Luka 9
9
Yesu fidisa banlonguki ya yandi
1Yandi bingaka banlonguki kumi ye zole sikamosi, ye pesaka bau ngolo ye luyalu va zulu ya bampeve yonso ya mbi ye kubelula bambevo. Mat. 10:1; Mal. 6:7; Luk. 6:13
2Yandi fidisaka bau kusamuna nsamu ya kimfumu ya Nzambi ye kubelula bantu ya maladi.
3Yandi tubaka kwa bau: Nata kima ve mu nzila, keti nkawa, keti kuba, keti madia, keti palata; keti vanda na binkutu zole ve. Luk. 10:4; 22:36
4Konso nzo ya beno kota, vanda muna ti beno katuka. Luk. 10:15
5Bantu yonso ya baka beno ve, bu beno katuka na mbanza yina, katula mfumfuta na makulu ya beno sambu na kitemo kwa bau. Luk. 10:11; Bis. 13:51
6Bau kwendaka, ye lutaka mu bwala na bwala, ye samunaka nsamu mbote, ye belulaka bantu ya ndambu yonso.
Elode ikele kuyituka
7Elode, nyadi, kuwaka mambu yonso ya salwaka, yandi yitukaka mingi, sambu na bankaka tubaka: Yoane imene kufulukiswa tuka bafwa. Mat. 14:1; Mal. 6:14
8Kansi bankaka tubaka: Elia imene kumonika. Bankaka tubaka: Mbikudi ya ntama imene kufulukisa diaka.
9Ye Elode tubaka: Mono zengisaka ntu ya Yoane, kansi yai nani ya mono kuwa mambu ya mpilayai ? Yandi sosaka kumona yandi.
Yesu dikila mafunda tanu ya babakala
10Ye bantumwa vutukaka, bau tubaka mambu yonso ya bau salaka. Yandi bakaka bau ye kwendaka na bau mu kinsweki ku mbanza ya bingwa Betesaida. Mat. 14:13; Mal. 6:30
11Bu bibuka zabaka yo, bau landaka yandi, ye yandi bakaka bau ye tubaka kwa bau sambu na kimfumu ya Nzambi, yandi belulaka bau ya vandaka na nsatu ya beluka.
12Bu kilumbu yantikaka kumana; banlonguki kumi ye zole kwizaka ye tubaka kwa yandi: Sindika kibuka na bau lenda kwenda ku mbwala ye mu nseke ya zunga, sambu na kulala ye kubaka madia, kadi beto ikele awa mu ntoto ya mpamba.
13Yandi tubaka kwa bau: Beno pesa bau ya kudia. Bau tubaka: Beto ikele na yankaka ve, kansi mampa tanu ye mbizi ya masa zole; keti kana beto kwenda kusumbila bantu yai yonso madia.
14Kadi bau vandaka mfinama babakala mafunda tanu. Kansi yandi tubaka kwa banlonguki ya yandi: Tula bau kuvanda mu kibuka, kibuka makumi tanu, tanu.
15Bau salaka yo, ye vandisaka bau yonso.
16Yandi bakaka mampa tanu ye mbizi ya masa zole, ye talaka ku zulu, ye sakumunaka yau, ye bukunaka yau, ye pesaka yau kwa banlonguki, sambu na kutula nantwala na bibuka ya bantu.
17Bau kudiaka ye yonso yukutaka; bau logotaka bitini ya bikaka, bitunga kumi ye zole.
Petelo tuba kitemo sambu na Yesu
18Yo vandaka bu yandi vandaka kulomba yandi mosi, banlonguki vandaka na yandi, yandi yuvulaka bau kutuba: Bibuka ikele kutuba, mono ikele nani ? Mat. 16:13; Mal. 8:27
19Bau vutulaka kutuba: Yoane Mbotiki. Kansi bankaka tuba; Elia. Bankaka tuba: Mosi ya bambikudi ya ntama imene kufulukisa diaka.
20Yandi tubaka kwa bau: Kansi beno tuba, mono ikele nani ? Petelo vutulaka kutuba: Klisto ya Nzambi.
21Yandi sembaka bau ye sikidikisaka bau kutuba kwa muntu mambu yai ve.
22Yandi tubaka: Mwana ya muntu fwiti kumona mpasi mingi, ya bambuta ya bantu ye bambuta banganga ye bansoniki tabuya yandi ye kufwa yandi ye yandi tafulukiswa mu kilumbu ya tatu. Luk. 18:31
23Yandi tubaka kwa bau yonso: Kana muntu zola kulanda nanima na mono, bika yandi dibuya, ye baka kulunsi ya yandi kilumbu na kilumbu, ye landa mono, Mat. 16:24; Mal. 8:27; Luk. 14:27
24kadi konsonani ya zola kuvulusa moyo ya yandi tavidisa yo, kansi konsonani ya zola kuvidisa moyo ya yandi sambu na mono tavulusa yo. Luk. 17:33; Yoa. 12:25
25Kansi yo tasadisa muntu na nki, kana yandi baka nsi yamvimba ndandu ye yandi kibeni vidiswa keti loswa ?
26Kadi konsonani ya kuwa nsoni sambu na mono ye mambu ya mono, Mwana ya muntu takuwila yandi nsoni, bu yandi kwiza mu nkembo ya yandi ye ya Tata ya yandi ye ya banjo ya nlongo. Mat. 10:33; Luk. 12:9; 2 Tim. 2:12; Lom. 1:16
27Mono tuba kwa beno kieleka: Bankaka ya bau ya telema awa tameka lufwa ve, ti bau mona kimfumu ya Nzambi.
Yesu kembiswa
28Yo vandaka mfinama na kilumbu nana nanima na mambu yai, yandi bakaka Petelo ye Yoane ye Yakobi, ye tombokaka va mongo kulomba. Mat. 17:1; Mal. 9:2
29Bu yandi vandaka kulomba, luse ya yandi kitukwaka ye mvwatu ya yandi kwizaka mpembe ye kenzima.
30Ye tala, babakala zole solulaka na yandi, ikele Mose ye Elia.
31Bau monikaka mu nkembo ye tubaka sambu na katukulu ya yandi, ya yandi talungisa mu Yelusalemi.
32Kansi Petelo ye bau ya vandaka na yandi vandaka na tulu mingi; kansi bu bau sikamaka, bau monaka nkembo ya yandi ye babakala zole ya telema na yandi.
33Yo vandaka bu bau ikele kubika yandi, Petelo tubaka kwa Yesu: Mfumu, ikele mbote na beto ikele awa. Bika beto tunga mafwokula tatu, mosi ya nge, mosi ya Mose, ye mosi ya Elia. Yandi zabaka ve ya yandi tubaka.
34Bu yandi tubaka mpilayai, dituti kwiza kufuka bau, bau titaka, bu bau kotaka mu dituti.
35Ndinga basikaka na dituti kutuba: Yai ikele Mwana ya mono ya zolwa; beno kuwa yandi. Luk. 3:22; 2 Pet. 1:17
36Bu ndinga imene kwiza, Yesu monikaka yandi mosi kaka. Bau vandaka napi; ye tubaka na muntu ve mu bilumbu yina mambu ya bau monaka.
Yesu basisa mpeve ya mbi
37Yo vandaka kilumbu ya landa, bu bau imene kukulumuka na mongo, kibuka nene kutakanaka na yandi. Mat. 17:14; Mal. 9:14
38Tala, muntu mosi mu bibuka bokaka, kutuba: Nlongi, mono yuvula nge kwiza kutala kaka mwana bakala ya mono; kadi yandi ikele mwana ya mono mosi kaka.
39Tala, mpeve ikele kusimba yandi, nanima yandi ikele kuboka, ye yo tuntumusa yandi, ye yandi basisa mafulufulu, ye yo lwadisa yandi ye zola kubika yandi ve.
40Mono lombaka banlonguki ya nge, kubasisa yo; kansi bau lendaka ve.
41Yesu vutulaka, ye tubaka: Beno ikele mbandu ya konda lukwikilu ye ya mbi; ntama ikwa mono tavanda na beno ye vibidila na beno ? Twala mwana ya nge awa.
42Bu yandi ikele kwiza, mpeve ya mbi losaka yandi va ntoto, ye tuntumusaka yandi, kansi Yesu sembaka mpeve ya sumuka, ye belulaka mwana, ye vutulaka yandi kwa tata ya yandi.
43Bantu yonso yitukaka sambu na ngolo yanene ya Nzambi. Bu bau yonso yituka sambu na mambu yonso ya yandi salaka, yandi tubaka kwa banlonguki ya yandi: Mat. 17:22; Mal. 9:30
44Bika mambu yai kota mu makutu ya beno; kadi Mwana ya muntu tayekulwa mu maboko ya bantu. Luk. 24:7
45Kansi bau zabaka mambu yai ve, yo vandaka ya kinsweki kwa bau, bau bakisaka yo ve ye bau titaka kuyuvula yandi sambu na mambu yai. Luk. 2:50; 18:34
Yesu songa nani luta nene
46Ntembe telemaka nakati na bau, kana nani luta nene nakati na bau. Mat. 18:1; Mal. 9:33
47Bu Yesu monaka mabanza ya ntima ya bau, yandi bakaka mwana ya fioti, ye tulaka yandi va lweka ya yandi,
48Yandi tubaka kwa bau: Konsonani ya baka mwana yai ya fioti mu nkumbu ya mono ikele kubaka mono, konsonani ya baka mono, ikele kubaka yandi ya fidisaka mono; sambu na konsonani ya luta fioti nakati na beno yonso, yandi tavanda yanene. Luk. 10:16; 14:11; 18:14; Yoa. 13:20
49Yoane vutulaka ye tubaka: Mfumu, beto monaka muntu basisa bampeve ya mbi mu nkumbu ya nge; beto kanikinaka yandi, sambu na yandi landaka beto ve. Mal. 9:38
50Kansi Yesu tubaka kwa yandi: Kanikina yandi ve; kadi yandi ya konda kuvanda na kimbeni na beno, yandi ikele ya beno. Luk. 11:23
Bwala ya Samalia zola kukwikila Yesu ve
51Yo vandaka bu bilumbu ya bakwa ku zulu ya yandi zola kulunga, yandi tadisaka luse ya yandi na kwenda ku Yelusalemi; Bis. 1:2
52yandi fidisaka bantumwa nantwala na luse ya yandi. Ye bau kwendaka ye kotaka mu bwala ya baSamalia nakuyidika sambu na yandi.
53Bau bakaka yandi ve sambu na luse ya yandi tadisa ku Yelusalemi.
54Bu banlonguki Yakobi ye Yoane monaka yo, bau tubaka: Mfumu, nge zola beto kubinga tiya kukatuka na zulu ye kuyoka bau bonso Elia salaka ?
55Kansi yandi pindukaka ye sembaka bau, kutuba: Beno zaba ve, mutindu ya mpeve ya beno ikele.
56Kadi Mwana ya muntu kwizaka ve kufwa moyo ya bantu, kansi kuvulusa bau. Bau kwendaka bu bwala yankaka.
Kifu ya balandi
57Yo vandaka bu bau kwenduka na nzila, muntu tubaka kwa yandi: Mfumu, mono talanda nge sika yonso ya nge ikele kwenda. Mat. 8:10
58Yesu tubaka kwa yandi: Bambizi ikele na mabulu ya bau, bandeke ya zulu ikele na banzanza ya bau, kansi Mwana ya muntu ikele na sika ve kutula ntu ya yandi.
59Yandi tubaka kwa muntu yankaka: Landa mono. Kansi yandi tubaka: Mfumu, bika mono kwenda ntete kuzika tata ya mono.
60Yandi tubaka kwa yandi: Bika bafwa zika bafwa ya bau, kansi nge, kwenda kusamuna nsamu ya kimfumu ya Nzambi.
61Muntu yankaka tubaka: Mfumu, mono talanda nge, kansi bika mono pesa mbote kwa bau ya ikele mu nzo ya mono.
62Yesu tubaka kwa yandi: Muntu ya tula diboko ya yandi ku nsengo ya yandi ye tala nanima, lunga ve kwa kimfumu ya Nzambi.
Currently Selected:
Luka 9: NTK50
Highlight
Share
Copy
Want to have your highlights saved across all your devices? Sign up or sign in
Nouveau Testament en Kikwango © BAliiance Biblique de la RD Congo, 1950.
