Yoane 10
10
1Solosolo, solosolo, lakosumol’ino, onofatua en’ofolo bon’emonyedyo ena mpate, ohonde aanda en’ili’omoi, ande liya la bokumoli. 2Koko ende onotua en’ofolo, ande botombanyi bona mpate. 3Onotombanya bofolo amokombwela lokombo, ko mpate baoka efodya enande, ko aelela mpate inande nko l’aina, ko afodya iho. 4Enakady’ende lifodya mpate inande ihatu, endamene aeta en’oso’oniyo; ko mpate baokil’ende, lacina mpate baeya efodya enande. 5Koko bafakilaki bofenda: bangolota nko ndota; lacin’iyo bafe ya efodya ena befenda. 6Yesu amasumola ekolanya ene, koko iyo batafokola ncina en’aoyi banaki’nd’oasumolaka.
7Lacin’eho, Yesu amasumola lakina, ate, Solosolo, solosolo, lakosumol’ino, Emi nde nde lokombo lona mpate. 8Iyatu banayaki en’oso’onami bayaaki baiya l’akumoli; koko mpate bataok’iyo. 9Emi nde nde lokombo; yomb’oto aotua l’emi, angika, ko angotua, ko angofola, ko angosungya toma tona ndaka. 10Liya aoya nko la ncina emoko kei: nko lacina aiya, ko ayake, ko aehya; emi moya lacina baate liiko, ko baate loho nko la mpula. 11Emi nde nde Botombanyi bona mpate bon’olotsi; Botombanyi bona mpate bon’olotsi aambya liiko lonande lacin’ena mpate. 12Bosali, onofayali Botombanyi mene, ko onofayali mene mpate, enen’ende nkoi eyayi, aumbela mpate, ko aolota; ko nkoi aunda mpate, ko aofanzol’iho. 13Bosali aolota lacin’oka ayali nk’osali kei, ko afakanele mpate. 14Emi nde nde Botombanyi bona mpate bon’olotsi; ko leya banamamene, ko banamamene banjey’emi, 15yoka bosamb’onanjeya Bafango’onami, ko emi leya Bafango; ko laambya liiko lonami lacin’ena mpate. 16Koko njali la mpate imoi inifayali ina botong’one; akoli eneyal’emi nje l’iyo nkoho, ko bangolofamela efodya enami; ko bangoyala botonga bomoko, la Botombanyi bomoko. 17La ncina ene Bafango’onami anjok’emi nganji, lacin’emi laambya liiko lonami lacina njambole loho lakina. 18Efan’oto ononkumol’emi loho: emamene kongoambya loho. Njali la lifoka lacina njambya loho, ko njali la lifoka lacina njambole loho lakina. Lotomo loneloki Bafango’onami ontomaka nde lone.
19Ba-Yuda bait’okambwana beloi lacin’ena baoyi’ane. 20Bike’oniyo bila, Mbo ayali la demona, ko aolowa; bolof’ende lacina nai? 21Bakina, Mbo efana, bin’itendelo’ine bifayali bitendelo bin’oto onoyali la demona. Iya, demona ainya nde lilifola baiso ban’oto’onodyaki’aiso?
22Ko elambedya ena Eekedyo eoyela ena Yelusalema, nk’en’esike ena lifia. 23Ko Yesu aoselasela en’otumba bona Yakomba, ena mbalasai enetangama ena Solomona. 24Nkwaho Ba-Yuda bamolingamedya, ko bamosumola, iy’ate, Otokakanza bolingolingo’oya? Yomb’oyali Masiya, otosumole fololo. 25Yesu amakutwela, ate, Mokosumol’ino, koko bofimedya; bikambwa binakamb’emi ena lina lina Bafango’onami, temoin enami nde biho. 26Koko ino bofimedya, lacin’ino bofayali mpate inami. 27Mpate inami baoka efodya enami; lomaey’iyo, ko bankil’emi; 28ko lomafa liiko lonelofakale, ko bafehaki tu; ko efan’oto ononkumol’iyo ena likasa linami. 29Bafango’onami onompak’iyo aleki bahatu, ko efan’oto oninya yakudya ena likasa lin’afango’onami. 30Emi la Bafango toyali nk’omoko. 31Lakina Ba-Yuda baambola baufe lacina baofusele. 32Koko Yesu amakutwela, ate, Mokotum’ino bike bon’ikambwa bin’olotsi eneyali Bafango’onami: la bikambwa biho, ino bompusel’emi baufe lacin’en’ekambwa eka nai? 33Ba-Yuda baokutola, iy’ate, Tofakofusele baufe lacin’en’ekambwa en’olotsi: tokofusela lacin’ena besao benasaiy’e Yakomba, ko lacin’e, onoyali nko boto kei, oyoil’eamene Yakomba. 34Yesu amakutwela, ate, Yoi line lifatengama nde en’ekand’enino: Njilake’oka ino boyali yakomba imoi? 35Yombo atang’iyo yakomba banaki yoi lina Yakomba ofamaka (ko Bitengelo bina Yakomba bifasondolama), 36ino bila lacin’enande onoki Bafango oekyaka en’oeka, ko onoki’nd’otomaka ena loko, in’ate, Osaiya Yakomba, lacin’eneki’m’oilaka, emite, Emi nde nde Bon’ona Yakomba? 37Yombo mpakambe bikambwa bina Bafango’onami, botanjimedyake; 38ohonde, yombo njakambe biho, kanga bofanjimedy’emi, bimedya nko bikambwa, lacina beye ko bofokol’oka Bafango ayali eneyal’emi, ko emi nk’eneyal’ende. 39Baomeka lakina oyuunda, koko auma en’akas’aniyo.
40Ko autwa lakina en’ili bona Yoladane, en’edye eneki Yoane oinak’ato en’oso, ko aoyala nkwaho. 41Ko bato bike baoya eneyal’ende, iy’ate, Solosolo, Yoane mene atakamb’ekambwa yoka ndembi; ohonde baoyi bahatu banaki Yoane otendaka lacin’ena boto’one bayaaki nko solosolo. 42Koko bato bike bamimedya nko meho.
Currently Selected:
Yoane 10: BBY62
Highlight
Share
Copy
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
