Malako 1

Kisalu ya Yoane mbotiki

1Luyantiku ya nsamu mbote ya Yesu Klisto Mwana ya Nzambi.

2Bonso yo ikele kusonama mu Yesaya mbikudi: Tala, mono fidisa ntumwa ya mono nantwala ya luse ya nge, yandi tayidika nzila ya nge; Yes. 40:3; Malaki 3:1; Mat. 3:1; Luk. 3:3

3Ndinga ya mosi kuboka mu nsi ya mpamba: Beno yidika nzila ya Mfumu, beno sungika tunzila ya yandi.

4Yoane kwizaka, yandi botikaka mu nsi ya mpamba, ye samunaka mbotokolo ya mpindulu ya mabanza ku mvidisilu ya masumu ya bau. Mat. 3:1

5Nsi yonso ya Yuda ye bisi Yelusalemi yonso kwendaka kwa yandi, bau botikwaka ya yandi mu nzadi ya Yodani, ye bau kundimaka masumu. Mat. 3:5

6Ye Yoane vwataka mvwatu ya mika ya mbizi yanene ya bingwa kamela ye mukaba ya nkanda ya mbizi va luketo ya yandi, ye yandi kudiaka bampasu ye bwiki ya mfinda.

7Yandi samunaka, kutuba: Yandi ya kwiza nanima na mono; luta mono ngolo, mono lunga ve yinama ye kangula nsinga ya nsampatu ya yandi. Luk. 3:16; Yoa. 1:26; Bis. 13:25

8Mono botikaka beno mu masa, kansi yandi tabotika beno mu Mpeve Yanlongo. Bis. 1:5; 2:4; 11:15; 19:4

Yesu botukwa

9Yo vandaka, mu bilumbu yina, Yesu katukaka na Nazaleti ya Ngalili. Yandi botikwaka na Yoane mu Yodani. Mat. 3:13; Luk. 3:21

10Ye nswalu bu yandi tomboka tuka masa, yandi monaka zulu kanguka ye Mpeve, mpilamosi yembe, kulumukaka va yandi.

11Ndinga katukaka na zulu kutuba: Nge ikele Mwana ya mono ya zolwa, mu nge mono ikele kuyangidika. Nk. 2:7; Yes. 42:1; Mal. 9:7; 2 Pet. 1:17

Yesu yunswa

12Nswalu mpeve sindikaka yandi ku nsi ya mpamba. Mat. 4:1; Luk. 4:1

13Ye yandi vandaka mu nsi ya mpamba bilumbu makumi iya, yandi pukumunwaka kwa Satana, ye yandi vandaka na bambizi ya mfinda, ye banjo sadilaka yandi.

Yesu yantika kutuba nsamu mbote

14Bu Yoane imene kuyekulwa mu boloko, Yesu kwizaka mu Ngalili, kusamuna nsamu mbote ya Nzambi, kutuba: Mat. 4:12

15Ntangu imene kulunga, ye kimfumu ya Nzambi ikele mfinama, pindula mabanzi ya beno, ye kwikila nsamu mbote.

Yesu binga banlonguki ya yandi yantete

16Bu yandi lutaka mfinama na mbu ya Ngalili, yandi monaka Simoni ye Andele mpangi ya Simoni, bau ikele kulosa makonde ya bau mu mbu, kadi bau vandaka bantambi ya bambizi ya masa. Mat. 4:18

17Ye Yesu tubaka kwa bau: Kwiza kulanda mono, mono takitula beno bantambi ya bantu.

18Ye nswalu, bau bikaka makonde ya bau ye landaka yandi.

19Bu yandi kwendaka nantwala ndambu, yandi monaka Yakobi, ye Yoane mpangi ya yandi, bana ya Zebedai; bau mpe vandaka mu bota kuyidika makonde ya bau.

20Nswalu, yandi bingaka bau, ye bau bikaka tata ya bau Zebedai mu bota ye basielo ya yandi, ye bau landaka yandi.

Yesu longa mu Kapenaumi

21Bau kotaka mu Kapenaumi. Mu kilumbu ya luvundu yandi kotaka mu nzo ya sambilu ye longaka. Luk. 4:31

22Bau yitukaka sambu na malongi ya yandi; kadi yandi longaka bau bonso yandi ikele na ngolo, kansi bonso bansoniki ve.

Yesu belula muntu ya vanda na mpeve ya sumuka

23Muntu vandaka mu nzo ya sambilu, yandi vandaka na mpe ve ya sumuka, yandi bokaka, kutuba: Luk. 4:33

24Nge ikele na beto nki mambu ? Nge Yesu ya Nazaleti, Nge imene kwiza kufwa beto ? Mono zaba nge ikele nani, Nkwa Nlongo ya Nzambi.

25Yesu sembaka yandi, kutuba: Vanda napi, ye basika tuka yandi.

26Bu mpeve ya sumuka imene kutuntumuna yandi, ye boka mu ndinga ya nene, yandi basikaka tuka yandi.

27Bantu yonso yitukaka, bau yuvulana, kutuba: Yai ikele nki, malongi yampa ? Mu ngolo yandi sikidikisa bampeve ya sumuka, ye bau ikele kulemvuka yandi.

28Nswalu, nsangu ya yandi kwendaka na sika yonso, ye nsi yonso ya kuzunga Ngalili.

Yesu belula bukilo nkento ya Petelo

29Ye bu bau basika mu nzo ya sambilu, bau kumaka ku nzo ya Simoni ye Andele, sikamosi na Yakobi ye Yoane. Mat. 8:14; Luk. 4:38

30Kansi bukilo nkento ya Simoni ikele kulala na maladi ya fievre, bau tubaka kwa Yesu sambu na yandi.

31Yandi kwizaka mfinama ye simbaka diboko ya yandi, ye telemisaka yandi, ye nswalu fievre bikaka yandi, yandi sadilaka bau.

Yesu belula bantu yankaka

32Kansi mu nkokila bu ntangu kotaka, bau twalaka kwa yandi bantu ya vandaka na maladi ye ya bakama na bampeve mbi.

33Ye bwala yamvimba kutakanaka na mwelo,

34Yandi belulaka bau mingi ya vandaka na maladi mutindu mutindu, yandi basisaka bampeve mingi ya mbi, yandi buyaka bampeve kutuba, sambu na bau zabaka yandi.

Yesu kuzieta mu Ngalili

35Na suka bu kumakia ve, yandi telemaka ye basikaka ye kwendaka ku nsi ya mpamba, kuna yandi lombaka. Luk. 4:42

36Simoni ye bau ya vandaka na yandi landaka yandi.

37Bu bau monaka yandi, bau tubaka kwa yandi: Bantu yonso ikele kusosa nge.

38Yandi tubaka kwa bau: Beto kwenda ku mabwala yankaka ya ikele mfinama, sambu na kusamuna kuna mpe, sambu na mambu yai mono kwizaka.

39Yandi kwendaka kusamuna mu banzo ya bau ya sambilu mu Ngalili yonso, yandi basisaka bampeve mbi.

Yesu belula nkwa bwazi

40Nkwa bwazi kwizaka kwa yandi, yandi bombidilaka yandi, ye fukamaka na makungunu ye tubaka kwa yandi: Kana nge zola, nge lenda kuvedisa mono. Mat. 8:2; Luk. 5:12

41Yesu kuwilaka yandi nkenda, yandi lambulaka diboko ye valakanaka yandi ye tubaka kwa yandi: Mono zola, nge vanda ya vedila.

42Nswalu bwazi katukaka na yandi, ye yandi vedilaka.

43Nswalu Yesu kanikinaka yandi ye sindikaka yandi,

44yandi tubaka kwa yandi: Tomatala, nge tuba kwa muntu ve, kansi kwenda kudisonga kwa nganga ye pesa bima ya Mose tubaka, sambu na kudisukula sambu na kitemo kwa bau.

45Kansi bu yandi basikaka, yandi yantikaka kusamuna yo mingi, yandi mwangisaka mambu yina, sambu na yai Yesu lendaka ve kukota diaka mu mbanza, kansi yandi vandaka na nsi ya mpamba; bau kwizaka kwa yandi tuka ndambu yonso.

Currently Selected:

Malako 1: NTK50

Highlight

Copy