu ve.
36Bau yonso yitukaka, ye bau tubanaka kutuba: Nki mambu yai ? Kansi mu luyalu ye ngolo yandi katula bampeve ya sumuka, ye yau basika.
37Nsangu ya yandi kwendaka sika yonso ya zunga ya ntoto yina.
Yesu belula bukilo nkento ya Petelo, ye bankaka
38Yandi telemaka ye katukaka na nzo ya sambilu, ye kotaka mu nzo ya Simoni, ye bukila nkento ya Simoni vandaka na fievre mingi, bau yuvulaka yandi sambu na yandi. Mat. 8:14; Mal. 1:29
39Yandi telemaka mfinama na yandi, ye sembaka fievre; yo bikaka yandi, ye nswalu yandi telemaka kusadila bau,
40Bu ntangu kotaka, bau yonso ya vandaka na bambevo ye bantu ya maladi ya mpila na mpila twalwaka kwa yandi, ye yandi tulaka bau maboko muntu na muntu, ye belulaka bau. Mat. 8:16; Mal. 1:32
41Bampeve ya mbi basikaka na bantu mingi, bau bokaka, kutuba: Nge ikele Mwana ya Nzambi. Yandi sembaka bau, ye bikaka bau kutuba ve, sambu na bau zabaka yandi ikele Klisto.
Yesu kwenda samuna mu bambanza yankaka
42Bu kuma kia, yandi basikaka ye kwendaka ku sika ya mpamba. Bibuka sosaka yandi, ye kwizaka kwa yandi, ye tubaka kwa yandi, na yandi takatuka ve nakati na bau. Mal. 1:35
43Yandi tubaka kwa bau: Mono fwiti kusamuna nsamu mbote ya kimfumu ya Nzambi mu bambanza yankaka. Kadi sambu na yai mono fidiswaka.
44Yandi vandaka kusamuna mu banzo ya sambilu ya Ngalili.
Currently Selected:
Luka 4: NTK50
Highlight
Share
Copy
Want to have your highlights saved across all your devices? Sign up or sign in
Nouveau Testament en Kikwango © BAliiance Biblique de la RD Congo, 1950.
