Malako 12
12
Yesu tuba kingana ya dilanga ya vinie
1Yandi yantikaka kutuba kwa bau mu bingana: Muntu kunaka dilanga ya vinia ye tulaka lupangu nanganda na yo, ye timaka kamunu ya vinia ye tungaka nzo ya yongi, ye tudisaka yo kwa basadi ye kwendaka ku ntoto yankaka. Nk. 80:8; Yes. 5:1; Yel. 5:1; Yoeli 2:21; Mat. 21:33; Luk. 20:9
2Mu nsungi ya lunga, yandi fidisaka sielo kwa basadi sambu na kubaka mabundu ya dilanga ya vinia.
3Bau simbaka yandi ye bulaka yandi mingi ye sindikaka yandi na maboko mpamba.
4Yandi fidisaka sielo yankaka kwa bau, ye bau lwadisaka yandi na ntu, bau sadilaka yandi nsoni mingi.
5Yandi fidisaka sielo yankaka mpe ye bau kufwaka yandi. Yandi fidisaka bankaka mingi; bau bulaka bankaka ye kufwaka bankaka.
6Mosi bikaka na yandi, mwana ya yandi mosi ya zolwa. Yandi fidisaka yandi nanima kwa bau, kutuba: Bau tapesa mwana ya mono luzitu.
7Kansi basadi yina tubanaka: Yai ikele mvingidi ya difwa, bika beto kufwa yandi ye difwa tavanda ya beto.
8Bau bakaka yandi ye kufwaka yandi ye losaka yandi nanganda ya dilanga ya vinia.
9Sambu na yai mfumu ya dilanga ya vinia tasala nki ? Yandi takwiza kufwa basadi ye pesa dilanga ya vinia kwa bankaka.
10Beno tangaka ve masonukwa yai: Ditadi ya batungi buyaka, yo imene kwiza ntu ya fuma; Nk. 118:22; Yes. 8:14; 28:16; Bis. 4:11; Lom. 9:33; Ef. 2:20; 1 Pet. 2:7
11Mfumu salaka mpilayai, yo ikele mambu ya nyitukulu mu meso ya beto.
12Bau sosaka kusimba Yesu, kansi bau titaka kibuka, kadi bau zabaka yandi tubaka kingana yina sambu na bau; buna bau bikaka yandi ye bau kwendaka.
Bafalisi yuvula Yesu sambu na mpaku
13Bau fidisaka kwa Yesu bankaka ya bafalisi ye bantu ya Elode, na bau lenda kubwisa yandi mu ndinga ya yandi. Mat. 22:15; Luk. 20:20
14Bu bau kumaka, bau tubaka kwa yandi: Nlongi, beto zaba nge ikele ya kieleka, ye nge ikele kutula bantu yonso kitezo mosi, kadi nge ikele kutala luse ya muntu ve, kansi nge ikele kulonga nzila ya Nzambi mu kieleka: Nsiku pesa nzila kufuta mpaku kwa Kaisali keti ve.
15Beto tafuta keti beto tafuta ve ? Bu yandi monaka luvunu ya bau, yandi tubaka kwa bau: Sanibu na nki beno ikele kupukumuna mono ? Twala mbongo denali mosi, na mono lenda kutala yo,
16Bau twalaka yo, ye yandi tubaka kwa bau: Yai ikele kifwanusu ya nani ye bisono ya nani ? Bau tubaka kwa yandi: Ya Kaisali.
17Yesu vutulaka kwa bau: Futa kwa Kaisali bima ya Kaisali, ye kwa Nzambi bima ya Nzambi. Bau yitukaka mingi sambu na yandi. Lom. 13:7
Basaduki yuvula Yesu sambu na mfulukulu ya bafwa
18Basaduki kwizaka kwa yandi, bau ya tuba mfulukulu ya bafwa ikele ve, bau yuvulaka yandi, kutuba: Mat. 22:23; Luk. 20:27
19Nlongi, Mose sonikaka kwa beto: Kana mpangi ya muntu imene kufwa, ye bikaka nkento, kansi mwana ve, bu na mpangi fwiti kubaka nkento yina ya mpangi ya yandi bikaka ye kutelemisila mpa, ngi ya yandi nkuna. 5 Mose 25:5
20Bampangi nsambwadi vandaka, ya ntete bakaka nkento, yandi kufwaka ye bikaka nkuna ve.
21Ya zole bakaka yandi ye kufwaka ye bikaka nkuna ve, ya tatu mpilayai mpe.
22Bau nsambwadi bakaka yandi ye bikaka nkuna ve; bu na nkento kufwaka mpa.
23Mu mfulukulu, nkento tavanda ya nani ya bau, kadi bau nsambwadi vandaka na yandi ?
24Yesu tubaka kwa bau: Beno vengumuka sambu na mambu yai, sambu na beno zaba ve masonu, kwa keti ngolo ya Nzambi.
25Kadi bu bantu fulukiswa tuka bafwa; bau takwela ve ye kwedisa ve, kansi bau ikele bonso banjo ya zulu.
26Kansi sambu na bafwa ya tafulukiswa, beno tangaka ve mu nkanda ya Mose sika na mambu ya nti ya fioti, Nzambi tubaka kwa yandi, kutuba: Mono ikele Nzambi ya Abalahami ye Nzambi ya Isaki ye Nzambi ya Yakobi. Bis. 7:30; Eb. 11:16
27Yandi ikele Nzambi ya bafwa ve, kansi Nzambi ya bamoyo, beno imene kuvengumuka mingi.
Nsiku Ya luta nene
28Nsoniki mosi kwizaka ye kuwaka bu bau tulaka ntembe, bu yandi monaka yandi imene kuvutudila bau mbote, yandi yuvulaka yandi: Nki nsikudukusu ya ntete ya yonso ? Mat. 22:34
29Yesu vutulaka: Ya ntete ikele yai: Kuwa Isaeli, Mfumu Nzambi ya beto ikele Mfumu mosi kaka. 5 Mose 6:4
30Ye nge fwiti kuzola Mfumu Nzambi ya nge mu ntima ya nge yonso, ye mwela ya nge yonso, ye mabanza ya nge yonso, ye ngolo ya nge yonso.
31Ya zole ikele yai: Nge fwiti kuzola bamfinangani ya nge bonso nge kibeni. Nsikudukusu yankaka ikele ve ya luta yai nene. 3 Mose 19:12; Lom. 13:9; Ngal. 5:14; 1 Tim. 1:5; Yak. 2:8
32Nsoniki tubaka kwa yandi: Kieleka, Nlongi, nge imene kutuba mbote, yandi ikele mosi, yankaka ikele ve, kansi yandi kaka,
33zola yandi na ntima yonso ye mabanza yonso ye ngolo yonso, ye zola bamfinangani ya nge bonso nge kibeni, yai luta nkailu ya yokwa yamvimba ye nkailu ya zikwa. 1 Sam. 16:22; 5 Mose 6:5
34Bu Yesu monaka yandi imene kuvutula na ngangu, yandi tubaka kwa yandi: Nge ikele ntama ve na kimfumu ya Nzambi. Nanima na yina muntu mosi vandaka na ngolo mu ntima diaka ve kuyuvula yandi mambu.
Yesu longa mu tempelo
35Bu Yesu vandaka mu tempelo, yandi vutulaka ye tubaka: Mpila nki bansoniki tuba Klisto ikele Mwana ya Davidi ? Mat. 22:41; Luk. 20:41
36Davidi kibeni tubaka mu Mpeve Yanlongo: Mfumu tubaka kwa Mfumu ya mono: Vanda na diboko ya kibakala ya mono ti mono imene kutula bambeni ya nge nansi ya makulu ya nge. Nk. 110:1; Bis. 2:24; 1 Kol. 15:25; Eb. 1:13; 10:13
37Davidi kibeni bingaka yandi Mfumu, bu na mpila nki yandi ikele Mwana ya yandi ? Ye kibuka ya nene kuwaka yandi na kiese.
Yesu longa bantu sambu na bafalisi
38Yandi tubaka kwa bau mu malongi ya yandi: Beno tomatala sambu na bansoniki, bau zola kutambula mu kazaku ya nda ye kupeswa mbote mu sika ya mazandu, Mat. 23:1; Luk. 20:45
39Ye sika ya ntete mu banzo ya sambilu ye bakiti ya ntete mu fete,
40bau ikele kudia bima yonso ya bafwola ye bau lomba Nzambi ntama mingi kusweka mbi ya bau, bau tabaka ndola ya luta ngolo.
Mbongo centime ya fwola
41Yesu vandaka nantwala ya lundulu ya mbongo, yandi talaka bonso bantu losaka mbongo mu lundulu. Bamvwama mingi tulaka mingi. Luk. 21:1
42Kuna vandaka fwola ya nsukami, yandi tulaka mbongo centime zole ya lunga mbongo dikuta mosi.
43Yandi bingaka kwa yandi banlonguki ya yandi ye tubaka kwa bau: Kieleka mono tuba kwa beno: Fwola yai ya nsukami imene kutula ya luta bau yonso ya imene kutula mbongo mu lundulu. 2 Kol. 8:12
44Kadi bantu yonso tulaka ya basika tuka kimvwama ya bau, kansi yandi yai tulaka yonso ya yandi mu nsukami ya yandi ye yonso ya moyo ya yandi.
Currently Selected:
Malako 12: NTK50
Highlight
Share
Copy
Want to have your highlights saved across all your devices? Sign up or sign in
Nouveau Testament en Kikwango © BAliiance Biblique de la RD Congo, 1950.
