Luka 6
6
1Koko aotianya basala bana basongu en’ina bona Sabata; ko bakili’anande baonukola basongu, ko baonokola baino ban’asongu l’akasa, ko baola en’onyua. 2Koko bamoi ban’afalusi bamaufola, Mbo ino bokamba yoi linalifakoli la boeka bona Sabata ncina eka nai? 3Ko Yesu amakutwela, ate, Ino botaanda nde yoi linaliki Dawidi okambaka, eneki’nd’owaka la njala, ende l’iy’anayaaki l’ende? 4bokotua bonoki’nd’otuaka en’otumba bona Yakomba, ko aotamba ko aola mampa in’oeka, ko aof’iyo banayaaki l’ende, mampa inifalama l’ato tu, yengoko la nkanga kei? 5Ko amasumola, ate, Bon’on’oto ayali Nkolo ena Sabata.
6Koko en’in’omoi bona Sabata aotua ena sunagoga, ko aolak’ato; ko boto’omoi ayaaki meho, likasa linande y’ome yonyelala. 7Ko batengi ban’ekanda la Bafalusi bamotakamela, yombo angiikya en’ina bona Sabata; lacin’eho baakol’ende yoi. 8Koko ende aeyaki nkanyi in’etem’eniyo, ko aolokwela boto on’ise likasa lineyonyelala, ate, Emala ko yala ena ntoto. Ko aetwa ko aemala nkwaho. 9Koko Yesu amalokwela, ate, Nongokufol’ino bufo: la njila en’olotsi la njila en’owe; mbikya yombo njaka: ekambwa enekoli la boeka bona Sabata eya? 10Ko amalenda, iyatu; ko aosumola boto, ate, Nanola likasa line. Aonanola liho, ko likasa linande yiika. 11Koko iyo baolola la bolema; ko baoufolana bokotua bonong’iy’oilela Yesu yoi.
12Koko en’ina beho aocoa ena lingonji oyonda boondo; ko aokadya boco nko tu kum’ayaonde Yakomba. 13Ko eneki bina okyaka, aelela bakili’anande; ko aosona eneyal’iyo bato jo l’afe, banaki’nd’otangaka Bikima: 14Simona, onoki’nd’ofaka lina lika Petelo, la Andelo onotwaki l’ende, la Yakobo la Yoane, la Filipo la Balutolomayo, 15la Matayo la Toma, la Yakobo bon’ona Alafayo, la Simona onotangama Zelote, 16la Yuda bakune’ona Yakobo, la Yudasa bise Keliota onoangelaki. 17Ko aokita l’iyo, ko aemala en’edye ena tandala, ende la bik’ike bon’akili’a nande, ko la bik’ike bon’ato banayaki ena Yudea endotu la Yelusalema, ko l’ena Tula la Sidona banoli la lose l’okwa, bato bike banayaki lacina baolofamele ko baikyame ena nkangi iniyo; 18ko iy’anayaaki la bafoi bana nsefo baikyama. 19Ko bato’aho bik’ike baofon’etelo lacina baosuke, lacin’oka mpamba eofola eneyal’ende, ko amaiky’iyatu.
20Ko aenol’aiso’anande eneyali bakili’anande, ko aila, ate, Ino bana biinda bokik’ekiko; lacina lifoka lina Yakomba liyali nko linino. 21In’anoka njala isanga bokik’ekiko; lacin’ino bongokinda. In’analela mposoli isanga bokik’ekiko; lacin’ino bongoseka tolo. 22Yombo bato bakook’ino bowe, ko bakotembol’ino, ko bako tang’ino lotango, ko baumola lina linino yok’iyema in’owe, nko lacin’ena Bon’on’oto, ino bokik’ekiko. 23Bonyangela en’ina beho, ko bosola bendembi nko l’enyanga; lacin’oka boluko’onino bond’okolo ena loola; lacin’eneki bafango’aniyo oilelaka basumoli nko baoyi’aho. 24Koko bino eneyal’ino batuki! lacin’oka ino bomosila litamba ekikedyo enino en’otema. 25Bino eneyal’ino banakinda liota isanga! lacin’ino bongowa la njala. Bino eneyal’ino banaseka tolo isanga! lacin’ino bongokesela lokeseli, ko bongolela mposoli. 26Bino eneyal’ino, enengi bato okokumy’ino bolotsi! lacin’oka bafango’aniyo bailelaki basumoli bana mpoci nko baoyi’aho.
27Koko lakosumol’in’anandofa, Boka baokyi’owe’anino nganji, ko bokamb’olotsi eneyal’iy’anakok’ino bowe; 28bosakel’iyo banakotol’ino betoli bosako, ko boondel’iyo banakonyom’ino. 29Nko boto akofoma ena litama limoi, ohalingwele likina nkoho; ko yomb’oto akokumola bokoto bona liko, ofe boho bona ntundulu nkoho, tafedyake. 30Faka boto l’oto onokolomba; ko yomb’oto atamba toma tone, telelake toho lakina. 31Ko bokotua bonalang’ino lacina bato bakilel’ino, bilelak’iyo nk’okotu’oho. 32Yombo bato bakook’ino nganji, ko ino boka nko bato’aho nganji, boluko bonat’ino boka nai? lacin’oka le bato ban’owe baokana nganji l’iyo banaok’iyo nganji. 33Ko yombo bokambel’iyo baoyi ban’olotsi banakokambel’ino baoyi ban’olotsi, boluko bonat’ino boka nai? lacin’oka le bato ban’owe baila yok’osamb’oho. 34Ko yombo bosombya nko bato’aho banalengedy’ino oka bangokosombwela lakina, boluko bonat’ino boka nai? lacin’oka le’bato ban’owe basombyana, ko basombwelana yok’osamb’oho. 35Koko ino, bokaka baokyi’owe’anino nganji, ko bakambele bolotsi, ko bosomby’ato, efana nkanedya ena esombwelo; ko boluko’onino bongoyala bokolo, ko ino bongoyala ban’anande Onoleki nko Ndeka; lacin’ende akamba baoyi ban’isei eneyal’iyo banafoke isei ko l’eneyali bato ban’owe. 36Lacin’eho, bokak’ato isei, yoka bosamb’onoka Bafango’onino isei. 37Botakoedyake bato baoyi, ko ino bofakoedyamaki baoyi; botakoiyake bato likambo, ko ino bofakoiyamaki likambo; botungol’ato, ko ino bongotungwa. 38Bofaka, ko engofama eneyal’ino: bangokof’ino ena ntolo enino lelelo lon’olotsi, lonelonyetama, lonelofukusama, ko lonelofukumwa. Lacin’iyo bangokeeledy’ino nko la lelelo lonelok’in’oeledyaka.
39Ko amasumola ekolanya, ate, Onody’aiso alondisa nde okina onody’aiso? bafakwaki nk’iy’afe ena lifoku? 40Bokili afaleki bolaki’onande; ohonde boto l’oto, enengi’nd’oongyama, angoyala yoka bosambo bonoyali bolaki’onande. 41Koko olenda lofumbwu loneloyali ena liso lin’efili ene, koko ofakanele botondo bonoyali ena liso lineamene lacina nai? 42Iya, osumola efili ene, ate, Tike, mango, nkofoedya lofumbwu loneloyali ena liso line, kum’eamene ofene botondo bonoyali ena liso lineamene, bosamb’oya? E bosimo, fodya botondo bonoyali ena liso lineamene boso, nkwaho ongena fololo lacina ofodya lofumbwu loneloyali ena liso lin’efili ene. 43Lacina efaate bote bon’olotsi bonota bemamo ben’owe, ko efaate bote bon’owe bonota bemamo ben olotsi. 44Lacin’oka bote l’ote beyana nko l’emamo benandamene: bato bafanuke bateli ena bafengolankoi, ko bafanuke bemamo ben’ekoli bena vina nk’ena beenge. 45Boto’on’olotsi afodya yoi lin’olotsi ena lituka lin’aoyi ban’olotsi lin’otem’onande; ko boto’on’owe afodya yoi lin’owe ena lituka lin’aoyi ban’owe lin’otem’onande: lacina bonyua botenda nk’en’efulelo en’otema.
46Ko bombelel’emi Nkolo, Nkolo, koko bofakambe baoyi banatend’emi ncina eka nai? 47Boto l’oto onoya eneyal’emi, ko aoka baoyi’anami, ko ail’aho, mpokotum’ino ekolanya enande: 48akolana l’oto onofakaki’otumb’onande, ko aocima nginda mene, ko aofak’otumba ena lufe; ko eneki efela oyaka, ko basi baofoela botumb’oho la locili mene, batalidyisa boho tu, lacin’oka boho bofakamaki la locili mene. 49Koko ende onoka baoyi’anami koko afile’aho, akolana l’oto onofakaki botumba en’ekongo bena bolu’olu, efan’ekikedyo bolotsi; basi ban’efela baofoela botumb’oho, ko isasanga boho bokwa; ko eehedyo en’otumb’oho eoyalama bokolo mene.
Currently Selected:
Luka 6: BBY62
Highlight
Share
Copy
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
