Luka 15
15
1Basusanyi bana mpuci bahatu la bato ban’owe baolamel’ende lacina balofe baoyi’anande. 2Ko Ba falusi l’atengi ban’ekanda baoninganinga, Mbo boto’one asangela bato ban’owe, ko ala toma l’iyo.
3Ko amalokwela l’ekolanya, ate, 4Nko boto’onino ayali la mpate bokama, ko emoko eunga, afacike mpate ntuk’ibwa la mpate ibwa ena sengelenge, ko aocoa ofona eho enungaki, yengoko aen’eho? 5Ko enen’ende mpate eho, aotady’eho en’asoko’anande, ko aonyangela. 6Ko enut’ende en’ola, aelela bifili binande ko l’iy’anoli l’ende, ate, Bonyangela l’emi, lacin’oka mena mpate enami enungaki. 7Lakosumol’ino, Nk’osamb’oho ekiko engoyala ena loola lacin’ena boto’omoko on’owe onumbela baoyi’owe, eneleki ekiko enok’iyo lacin’en’ato ntuk’ibwa l’ato ibwa bana mbongi banafinde eumbelo en’aoyi’owe.
8Nk’en’oka boyoto’omoi ayali la francs jo, ko aungya emoi, afafetsa nde mwinda, aomb’otumba, ko afona nko mpona yengoko aen’eho? 9Ko enen’ende eho, aelela bifili binande bin’ayato ko l’iy’anoli l’ende, ate, Bonyangela l’emi, lacin’oka mena franc eneki’m’oungyaka. 10Nk’osamb’oho, lakosumol’ino, ekiko eyali eneka bikima bina Yakomba lacin’en’oto’omoko on’owe onumbela baoyi’owe.
11Ko aila, ate, Boto’omoi ayaaki l’an’afe bana mpame. 12Ko bon’ona mbusa aosumola bafango’onande, ate, Bafa, ompe liondo lina toma tone linalingi’m’osangol’olo. Ko amakafela lituka linande. 13Efan’olingolingo ena mbus’eho, bon’ona mbusa aosusanya toma tonande tohatotu, ko aocoa bokita en’onyanga bon’osana mene; ko aofalangasanya toma tonande tohatotu la baoyi bana loyenge mene. 14Ko eneki’nd’okadyaka likafa toma tohatotu, loci lona njala lona lokolo mene lokwela bonyang’oho; ko aomatsa yelingitana. 15Ko aocoa oyambana l’oto’omoi, bise bonyang’oho; ko ende amotoma ena basala banande oleya nsombo toma. 16Ko aolanga lacina akinza botem’onande liota la mposo iniki nsombo olaka; ko etaata nko le boto onofaki iyema ina ndaka. 17Koko eneki lokanyi lonande outaka eneyal’ende, ate, Basali ban’afango’onami bike vo, bala toma tonatokolana l’iyo, ko em’onawa la njala nko mbwaka. 18Nonge mala, ko nongocoa eneyali bafango’onami, ko nongosumola, emite, Bafa, molehya baoyi bana loola, ko mil’owe en’aiso’ane; 19mpakoli lacina ntangame lakina bon’one; ontambe yoka bosali’one. 20Ko aemala, ko aocoa eneyali bafango’onande. Ohonde, kum’ayali en’osana mene, bafango’onande ameena, amookamel’isei, aocoa la laango, ko amokwela ena nkingo, ko amosangela la belumba. 21Koko bona amolokwela, ate, Bafa, mofulunganya baoyi bana loola, ko mil’owe en’aiso’ane; mpakoli lacina ntangame lakina bon’one. 22Ohonde bafango aosumola baombo’anande, ate, Boyaka l’okoto bonoleki’olotsi yaya, ko bolots’ende; ko bila lofete ena likasa linande, ko la tombwaku en’akak’anande; 23ko boyaka l’on’ona ngombo on’itamo, ko boyake, lacina tole, ko tonyangele; 24lacin’oka bon’onami’one awaki, ko ayaike lakina; aungaki, ko amenya. Ko baomatsa linyangela. 25Koko bon’onande ona ngolo ayaaki ena lisala; ko eneki’nd’oyaka, ko aolama l’otumba, aoka nkombi mpoma, ko l’ato bayine biina. 26Ko aelela bofeng’omoi, ko amufola ncina en’aoyi’ako banayilama. 27Ko amosumola, ate, Bakune’one amoya; ko bafango’one amoyaka bon’ona ngombo on’itamo, lacin’oka amolotamba kum’ayakike. 28Ohonde aolemwa, ko atalanga ntuaka ena ntundulu. Koko bafango’onande aofola, ko amoonda. 29Koko ende aokutola, aosumola bafango, ate, Lenda, ina mbul’ine bik’ike mokosaela, ko ntafedya lotomo lone lomoko tu; ohonde otampe nko l’itanta lacina nyangele enyanga l’ifili’inami; 30koko eneki bon’one’one oyaka, onofanzafanzaki lituka line l’ayato bana lisamba, omoyakelaka bon’ona ngombo on itamo. 31Bafango amosumola, ate, Bona, oyali nko l’emi bisike bihitu, ko toma tonami tohatotu toyali nko tone. 32Koko akoli eneyal’iso tokik’ekiko ko tonyangel’enyanga; lacin’oka bakune’one awaki, ko ayaike lakina; aungaki, ko amenya.
Currently Selected:
Luka 15: BBY62
Highlight
Share
Copy
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
