Yoane 8

1Koko Yesu aocoa ena lingonji lina Bilaya. 2Koko l’okulu mene auta la mbusa en’otumba bona Yakomba, ko bato bahatu baoya eneyal’ende, ko aokisase, ko amalaka. 3Koko batengi ban’ekanda la Bafalusi baoy’eneyal’ende l’oyoto onok’iy’oundaka kum’ayatate likele. Bameemadya ena ntoto eniyo, 4ko baosuniola Yesu, iy’ate, Bolaki, boyoto’one amolundama nk’en’etatelo mene ena likele; 5ko Mose aotosumola ena basangya, ate toyake bato ban’okotu’one la baufe; koko e, yoi linatend’e lacin’enande nai? 6Baotenda yok’osamb’oho lacina baomeke, ko baate etelo oyakol’ende likambo. Ko Yesu aosunama, ko aomatsa litenga en’ekongo l’ikola inande. 7Koko enek’iy’okusaka yufol’ende njufola, aosunwa, ko amasumola, ate, Ende on’ino onofana bowe, aofuselake lufe lin’oso! 8Ko aut’osunama lakina, ko aotenga en’ekongo l’ikola inande. 9Enek’iy’ookaka yoi liho, baokoiyama l’etem’eniyoamene, ko baofola omok’omoko, bingambe en’oso, yengoko Yesu aocikala ende kei, l’oyotoonemali ena ntoto. 10Ko Yesu aosunwa lakina, ko aufola boyoto, ate, Boyoto, bayali meya? Efana nko le boto onokokoiyaka likambo? 11Ende ate, Nkolo, efan’oto. Koko Yesu amosumola, ate, L’emi nkoho, mpakokoiya; coaka, ko tilake bowe lakina.

12Yesu aotenda l’iyo lakina, ate, Emi nde nde Fololo en’enyanga: ononkil’emi afayakende ena liucu, angata fololo ena liiko. 13Bafalusi bamolokwela, iy’ate, E oyali temoin eneamene; yoi linatend’e lifatambamisa yoka solosolo. 14Yesu amakutwela, ate, Kanga njali temoin enamamene, yoi linatend’emi liyali nko solosolo; lacin’oka emi leya bili bonoki’m’oyaka, ko l’ili bonaco’emi; ino bofeya eneki’m’oyaka, ko bofeya enaco’emi. 15Ino bokodya l’okotua bonoyali bato: emi mpakoedy’oto baoyi tu. 16A koko, kanga lakodya baoyi, ekoedyo enami eyali nko solosolo, lacin’oka mpayali nk’emi kei: Bafango onontomaki ayali l’emi. 17O, yoi limotengama ena basangya banino, lika: Benyua bena temoins ife beyali nko solosolo. 18Emi nde nde temoin enamamene, ko Bafango onontomaki ayali temoin enami nkoho. 19Iyo bamufola, iy’ate, Bafango’one ayali meya? Yesu aokutola, ate, Ino botanjey’emi, ko boteya Bafango’onami; yombo bonjeyak’emi, tumbe beyaki Bafango’onami nkoho.

20Yesu aotenda baoyi’ane en’emonyedyo ena nganji ina Yakomba, eneki’nd’olakaka en’otumba bona Yakomba; koko efan’oto onuundaki, lacin’oka esike enande etayele.

21Amalokwela lakina, ate, Emi locoa, ko bongompona, koko bongowa en’aoyi’owe’anino; bili bonaco’emi ino bofayelisa meho. 22Lacin’eho, Ba-Yuda baila, Mbo angoyoyaka nde endamene? lacina enil’ende, ate, Bili bonaco’emi ino bofayelisa meho. 23Koko amasumola, ate, Ino boyali ban’ase, emi njaki ena liko; ino boyali bana loko lone, emi mpayali ona loko lone.

24Ncina eneki’m’okosumolak’ino oka, Bongowa en’aoyi’owe’anino, nd’eho; lacin’oka yomb’ino bofimedy’oka emi njali nk’ende, bongowa en’aoyi’owe’anino. 25Iyo bamufola, Mbo e, oyali nai? Yesu amasumola, ate, Emi nk’ende onoki’m’okosumolaka ena limatsako.

26Njali l’aoyi bike lacina nkosumol’ino ko nkodya lacin’enino. Ohonde onontomaki ayali solosolo, ko lasumola baise loko baoyi banaki’m’ookaka eneyal’ende. 27Iyo batafokol’oka aotenda l’iyo lacin’ena Bafango. 28Lacin’eho, Yesu amasumola, ate, Eneng’in’oiledya Bon’on’oto, bongey’oka emi njali nk’ende, ko mpakambe yoi limoko l’emamene: yok’onoki Bafango’onami ondakaka, latenda nko baoyi’ako. 29Ko ende onontomaki, ayali l’emi: Bafango atancika emi kei, lacina bina l’ina lakambeela nko baoyi’aho banimedy’ende bolotsi. 30Enem’end’otenda baoyi’ane, bato bike bamimedya.

31Ko Yesu aosumola Ba-Yuda banomimedyaka, ate, Yomb’ino boyaela en’aoyi’anami, boyali bakili’anami solosolo; 32ko bongeya solosolo, ko solosolo eho engokotungol’ino. 33Bamokutwela, iy’ate, Iso toyali ban’ana Abalayama, ko bisike l’isike totayala baombo ban’oto tu: iya, enil’e oka, Bongotungwa? 34Yesu amautodya, ate, Solosolo, solosolo, lakosumol’ino, boto l’oto onil’owe ayali boombo’on’owe; 35koko boombo afayale en’otumba nko njalama: bona kongoyali en’otumba nko njalama. 36Lacin’eho, nko Bona akotungol’ino, bongotungwa nko ntungwa mene. 37Emi ley’oka boyali ban’ana Abalayama; ohonde boyafone lacina bonjake, nko lacina yoi linami lifan’etelo en’etem’enino. 38Emi latenda baoyi banaki’m’oenaka l’afango’onami; ino bokamba nko baoyi banak’in’ookaka eneyali bafango’onino. 39Baokutola, iy’ate, Bafango’oniso oka Abalayama. Yesu amasumola, ate, Yomb’ino boyali ban’ana Abalayama, tumbe boyakambe bikambwa bina Abalayama; 40ohonde isanga boyafone lacina bonjake, emi boto onokosumolak’ino baoyi bana solosolo, banaki’m’ookaka eneyali Yakomba. Abalayama atakamba yok’osamb’oko. 41Ino bokamba bikambwa bin’afango’onino. Iyo bamolokwela, Mbo iso tototwa ena likele: toyali l’afango’oniso nk’omoko, nko Yakomba. 42Yesu amasumola, ate, Yombo Yakomba ayali Bafango’onino, tumbe bonjok’emi nganji, lacin’oka emi mpolaki eneyali Yakomba, ko loyaka nk’eneyal’ende: ntaya l’eango enamamene, ende kongontomaki. 43Ncina enefanongany’ino etendelo enami eka nai? Nk’enefiny’ino lilofamela baoyi’anami. 44Ino boyali ban’ana bafango’onino oka Satana, ko bolanga lacina bile mposa ina bafango’onino. Ende ayaaki boyaki bon’ato nk’ena limatsako, ko atemala ena solosolo, lacina solosolo efayali eneyal’ende tutu. Enatend’ende mpoci, atenda nko baoyi’anandamene; lacin’oka ayali bofoci bona mpoci, ko ayali bafango’ona mpoci ihatu. 45Koko ino bofanjimedya, lacin’emi latenda nko baoyi bana solosolo. 46Boto’onino onombakol’emi likambo lin’owe ayali meya? Koko yombo latenda baoyi bana solosolo, bofanjimedya lacina nai? 47Ende onoyali ona Yakomba, aokeela baoyi bana Yakomba; ino bofoke baoyi’aho, lacin’oka ino bofayali bana Yakomba. 48Ba-Yuda bamokutwela, Mbo iso totila nde solosolo, enek’is’oilak’oka onde bise Samalia, ko oyali la demona? 49Yesu aamba, ate, Emi mpana demona: emi lafika Bafango’onami, koko ino bontembol’emi. 50Koko mpafone lokumo lonamamene: omoi ayali onoyafone, ko ayakodya baoyi. 51Solosolo, solosolo, lakosumol’ino, Yomb’oto amonya yoi linami, afayen’ewedi tu. 52Nkwaho Ba-Yuda bamosumola, Mbo isanga tey’oka oyali la demona. Abalayama awaki, ko basumoli bawaki; koko e oila, ate, Yomb’oto amonya yoi linami afayen’ewedi tu. 53Iya, oleki nde Abalayama bafango’oniso, onowaki? la basumoli, banawaki? Oyoil’eamene nai? 54Yesu aokutola, ate, Yomb’emi layokumy’emamene, lokumo lonami loyali nko bototoloto: Bafango’onami kongonkumy’emi, nk’ende onil’ino oka ayali Bafango’onino. 55Ino boteey’ende: emi kongoey’ende; ko yomb’emi lil’oka, Mpey’ende, tumbe nongoyala bofoci’ona mpoci, yok’ino. Ohonde lomeeya, ko lamonya yoi linande. 56Bafango’onino Abalayama anyangelaki la lolengedyo lacina aene bina bonami: aenaki boho, ko aonyangela. 57Ba-Yuda bamosumola, Mbo e otakwa mbula ntuku itano, ko amena Abalayama? 58Yesu amasumola, ate, Kuma Abalayama atotwa, emi njali. 59Nkwaho baambola baufe lacina baofusele; koko Yesu aoyofisa, ko aofola en’otumba bona Yakomba.

Currently Selected:

Yoane 8: BBY62

Highlight

Copy