Luka 10
10
1Ena mbusa en’aoyi’ane, Nkolo aosona bato’amoi ntuku nsambo, ko amatoma bafe’afe en’oso’onande, bacu en’enyanga l’enyanga ko l’en’ili l’ili beneng’endamene oya linga. 2Ko amasumola, ate, Enukelo emosokwa solosolo, ohonde basali bafan’ike; lacin’eho, boonda Nkolo en’enukelo, atome basali en’enukelo enande. 3Bocoaka; lenda, lakotom’ino yoka ban’ana mpate ena ntoto ena nkoi. 4Botatolake bofalusi la ntombe la tombwaku; ko botesake boto ena mboka. 5Ko en’otumba bon’etaketaka bonatu’ino, botenda en’oso, Mbo mwi eneyali botumb’one. 6Ko yombo bon’ona mwi ayali meho, mwi enino engoyala nk’eneyal’ende; ohonde yomb’efa yok’oho, mwi eho enguta nk’eneyal’ino. 7Ko boyalamaka en’otumb’oho, bola ko bomela toma tatong’iy’okofa; lacin’oka bokambi bon’ekambwa akoli nko la mpuci enande. Botaselaselake en’etumba l’etumba. 8Ko en’onyanga l’onyanga bonatu’ino, ko bakosangel’ino, bolaka toma tatong’iy’okambedya; 9bikya bato banayali la nkangi en’onyang’oho, ko basumole, in’ate, Lifoka lina Yakomba limololama l’ino. 10Koko en’onyanga l’onyanga bonatu’ino, ko bafakosangel’ino, bofolaka ena mboka ina bonyang’oho, ko bila, in’ate, 11Iso tokotitwel’ino nko le lofucifuci lona bonyang’onino loneloakama en’akak’aniso; ohonde beyaka yoi line, lifoka lina Yakomba limololama. 12Lakosumol’ino, ekoiyelo en’onyang’oho en’in’oho engoleka ekoiyelo ena Sodomo. 13Bino eneyal’e, Kolazina I Bino eneyal’e, Betesaida! Yombo bikambwa bina mpefa binokambamaka eneyal’ino bi kambamaki’ale ena Tula la Sidona, tumbe baumbelaki baoyi’owe alale, nko nkisase en’enuko l’etoko. 14Ohonde en’ina bon’etendelo en’akambo, ekoiyelo enino engoleka ekoiyelo ena Tula la Sidona. 15Koko e, Kapalanauma, osokoiledyama nde ena loola? Ongokitsama ena Adese. 16Ende onongokolofamel’ino, andofamela nk’emi; ko onongokotembol’ino, antembol’emi; ko onongontembol’emi, atembola nk’ende onontomaki.
17Ko iyo ntuku nsambo bauta l’ekiko, iy’ate, Nkolo, le bademona mene baotofika ena lina line. 18Ko amasumola, ate, Emi lenaka Satana aokwa ena loola yoka lihalihali. 19Lenda, lokof’ino mpamba lacina bikamele njua ko la toandika, ko bikamele locili lohalotu lona bookyi’owe; efaate iyema iningokiil’ino bowe tu. 20Ohonde botanyangelake lacin’oka bademona bakofik’ino: bonyangela lacin’oka bain’anino bamotengama ena loola.
21En’esik’eho Yesu aonyangela la Bolimo bon’olotsi, ko aila, ate, Lakokumy’e, Bafango, Nkolo ena loola l’ena loko, lacin’oka ofiselaki bato bana bomwu l’ana nnonganya baoyi’ane, ko ofiswelaki banatome baho; nkoho, Bafa, lacina oimedyaki bokotu’oho bolotsi. 22Baoyi bahatu bamompam’emi l’afango’onami, ko efan’oto oneya Bona, yengoko Bafango kei; ko efan’oto oneya Bafango, yengoko Bona, la boto onongi Bona olanga oyeyany’ende. 23Ko aohelengwa eneyali bakili, amasumola ena lokuko, ate, Baiso banena bikambwa binen’ino baosakelama bosako. 24Lakosumol’ino, basumoli bike l’afoka bike balangaki’oka baene bikambwa binen’ino, ko iyo batena; ko balangaki lacina baoke baoyi banok’ino, ko batoka.
25Ko lenda, bosakitoli’omoi bona basangya aemala, aomeka Yesu la bufo, ate, Bolaki, njil’oya lacina nsangole liiko lonelofakale? 26Ko amosumola, ate, Yoi linalitengi en’asangya liyali’oya? oanda yoi lika nai meho? 27Boto’oho amokutwela, ate, Oka Yawe Yakomba ene nganji l’otem’one bohotu, ko l’olimo’one bohotu, ko la locili lone lohalotu, ko la lokanyi lone lohalotu; ko oka onoli l’e nganji yoka bosamb’onayook’e eamene nganji. 28Yesu ate, Omokutola nko cilili; Ila nk’oko, ko ongika. 29Ohonde aolang’oka ayolongy’endamene, ko aila Yesu, ate, Onoli l’emi vo, ende nai? 30Yesu amokutwela, ate, Boto’omoi auma ena Yelusalema ko aokita ena Yeliko; ko enem’end’ocoa, aukana la baiya ban’esefo; iyo bamokumola bisenda, bamofoma mpomi, ko baocoa, bamocika kum’aolama l’ewedi. 31Ko noka, nkang’emoi aocoa mboka eho; ko eneki’nd’oenak’ende, amofengola en’ili bona mboka. 32Nk’osamb’oho boto’omoi ona Lewi, eneki’nd’oyelaka en’edye eho, ko ameena, amofengola en’ili bona mboka. 33Ohonde boto’omoi ona Samalia, enem’end’ocoa bokita, aoyela en’edye eneki’nd’oyalaka, ko ameena, ko amookamel’isei, 34ko aoya eneyal’ende, aokakela mpota inande l’esenda kum’ayutele bauta la vina ena mpota; amotadya ena mpunda enandamene, amoyedya en’otumba bona befenda, ko amomonya bolotsi. 35En’ina bona loi aofodya deniers ife, ko aofa mene’otumba, ate, Omonyaka bolotsi; ko yombo okafa francs imoi ena liko, nongokoutody’iho enengi’m’outa. 36L’iy’asaso, boto onakanel’e oka aolamaki l’ende onukanaki l’aiya ban’esefo oka nai? 37Ate, Ende onookak’isei. Yesu amosumola, ate, Coaka oyile nkoho.
38Enem’iy’okenda, aotua en’onyang’omoi; ko boyoto’omoi, lina linande Malata, amosangela en’otumb’onande. 39Ende ayaaki l’akune oka Malia, onokisak’ase en’akaka bana Yesu lacina alofamele baoyi banande. 40Koko Malata aokandakanda l’ekambelo bike; ko aoya eneyal’ende, ate, Nkolo, ofakanela nde bakune’onami amoncika lacina nkambe bikambwa bine nk’emi kei? Osumole ankambya. 41Koko Yesu amokutwela, ate, Malata, Malata, okandakanda ko oseki likanela baoyi bike; 42nde, yoi yinda nko limoko; ko Malia amosona liondo liho lin’olotsi, ko afakumolama liho.
Currently Selected:
Luka 10: BBY62
Highlight
Share
Copy
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
