Yoane 18

1Eneki Yesu otendaka baoyi’ane, ende l’akili’anande baofola, baoleka isosolo ina Kedelona, ko baotua ena lisala linaliyaaki meho, ende l’akili’anande. 2Ko Yudasa onoangelaki aeyaki edye eho nkoho, lacina Yesu l’akili’anande basolonganaki meho ma-ma.

3Koko eneki Yudasa otambaka boloi bona soldats l’ona police eneyali nkanga ina toome la Bafalusi, aoya meho la bengoni ko la mwinda la bimunyi bin’ita.

4Kanga Yesu aeyaki baoyi bahatu banangilama eneyal’ende, aofola, ko amaufola, ate, Onafon’ino?

5Bamokutwela, iy’ate, Yesu ona Nazaleta. Yesu ate, Em’one. Yudasa onomoangelaka aemala l’iyo. 6Eneki’nd’oilak’oka, Em’one, iyo baoyosuma, ko baokwa ena loko. 7Koko amaufola lakina, ate, Onafon’ino? Iy’ate, Yesu ona Nazaleta. 8Yesu aamba, ate, Lokosumolak’ino, Em’one; nko bompon’emi, bocika bane bacu mboka iniyo; 9lacin’eho yoi linaliki’nd’oilaka, ate, Eneyal’iyo banak’ompaka ntungy’omoko, yilame. 10Simona Petelo, onoyaaki la lokula lon’ita, aosomola loho, ko aoka boombo bona nkanga iyome, ko aokesa litoi linande y’ome pa. Lina lina boombo’oho nko Maluko. 11Yesu aosumola Petelo, ate, Utodya lokula lone ena ntoto: ekala eneki Bafango’onami ompaka, mpamele nde eho?

12Nkwaho boloi bona soldats, la capitaine, la police ina Ba-Yuda baunda Yesu, ko bamokakela, 13ko bamotola eneyali Anasa en’oso, nko bokilo’ona Kayafa, nkanga iyome ena mbula eho. 14Kayafa ayaaki nk’ende onosumolaki Ba-Yuda, ate, Ekoli lacina boto’omoko awu lacin’ena bato bahatu.

15Koko Simona Petelo l’okili’omoi baokila Yesu; bokili’oho aeyanaki la nkanga iyome, ko ende aotua la Yesu en’otumba bona nkanga iyome. 16Koko Petelo aemala en’anza, nk’en’ofolo. Nkwaho bokili’oho oneyanaki la nkanga iyome aofola, ko aotenda l’oyoto onosendedyaki bofolo, ko aotoya Petelo. 17Nkwaho boyoto onosendedyaki bofolo aufola Petelo, ate, Ofayali nde omoi’ona bakili ban’oto’one? Ate, Ef’emi. 18Basali la police baofetsa nkoi ina baala lacin’ena lifia, ko baemala meho, kuma bayakale nkoi; ko Petelo aemala l’iyo, ko aokala nkoi.

19Koko nkanga iyome aufola Yesu biufo ena likambo lina bakili’anande la lilako linande. 20Yesu amokutwela, ate, Ntendaki baoyi en’enyanga nk’ena fololo; ndakaki bato ena sunagoga bina l’ina, ko l’en’otumba bona Yakomba bonasusaneela Ba-Yuda; ko ntatenda yoi limoko yok’ofisafisa: 21onjufol’emi lacina nai? Ofufola nd’iyo banokaki baoyi banaki’m’oasumolaka? Lenda, bane baeya baoyi banaki’m’otendaka. 22Eneki’nd’otendaka baoyi’ane, omoi ona police onemalaki meho aofoma Yesu losoola, ate, Oamba nde nkanga iyome yok’oho? 23Yesu amokutwela, ate, Yombo emi lotendaka bowe, onsumolebowe’oho; koko yomb’olotsi, ompoma la nai? 24Nkwaho Anasa amotoma eneyali Kayafa, nkanga iyome, nko ntungama. 25Simona Petelo aemala nkwaho, ayakale nkoi. Koko bamoufola, Mbo e oyali nde omoi ona bakili’anande? Aangana, ate, Ef’emi. 26Bosali’omoi bona nkanga iyome, onotwaki l’ende onoki Petelo okesaka litoi, aila, ate, Ntakeena nd’e ena lisala l’ende? 27Petelo aut’oangana; ko isasanga nkoko ena mpame eeka.

28L’okulu baumola Yesu eneyali Kayafa, ko bamotola en’otumba bona pretoire; iyoamene batatua en’otumba bona pretoire, batongofomwa nsefo, lacina baolang’oka bale elambedya en’Etelo. 29Lacin’eho, Pilato aofola eneyal’iyo, ate, Likambo lineyakol’ino boto’one lika nai? 30Iyo bamokutwela, iy’ate, Yombo atayala boto onil’owe, tumbe totolekya eneyai’e. 31Nkwaho Pilato amasumola, ate, Inoamene botambe, boyotende likambo linande yoka bosamb’onoyali basangy’anino. Koko Ba-Yuda bamosumola, Mbo iso tofan’etelo lacina toyake boto; 32nko lacina yoi linaliki Yesu otendaka, linaliki’nd’otumak’ato bokotua bon’ewedi benengi’nd’owa, yilame.

33Nkwaho Pilato aotua lakina en’otumba bona pretoire, aelela Yesu, ko amufola, ate, E oyali Lifoka lina Ba-Yuda? 34Yesu amokutwela, ate, Otenda yoi line la lokanyi loneamene, yombo bato’amoi bakosumolaki liho lacin’enami? 35Pilato aamba, Mbo emi nde nde bise Yuda? Bato ban’onyang’oneamene la nkanga ina toome baokolekyaka eneyal’emi. Omokamba yoi lika nai? 36Yesu amokutwela, ate, Lifoka linami lifayali lina loko lone: yombo lifoka linami liyaaki lina loko lone, tumbe basali’anami bamolokan’ita, ntongolekyama eneyali Ba-Yuda; ohonde lifoka linami lifayali yok’osamb’oho. 37Lacin’eho, Pilato amufola, ate, Oyali nde lifoka lina roi? Yesu aamba, ate, Nk’oho bonatend’e; mbotwaki nko la ncin’ene, ko moya ena loko nko la ncin’ene, nko lacina njalame temom ena solosolo eho. Boto l’oto onoyali ona solosolo aolofamela lofoso lonami. 38Pilato ate, Solosolo end’oya? Koko eneki’nd’otendaka yoi line, aofola lakina eneyali Ba-Yuda; ko amasumola, ate, Mpene ncina ena likambo eneyal’ende tu. 39Koko ino boata bokotu’onino lacina nkotungwel’ino boto’omoko en’esike en’e lambedya: bolanga nde nkotungwel’ino lifoka lina roi lina Ba-Yuda? 40Nkwaho baololomwa nk’iyatu, iy’ate, Ef’oto’one: otofe Balaba. Ko Balaba ayaaki boto’ona liya.

Currently Selected:

Yoane 18: BBY62

Highlight

Copy