Luka 19

1Koko Yesu aotua ena Yeliko, ko aofolanya. 2Ko lenda, boto’omoi ayaaki meho, lina linande Zakayo, onoyaaki chef ena basusanyi bana mpuci, ko ayaaki ntuki mene ena toma. 3Ende aofona lacina aene bokotua bona Yesu; ko atinya, lacin’en’ekami en’ato, lacin’oka ende ayaaki buhe. 4Ko aocoa en’oso la laango, ko ailela en’ote bona sukamino oyeena, lacina Yesu asokoeta ena mbok’eho. 5Eneki Yesu oyelaka en’edye eho, aenol’aiso ena liko, ameena, ko amosumola, ate, Zakayo, kita yaya, lacin’emi nongoyala en’otumb’one bon’in’one. 6Ko ende aokita la mbango, ko amosangela l’enyanga. 7Ko eneki bato oenaka yoi liho, iyatu baoninganinga, Mbo amocoa okisase l’oto’on’owe. 8Koko Zakayo aemala, ko aolokwela Nkolo, ate, Lenda, Nkolo, lokafela bato biinda etenyi ena toma tonami, ko yombo nkumolaki boto iyema l’esefo, lomuutodya toma tonei tonei. 9Ko Yesu amosumola, ate, Bon’in’one liiko lomoya en’otumb’one; lacin’ende nkoho ande bon’ona Abalayama. 10Lacin’oka Bon’on’oto ayaki lacina afone ko aikya banungaki. 11Enem’iy’oka baoyi’ane, ait’otenda lakina l’eko lanya, lacin’oka aolamaki la Yelusalema, ko iyo bakanelaki’oka lifoka lina Yakomba lingenya nk’isasanga. 12Lacin’eho, ate, Lifoka limoi aocoa bokita en’onyanga bon’osana lacina atambe lifoka linande ko aute. 13Ko aelela baombo’anande jo, ko amacikela mmina jo, ate, Bokitanyaka nkita l’osolo’one yengoko enengi’m’oya. 14Koko bato’anande bamook’owe, ko bamotomela bikima, iy’ate, Tofalange boto’one ayalame lifoka liniso lina roi. 15Ko eneki’nd’otambaka lifoka, ko auta, aotoma bonyua lacina baelele baombo’aho banaki’nd’ocikelaka bosolo eneyal’ende, lacina aeye nkita enek’iy’okitanyaka. 16On’oso aoya en’oso’onande, aila, ate, Nkolo, lomina lone lomolata ikina mmina jo. 17Amosumola, ate, Oho nk’olotsi, e boombo’on’olotsi; lacin’enek’okambaka bolotsi ena yoi lin’isisali mene, ongotamba lifoka lina benyanga jo. 18Ko boombo’on’afe aoya, ate, Nkolo, lomina lone lomolata nko minina itano. 19Ko amosumola, ate, E nkoho, ongata lifoka lina benyang’etano. 20Koko okina aoya, ate, Nkolo, ndaka lomina lone loneloki’m’omonyaka en’itambala; 21lacin’oka lokoangak’e, lacina onde boto’ona bongeno; oambola enetaamby’e, ko onuka enetafus’e. 22Koko amosumola, ate, E boombo’on’owe! nongokotendel’e likambo nko l’onyua’oneamene. Oeyaki’oka nde nde boto’ona bongeno, lambola enetaamby’emi, ko lanuka enetafus’emi; 23iya, otila bosolo’onam ena banque lacina nai, lacina en’eyelo enami ntambe boho ko la nkita ena banque? 24Ko aosumol’iy’anemali meho, ate, Bokumole lomina loho, ko bofak’ende onoyali la mmina jo. 25Iy’ate, Nkolo, ayali la mmina jo. 26Emi lakosumol’ino, bamoi bangofama boto l’oto onata; koko bangokumol’ende onofaate nko boho bonosokoat’ende. 27Ohonde baokyi’owe’anami banafalange’oka njalame lifoka liniyo lina roi, boyaka l’iyo mendo, ko bayake nko tu en’oso’onami.

28Ko eneki’nd’otendaka yok’osamb’oho, aeta en’oso, aocoa nk’ena Yelusalema.

29Ko eneki’nd’oolamaka la Betefange la Betania, ena lingonji lina Bilaya, aotoma bakili anande bafe, 30ate, Bocoaka en’onyanga en’ili’onyi; ko eneng’in’o tua meho, bongosungya bon’ona mpunda, etungi, enetatalame boto; botungole, ko boyaka l’eho. 31Ko yomb’oto akufola, ate, Botungola mpunda lacina nai? bongokutwela, Mbo Nkolo alanga mpund’ene. 32Ko iyo banatomamaki baocoa, ko baosungya yok’onoki’nd’asumolaka. 33Ko enem’iy’otungola bon’ona mpunda, bamene mpunda bamaufola, Mbo ino botungola bon’ona mpunda lacina nai? 34Iy’ate, Nkolo alanga mpunda ene. 35Ko baoya l’eho eneyali Yesu; ko baotadya bisenda biniyo en’okunju bona mpunda, ko baotadya Yesu ena mpunda. 36Ko enem’end’ocoa, baotanda bisenda biniyo ena mboka. 37Ko eneki’nd’oolamaka l’ekitelo ena lingonji lina Bilaya, bondongo bohotu bon’akili baomatsa linyangela, ko baokumya Yakomba la lofoso lona lokolo lacin’ena bikambwa bihitu bina locili binik’iy’oenaka, 38iy’ate, Lifoka onoyayi ena lina lina Yawe aosakelama bosako: mwi ena loola, ko la lokumo ena liko linalileki. 39Ko Bafalusi bamoi ban’ato’aho bik’ike baila, iy’ate, Bolaki, fela bakili’ane. 40Ende aokutola, ate, Lakosumol’ino, nko bane bayale mwi, le baufe mene bangololua.

41Enem’end’oolama, aena bonyanga, ko aolela la mposoli lacin’ena boho, 42ate, Yombo oeyaki en’in’one bone baoyi banasokokoatela mwi! koko isanga bamofisama en’aiso’ane. 43Lacina bina bengokofoela benengi baokyi’owe’ane okosambanya sole la bokako, ko bangokolingamela, ko bangokokombedya bekako en’ili behetu; 44ko bangokolady’e ena loko, l’e l’an’ane banayali ena ntoto ene, ko bafakocikelaki lufe limoi litali ena liko lina lufe likina; lacin’oka otanonganya esike en’esiswelo ene.

45Ko aotua en’otumba bona Yakomba, ko aomatsa lifody’iy’anasombyaki baongwa meho, 46ate, Yoi limotengama, Botumb’onami bongoyala botumba bon’oondo: ino bomil’oho esusanelo ena baiya.

47Ko aolak’ato bina l’ina en’otumba bona Yakomba. Koko nkanga ina toome l’atengi ban’ekanda la bingambe bin’ato baofon’etelo lacina baoyake; 48koko batasungy’etelo; lacin’oka bato bahatu baambana l’ende nko mbambana lacina balofamele baoyi’anande.

Currently Selected:

Luka 19: BBY62

Highlight

Copy