Luka 17
17
1Ko Yesu aosumola bakili’anande, ate, Solosolo bipusumwelo bingoya; ohonde bino eneyali bolo’oho onoyedya biho! 2Bolotsi eneyal’ende lacina balite lufe lina likolo (linaminyaminy’iyo basongu) ena nkingo enande, ko baofuse ena lose l’okwa, atopusumodya omoi ona bane bana tosalisali. 3Boyotombanyak’inoamene. Yombo efili ene akilel’e bowe, ofele lofeli; ko yombo ayokanya, oikya ena yoi liho. 4Ko yombo akilel’e bowe beila nsambo bin’omoko, ko auta eneyal’e beuta nsambo, ko aila, ate, Layokanya, oikya en’aoyi’aho.
5Ko bikima baosumola Nkolo, iy’ate, Otofuedya imeedyo. 6Ko Nkolo ate, Yomb’ino boyali l’imeedyo yoka boona bona sinapi kei, tumbe bongosumola bote’one bona sukamino, in’ate, Luwaka, ko fusamaka ena lose l’okwa; ko boho bongokimedy’ino. 7Yombo boto’onino aata boombo, ko boombo’oho acima bekongo ena lisala, yombo atombanya mpate, enaya boombo ena lisala, angosumola nde, ate, Yak’okisase, oyole toma? 8Afosumole nde, ate, Ompumbele toma njole, lit’okoli’one, ko onsaele, njole ko njomele, koko eamene ongola ko ongomela ena mbusa? 9Enakamba boombo’oho nko bikambwa biniki’nd’otomamaka, nyangetuke enande amofa nde merci bike? Efana. 10Nk’osamb’oho l’ino, enakady’ino likamba bikambwa bihitu binik’in’otomamaka, bila, in’ate, Toyali nko baombo kei: tomokamba nko bikambwa binik’is’otomamaka kei.
11Ko enek’iy’ocoaka ena Yelusalema, aotianya benyanga bena Samalia la Ngalilaya. 12Ko enem’end’otua en’onyang’omoi, bato jo ban’aise nkangi en’okenge baukana l’ende, baemali en’osana; 13ko baololua, iy’ate, Yesu, Nkolo, otokamel’isei. 14Ko eneki’nd’aenaka, amasumola, ate, Bocoaka, boyotume nkanga baonge’anino. Nk’enem’iy’ocoa, baokulwa. 15Ko eneki omoko’oniyo oenak’oka amolika, auta la mbusa, ko aokumya Yakomba la lofoso lona lokolo; 16aokwa en’elongi enande en’akaka bana Yesu, ko amoambela merci; ko ende ayaaki bise Samalia. 17Ko Yesu amokutwela, ate, Bato jo batakulwa nde? Iya bakin’ibwa, bayali meya? 18Efana nko le boto onuta okumya Yakomba, umola nko bofenda bone kei? 19Ko amosumola, ate, Emala, coaka mboka ene; imeedyo ine imokiikya.
20Ko eneki Bafalusi oufolak’ende esike en’eyelo ena lifoka lina Yakomba, amakutwela, ate, Lifoka lina Yakomba lifaye la ntakamela l’aiso; 21ko bafilaki, Mbo lenda mendo! la Lenda mei! lacin’oka lifoka lina Yakomba liyali nk’ena ntoto enino.
22Ko aosumola bakili’anande, ate, Bina bengoya beneng’in’olanga lacina bene bin’omoko bona Bon’on’oto, ko bofenaki boho. 23Ko bangokosumol’ino, Lenda mei! Lenda mendo! botacoake, botimedyake. 24Yoka bosamb’onaala lihalihali en’ili’omoi en’ase bana loola, ko yololoma nk’en’ili’okina en’ase bana loola, Bon’on’oto angoyala nk’osamb’oho en’ina bonande. 25Koko angen’ino la baoyi bike en’oso, ko angotembolama l’ato ban’eotwelo ene. 26Yok’onoki baoyi okambamaka en’ina beneki Noa oyalaka, baoyi bangokambama en’ina bena Bon’on’oto nk’osamb’oho. 27Balaki toma, bamelaki, basonganaki, ko balekyamaki ena liala, yengoko bina bonoki Noa otalamaka en’atu, ko efela eoya, ko emayaka nk’iyatu. 28Yok’onoki baoyi okambamaka en’esike ena Loto nkoho: balaki toma, bamelaki, basombaki, batekyaki, bafusaki beona, bafakaki betumba; 29koko en’ina bonoki Loto oumaka ena Sodomo mbula ena nkoi la befaka eolwa ena loola, ko emayaka nk’iyatu. 30Engoyala nk’osamb’oho en’ina bonongi Bon’on’oto oenya. 31En’in’oho, ende onoyali ena liko lina nsamba en’otumb’onande, ko toma tonande tociki en’otumba, atakitake oyumola toho; ko l’ende onoyali ena lisala, atutake la mbusa. 32Bokanedyaka booli’ona Loto. 33Boto on’etaketaka onofona lacina aundamele liiko lonandamene, angungya loho; ko onongungya liiko lonande angomonya nko loho. 34Lakosumol’ino, L’oco’oho mpame ife bangetama ena ntang emoko; omoi angotolama, ko okina angocikala. 35Bayato’afe bangominyaminya basongu laanda en’edye emoko; omoi angotolama, ko okina angocika’a. 36(Mpame ife bangoyala ena lisala; omoi angotolama, ko okina angocikala.) 37Iyo bamufola, iy’ate, Nkolo, bili’oya? Ende ate, Enambi boduo, mponongoli ingosusana nko meho.
Currently Selected:
Luka 17: BBY62
Highlight
Share
Copy
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
