Luka 4

1Ko Yesu aolola la Bolimo bon’olotsi, ko auta ena Yoladane, ko aotolama l’olimo ena sengelenge, 2ko aomekama la Satana bekolo ntuk’inei. Ko ena bina beho ende atal’iyema tu; ko eneki bin’eho okalaka, aoka njala. 3Koko Satana amolokwela, ate, Yomb’oyali Bon’ona Yakomba, sumola lufe line lihalingwa nko mampa 4Ko Yesu amokutwela, ate, Yoi limotengama, Boto afaike la mampa kei. 5Ko Satana amotola ena lingonji lina litale, ko amotuma bafoka bahatu bana loko lohalotu nkwaho. 6Ko Satana amosumoia, ate, Emi nongokofa lifoka line lihalitu, ko la lokumo lona bafok’aho; lacin’oka lifoka liho limompam’emi, ko emi lafa boto onalang’emi njofe. 7Koko e, nk’ombosamel’emi, lifoka line lihalitu lingoyala nko line. 8Koko Yesu amokutwela, ate, Yoi limotengama, Kumya Yawe Yakomba ene, ko okambele nk’ende kei. 9Ko amotola ena Yelusalema, ko amilia ena liko lina botumba bona Yakomba, nk’ena nsoli; ko amosumola, ate, Yomb’oyali Bon’ona Yakomba, oyofus’eamene mendo en’ase; 10lacina yoi limotengama,

Ende angotoma bikima binande bina loola, lacina bakomonya;

11koko

Bangokotola en’akas’aniyo,

Likaka line litongofomana la lufe.

12Koko Yesu amokutwela, ate, Yoi limotengama, Tamekake Yawe Yakomba ene. 13Ko eneki Satana okadyaka nsinganya ihatu, auma eneyal’ende yengoko esike emoi.

14Koko Yesu autwa ena Ngalilaya la locili lona Bolimo; ko lokumo lonande lolinda en’enyanga beho behetu. 15Ko aolaka ena basunagoga baniyo, ko aokumyama l’iyatu.

16Ko aoya ena Nazaleta, nk’onyanga bonok’iy’oololaka; ko en’ina bopa Sabata aotua ena sunagoga, yok’onoki bokotu’onande oyalaka, ko aemala oyand’okanda. 17Ko bamosukya bokanda bona Yesaya, bosumoli; ko eneki’nd’oumbolaka bokanda, aena edye enetengama baoyi’ane:

18Bolimo bona Yawe boyali eneyal’emi,

Lacin’oka amonjokya bauta lacina nsekodya bosimo bon’olotsi eneyali bato beinda;

Amontoma lacina nsekodya bosimo bon’etungwelo eneyali basungu, Ko l’enelo eneyali banodyaki’aiso,

Ko ntungole iy’anenyama bino;

19Ko nsekodya bosimo bon’esike enetangam’olotsi la Yawe.

20Ko eneki’nd’oumbak’okanda, autodya boho eneyali bosali, ko aokisase. Ko bato bahatu banayaaki ena sunagoga bamolenda l’aiso ta: 21Ko aomatsa yasumola, ate, Bon’in’one etengelo ene emilama en’atoi’anino. 22Ko iyatu bamolofamela; ko baofefa la baoyi ban’isei banofolaka en’onyu’onande; ko baila, Mbo one afayali nde bon’ona Yosefa? 23Koko amalokwela, ate, Solosolo, ino bongonjila lisai line, Mpanji en’enganga, oyoiky’eamene: baoyi’aho banak’is’ookaka iy’ate bami lama ena Kapalanauma ilaka baho nko mendo ena bonyang’oneamene nk’osamb’oho. 24Ko ate, Solosolo, lakosumol’ino, bosumoli afakumyama en’onyang’onandamene; 25ko solosolo lakosumol’ino, bayato ban’eweli bayaaki bike ena Yisalaele, en’esike ena Eliya, eneki loola okombamaka mbula isaso la nsenza botoa, eneki loci lona njala okwelaka bonyanga bohotu; 26ohonde Eliya atatomama eneyali omoi’oniyo: atomamaki nk’ena Salepata, en’onyanga bona Sidona, eneyali boyoto’omoi onoyaaki boweli. 27Ko bato ban’ekenge bayaaki bike ena Yisalaele en’esike ena Elisa, bosumoli; koko efan’omoko’oniyo onokulwaki: onokulwaki nko Namana ona Sulia kei. 28Ko bato bahatu banayaaki ena sunagoga baolola la nkele enek’iy’ookaka baoyi’ane; 29ko baemala, ko bamofodya ena mbiolo ena bonyanga, ko bamotola ena nsoli ena lingonji linaliki bonyang’oniyo ofakamaka, lacina baofuse en’ase nko nkilimodya la nkele. 30Koko ende aofolanya ena ntoto eniyo, ko aocoa.

31Ko aokita ena Kapalanauma, ecimo emoi ena Ngalilaya, ko aolak’ato meho en’ina bona Sabata. 32Ko iyo baofefa la lilako linande, lacin’oka yoi linande liyaaki la mpamba. 33Ko boto’omoi ayaaki ena sunagoga, onoyaaki la lifoi lina nsefo; ko aololua la lofoso lona lokolo, 34ate, Cika! Iso l’e, Yesu ona Nazaleta, tond’oya? Oyaki oyoteehya. Emi mokoey’e, onde On’oeka ona Yakomba. 35Ko Yesu amofela lofeli, ate, Cika lofoso, ko fola eneyal’ende! Ko eneki demona osokodyaka ena ntoto eniyo, aofola eneyal’ende, ko atilel’ende yoi. 36Ko losomo lomakwela nk’iyatu, ko baufolana, iy’ate, Yoi line lind’oya? lacin’ende aosumola bafoi bana nsefo la lifoka ko la locili, ko baofola. 37Ko lokumo lonande lolinda en’enyang’eho behetu.

38Ko aofola ena sunagoga, ko aotua en’otumba bona Simona. Nyango en’ooli bona Simona ayaaki la nkangi en’efefe mene; ko baonda Yesu lacin’enande. 39Ko Yesu aemala eneyal’ende nko mbolama, ko aofela nkangi, ko eho emocika; ko isasanga aetwa, ko amakambela.

40Ko en’esike en’ilelo ena bina, iyatu banayaaki la bato bana nkangi ina bekotua l’ekotua, baoya l’iyo eneyal’ende; ko aotadya bakas’anande eneyali boto l’oto’oniyo, ko amaikya. 41Ko bademona baofola eneyali bato bike, kuma bayalolua, iy’ate, E onde Bon’ona Yakomba. Ko amafekya, atalanga batende tu, lacin’oka iyo baeyaki ende ayali Masiya.

42Ko eneki bina okyaka, aofola, ko aocoa en’okala bona sengelenge; ko bik’ike bon’ato bamofona, ko baoya eneyal’ende, ko basokolanga baounde, atongoyuma eneyal’iyo. 43Ohonde amasumola, ate, Akoli eneyal’emi nsekodya bosimo bon’olotsi bona lifoka lina Yakomba en’enyang’ekina nkoho, lacin’oka ncina eneki’m’otomamaka nd’eho. 44Ko aokusa lisumol’ato bosimo ena basunagoga bana Ngalilaya.

Currently Selected:

Luka 4: BBY62

Highlight

Copy