Luka 6

Yesu tuba sambu na kilumbu ya luvundu

1Yo vandaka mu kilumbu ya luvundu, yandi kwendaka kuluta mu dilanga ya nkeni ya ble, banlonguki ya yandi bakaka nkeni ya ble, ye kudiaka bu bau nikaka yau mu maboko. Mat. 12:1; Mal. 2:23

2Bafalisi yankaka tubaka: Sambu na nki beno sala mambu ya nsiku pesa nzila ve mu kilumbu ya luvundu ? 2 Mose 20:10; 5 Mose 23:25

3Yesu vutulaka bau ye tubaka: Beno imene kutanga yai ve ya Davidi salaka bu yandi kuwaka nzala, yandi kibeni ye bau ya vandaka na yandi ? 1 Sam. 21:6

4Mpila nki yandi kotaka mu nzo ya Nzambi, ye bakaka ye kudiaka mampa ya tala, ye pesaka yau mpe kwa bau ya vandaka na yandi, ya nsiku pesa nzila ve na kudia, kansi kwa banganga kaka. 2 Mose 29:32

5Yandi tubaka kwa bau: Mwana ya muntu ikele Mfumu ya kilumbu ya luvundu mpe.

Yesu belula diboko ya yuma

6Yo vandaka mu kilumbu ya luvundu yankaka, yandi kotaka mu nzo ya sambilu ye longaka, ye muna vandaka muntu, diboko kibakala ya yandi vandaka ya yuma. Mat. 12:8; Mal. 3:1

7Bansoniki ye bafalisi langidilaka yandi, kana yandi tabelula yandi na kilumbi ya luvundu, na bau lenda kumona mambu ya funda yandi. Luk. 13:14; 14:3

8Kansi yandi zabaka mabanza ya bau, ye tubaka kwa muntu ya vandaka na diboko ya yuma: Nanguka, telema awa nakati. Yandi nangukaka ye telemaka.

9Yesu tubaka kwa bau: Mono yuvula beno mambu mosi, nsiku pesa nzila kusala mambu ya mbote mu kilumbu ya luvundu keti kusala mambu ya mbi, kuvulusa moyo keti kufwa yo ?

10Yandi talaka bau yonso, ye tubaka kwa muntu yina. Lambula diboko ya nge. Yandi salaka yo, ye diboko ya yandi belukaka.

11Bau fulukaka na makasi, ye tubanaka, mambu nki bau lenda kusala kwa Yesu.

Yesu sosa banlonguki ya yandi

12Yo vandaka mu bilumbu yina, yandi kwendaka ku mongo kulomba, mpimpa yamvimba yandi vandaka kuna kulomba Nzambi. Mat. 10:1; Mal. 3:13

13Bu kuma kia, yandi bingaka banlonguki ya yandi ye solaka kumi ye zole ye pesaka bau nkumbu bantumwa mpe.

14Simoni, yandi pesaka nkumbu Petelo mpe, ye Andele, mpangi ya yandi, ye Yakobi ye Yoane ye Filipo ye Batolomai, Yoa. 1:42

15ye Matai ye Toma ye Yakobi, mwana ya Alafi, ye Simoni, ya bingwa Zelote,

16ye Yuda, mwana ya Yakobi, ye Yuda Iskalioti, ya kitukaka muyekudi.

17Yandi kulumukaka na bau, ye telemaka na sika ya konda bamongo, ye kibuka nene ya banlonguki ya yandi, ye kibuka nene ya bantu, ya katukaka na nsi yonso ya Yuda ye Yelusalemi; ye Tilo ye Sidoni, ya ikele na ndambu ya mbu. Bau kwizaka sambu na kuwa yandi ye kubelulwa na bimbevo ya bau. Mat. 4:14

18Bau ya moniswaka mpasi na bampeve ya sumuka, belulwaka mpe.

19Kibuka yonso sosaka kuvalakana yandi, sambu na ngolo basikaka tuka yandi ye belulaka bau yonso. Mat. 14:36; Mal. 5:30

Yesu samuna nsamu va mongo

20Yandi sendulaka meso va banlonguki ya yandi, ye tubaka: Kiese ikele na beno, bansukami, kadi kimfumu ya Nzambi ikele ya beno. Mat. 5:2

21Kiese ikele na beno ya kuwa nzala ntangu yai, kadi beno tayukuta. Kiese ikele na beno ya kudila ntangu yai, kadi beno taseka. Yes. 55:1; 61:2; Yoa. 6:35

22Kiese ikele na beno, bu bantu kuwa beno makasi ye katula beno nakati na bau, ye bu bau tatuba mbi sambu na beno, ye losa nkumbu ya beno mpilamosi yo ikele mbi, sambu na Mwana ya muntu. 1 Pet. 3:14; 4:14

23Mu kilumbu yina beno vanda na kiese, ye dumuka, kadi tala, nsendo ya beno ikele nene mu zulu, kadi mpilayai batata ya bau salaka kwa bambikudi mpe. Bis. 5:41; 7:52

24Kansi ndola kwa beno bamvwama, kadi beno imene kubaka mbombolo ya beno. Nk. 17:14; Luk. 16:25; Yak. 5:1

25Ndola kwa beno ya yukuta ntangu yai, kadi beno takuwa nzala. Ndola kwa beno ya seka ntangu yai, kadi beno tavanda na ntantu ye kudila. Yes. 65:13; Bing. 14:13; Yak. 4:9

26Ndola kwa beno, bu bantu yonso tuba mbote sambu na beno, kadi mpilayai mpe batata ya bau salaka kwa bambikudi ya luvunu.

27Kansi mono tuba kwa beno ya kuwa: Zola bambeni ya beno, sadila mbote bantu ya ikele na beno makasi. 2 Mose 23:4; Bing. 25:21

28Sakumuna bau ya tula beno ndola, lombila bau ya ikele kusaula beno. Luk. 23:34; Bis. 7:60; Lom. 12:14, 20; 1 Kol. 4:12; 1 Pet. 3:9

29Kwa yandi ya bula nge mbata va ditama, pindula yandi yankaka mpe; ye yandi ya baka kazaku ya nge, yimina yandi ve kinkutu ya nge mpe. Bing. 20:22; 24:29; Lom. 12:17; 1 Kol. 6:7; 1 Tes. 5:15; Mat. 5:39

30Pesa kwa konso muntu ya lomba kwa nge, yandi ya baka bima ya nge, lomba yandi yau diaka ve. 5 Mose 15:17; 1 Yoa. 3:17

31Bonso beno zola bantu kusadila beno, mpilayina beno sadila bau mpe.

32Kana beno zola bau ya zola beno, nki matondo ikele na beno ? Kadi bankwa masumu ikele kuzola bantu ya zola bau mpe.

33Kana beno sala mbote kwa bau ya sadila beno mbote, nki matondo ikele na beno ? Bankwa masumu ikele kusala mpilayai mpe.

34Kana beno leva kwa bau ya beno tula vuvu sambu na kubaka yau diaka, nki matondo ikele na beno ? Bankwa masumu mpe ikele kuleva kwa bankwa masumu, sambu na kubaka kitezo mosi diaka.

35Kansi zola bambeni ya beno ye sadila bau mbote, ye leva ye tula vuvu ve kubaka yo diaka, ye nsendo ya beno tavanda mingi, ye beno tavanda bana ya Nzambi Mpungu, kadi yandi ikele kusonga nkenda kwa bau ya konda kupesa matondo ye kwa bankwa mbi.

36Beno vanda bankwa nkenda, bonso Tata ya beno ikele Nkwa nkenda.

37Fundisana ve, ye beno tafundiswa ve. Bedisana ve, ye beno tabediswa ve. Vidisila, ye beno tavidiswa. Lom. 2:1; 1 Kol. 4:15

38Pesa ye beno tapeswa, kitezo ya mbote, ya yidikwa, ya nikiswa, ya tiamukwa tapeswa mu maboko ya beno. Kadi kitezo ya beno tezila, beno tatezilwa yo diaka. Bing. 19:17

39Yandi tubaka kingana kwa bau mpe: Mpofo lenda kutwadisa mpofo ? Bau zole takubwa mu dibulu ve ?

40Nlonguki lenda kuluta nlongi ya yandi ve kadi konso muntu ya lunga, tavanda bonso nlongi ya yandi. Mat. 10:24; Yoa. 13:16; 15:20

41Kansi sambu na nki nge mona nti ya fioti ya ikele mu disu ya mpangi ya nge, kansi nge mona ve yanene ya ikele mu disu ya nge ?

42Mpila nki nge lenda kutuba kwa mpangi ya nge: Mpangi, bika mono katula nti ya fioti ya ikele mu disu ya nge, bu nge kibeni mona ve nti yanene ya ikele mu disu ya nge ? Nge muntu ya luvunu, katula ntete nti yanene ya ikele mu disu ya nge, buna nge tamona mbote kukatula nti ya fioti ya ikele mu disu ya mpangi ya nge.

43Kadi nti ya mbote ikele kubuta ve mabundu ya mbi. Diaka nti ya mbi ikele kubuta ve mabundu ya mbote. Mat. 7:15

44Kadi nti na nti ikele kuzabakana na mabundu ya yo. Bau buka ve mabundu ya figi na nti ya nsende. Ye bau buka ve mabundu ya vinia na nti ya mpanga.

45Muntu ya mbote ikele kubasisa bima mbote na lundulu ya mbote ya ntima ya yandi, muntu ya mbi ikele kubasisa bima ya mbi na lundulu ya ntima ya yandi ya mbi, kadi munoko ikele kutuba yina ya fuluka mu ntima.

46Sambu na nki beno ikele kubinga mono, Mfumu, Mfumu, ye sala ve ya mono tuba kwa beno ? Hos. 8:2; Lom. 2:13; Yak. 1:22

47Konso muntu ya kwiza kwa mono ye kuwa mambu ya mono, ye sala yo, mono tasonga beno ya yandi kufwana. Mat. 7:24

48Yandi ikele mpilamosi muntu ya tunga nzo, yandi timaka dibulu ya nda, ye tulaka lufulu va ditadi, kansi bu masa fulukaka, ye nkuka bulaka nzo yai, yo konda kunikisa yo, kadi yo tungwaka va ditadi.

49Kansi yandi ya kuwa, ye sala yo ve, ikele mpilamosi muntu ya tunga nzo ya yandi va ntoto ya konda lufulu, nkuka kwizaka, nswalu yo kubwaka; ye kubwa ya nzo yai vandaka yanene.

Currently Selected:

Luka 6: NTK50

Highlight

Copy