Luka 13
13
1Bato’amoi banayaaki meho en’esik’eho bamosumola yoi lina baise Ngalilaya, banaki Pilato osanganyaka bakil’aniyo la mbeka iniyo. 2Koko Yesu amakutwela, ate, Bokanela nde baise Ngalilaya bane baleki baise Ngalilaya bahatu la bowe, lacina enek’iy’oenaka bino bina baoyi’ane? 3Lakosumol’ino, Efana; koko yomb’ino bofayosume en’aoyi’owe, ino bongehyama nk’osamb’oho. 4Koko bato’aho jo l’anei banaki botumba bon’oliko okwelaka ena Siloma, ko bomayaka tutu: bokanela nde iyo bayaaki bakambi ban’owe banaleki bato bahatu banatonga ena Yelusalema? 5Lakosumol’ino, Efana; koko yomb’ino bofayosume en’aoyi’owe, ino bongehyama nk’osamb’oho.
6Ko amasumola ekolanya ene: Boto’omoi aofusa bote bona liteli ena lisala linande lina bekoli bena vina; ko aoy’ofona bemamo ben’ote’oho, koko atasungya tu. 7Ko aosumola botombanyi bona bekoli bena vina, ate, Lenda, ina mbul’ine isaso loya ofona bemamo en’ote’one bona liteli, koko ntasungya tu; okote: boho behya lisala la nkaka lacina nai? 8Botombanyi amokutwela, ate, Nkolo, ocike mbul’ene kei, njocimele bekongo, ko njofusele toi meho; 9nk’en’oka bongota bemamo, bolotsi; ohonde nk’en’oka bofotaki bemamo, ombolokota.
10En’ina bona Sabata aolak’ato ena sunagoga emoi. 11Ko lenda, boyoto’omoi ayaaki meho onoyaaki la lifoi lina nkangi mbula jo la mbula mwambi; ko aosunama, ko atemalisa cilili tutu. 12Ko eneki Yesu oenak’ende, ameelela, amila, ate, Boyoto, omotungwa ena nkangi ene. 13Ko aotadya bakasa eneyali ende, ko isasanga aonanwa cilili, ko aokumya Yakomba. 14Ko chef ena sunagoga aolemwa, lacin’eneki Yesu oikyak’oto en’ina bona Sabata; aolokwela bato’aho bik’ike, ate, Bekol’otoa beyali benekoli l’iso lacina tosale; boyak’oyika en’ina beho, ef’en’ina bona Sabata. 15Koko Nkolo amokutwela, ate, Ino besimo! boto l’oto’onino afatungole ngombo enande yombo mpunda enande ena etenyi enal’eho toma, ko aotol’eho ena lose oyofa basi, nk’en’ina bona Sabata? 16Iya boyoto’one, bon’ona Abalayama, onoki Satana otungyaka mbula jo la mbula mwambi: atakolana nde litungwa en’etungamelo ene en’ina bona Satana? 17Ko enem’end’otenda baoyi’ane, baokyi’owe’anande bahatu baoka nsoi; ko bato’amoi bahatu baonyangela lacin’ena bikambwa bin’okolo binikambamaki l’ende.
18Koko aila, ate, Lifoka lina Yakomba yakolana la nai? nsokokolanya liho la nai? 19Yakolana la boona bona sinapi, bonoki boto’omoi otambaka, ko aofusa ena lisala linande; ko boho bomela, ko boyalama bote bon’okolo, ko mpulu ina liko yomotama ena bitange bin’ote’oho. 20Ko aila lakina, ate, Nongokolanya lifoka lina Yakomba la nai? 21Yakolana la nyango ena mampa eneki boyoto otambaka, ko aofisa ena ntundulu ena farine bike, yoka kilos isaso, yengoko mampa ehatu eosangwa la nyango eho.
22Ko aotianya benyanga l’enyanga, bicimo l’icimo, kum’ayalake lilako, ko ayacu bokita ena Yelusalema. 23Ko boto’omoi amufola, ate, Nkolo, iy’anika bafayali nde nk’eyoka bafan’ike? Ko amasumola, ate, 24Bofonaka la locili lacina botua en’ofolo bona nkaka; lacin’oka lakosumol’ino, bato bike bangolanga lacina batua, koko bafaataki etuelo. 25Enengi mene’otumba oemala, ko aokomba lokombo, ko ino bomatsa yemala ena mbiolo, ko bofomela lokombo, Mbo Nkolo, Nkolo, otokombwele lokombo, ko angokokutwel’ino, ate, Mpe ya enek’in’oyaka. 26Bongomatsa oyila, in’ate, Tolaki toma, ko tomelaki en’oso’one, ko e olakaki ena mboka iniso; 27ko ende angokutola, ate, Lakosumol’ino, mpeya enek’in’oyaka; buma eneyal’emi, inatu bakambi ban’owe. 28Eneng’in’oena Abalayama, la Isaka, la Yakobo, ko la basumoli bahatu, ena lifoka lina Yakomba, koko inoamene bofodyama en’anza, bilelo bina mposoli la nkenyanya en’aino bangoyala meho. 29Ko bato bangoya en’ili bona Est la Ouest, ko l’ena Nord la Sud, ko bangokisase ena lifoka lina Yakomba. 30Ko lenda, bato’amoi banayali ena mbusa bangoyala en’oso, ko bakina banayali en’oso bangoyala en’otungu.
31En’in’oho bafalusi bamoi baoya, bamosumola, iy’ate, Uma mendo, coaka mboka ene, lacin’oka Elode alanga akoyake. 32Koko amasumola, ate, Bocoaka, boyosumole bombang’oko, Mbo lenda, lafodya bafoi, ko liky’ato ena nkangi bon’in’one la loi, ko en’ina bon’esaso locindedya. 33Ohonde akoli eneyal’emi nkile bokita bonami bon’in’one la loi la bina bon’esaso; lacina efaonge’oka bosumoli awu ena mbiolo ena Yelusalema. 34O, Yelusalema, Yelusalema, onoyakeela basumoli, ko onofusel’iy’anatomama eneyal’e baufe, nsokolanga nsusanya ban’ane ma-ma, yoka bosamb’onasusanya nkoko baas’anande en’ase ban’afafu’anande, ko ino botalanga! 35Lenda, botumb’onino bociki eneyal’ino la bolengelenge; lacina emi lakosumol’ino, Bofanjenaki lakina, yengoko eneng’in’oila, Onoyayi ena lina lina Yawe aosakelama bosako.
Currently Selected:
Luka 13: BBY62
Highlight
Share
Copy
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
