Matayo 15
15
1Nkwaho Bafalusi l’atengi ban’ekanda banayaki ena Yelusalema baoya eneyali Yesu, iy’ate, 2Bakili’ane bafulunganya beeka beneki bankya otocikelaka lanai? Enal’iyo toma bafasonge’akasa. 3Ko ende amalokwela, ate, Iy’inoamene, bofulunganya beeka bena Yakomba lacin’ena baoyi’anino banaki bankya lacina nai? 4Yakomba amila, ate, Fika bafango’one la nyango ene, ko ende onosaiya bafango yombo nyango, awu nko tu. 5Koko ino bila, Mbo, onila bafango’onande yombo nyango enande, ate, Boho bonokoli lacina nkokokamby’ino l’oho bomofama eneyali Yakomba: 6kang’afafike bafango la nyango, afana likambo. Yok’oho ino boyaka yoi lina Yakomba lacin’ena baoyi’anino bana bankya. 7Ino besimo? Yesaya atendaki nko solosolo ena likambo linino, eneki’nd’oilaka, ate,
8Bato’ane baolama l’emi l’enyu’eniyo,
Ko bampik’emi la nkefu iniyo;
Ohonde betem’eniyo bend’osana l’emi.
9Bankumy’emi nko bototoloto,
Eneyalak’iyo balako banayali nko beeka ben’ato kei.
10Ko eneki’nd’oelelaka bik’ike bon’ato eneyal’ende, amasumola, ate, Bolofa, ko boongya linonganya: 11boto afehyama l’oho bonotua en’onyua: boho bonofola en’onyua, boho behy’oto. 12Nkwaho bakili’anande baoy’oyosumola, iy’ate, Eya nde Bafalusi bamok’owe lacin’ena baoyi’ane banak’iy’ookaka? 13Koko ende aokutola, ate, Bote l’ote bonotafusa Bafango’onami onoyali ena loola bongoluolama. 14Bacike, iyo nko balonji banodyak’aiso banalonda bakin’ato banodyak’aiso. Yombo onodyak’aiso alond’okina onodyak’aiso, iy’afe bangokwela lifoku. 15Petelo aamba, ate, Otosakitwele ncina ena lisai line. 16Yesu ate, Ino nkoho botanonganya nde? 17Boteya nde boho bonotua en’onyua bocoa en’otema, ko bofodyama ena lifoku? 18Koko baoyi bahatu banafola en’onyua baoya nk’en’otema, ko baho baehya boto. 19Lacina biango bin’owe, la njaka en’ato, la mposa ina bakele, la mposa ina basamba, la liya, la beloko bena mpoci, la besao: baoyi’ane baofola nk’en’otema; 20baoyi banehya boto nd’aho; ohonde, kang’oto ala toma kum’atasonga bakasa, yoi liho lifehy’oto.
21Ko Yesu aumaki meho, ko acoaki en’onyanga bona Tula la Sidona. 22Ko lenda, boyoto’omoi, ise Kanana, aoya en’ili’oho, aololua, ate, Nkolo, Bon’ona Dawidi, onjokamel’isei; bon’onami on’oyoto aen’ino mene la demona. 23Koko ende atokutwela yoi limoko tu. Ko bakili’anande baoya, bamoonda, iy’ate, Oitanya: ayatokil’iso la ndolua. 24Koko ende aila, ate, Emi ntomamaki nk’eneyali mpate ina bondongo bona Yisalaele ineyungaki kei. 25Koko amoosamela, ate, Nkolo, onkambya. 26Koko Yesu ate, Bana bafakumolama toko lacin’eho toho tofuselame tombwambwa. 27Ate, Solosolo, Nkolo, ohonde tombwambwa tola mpumbwu ineyakwa ena mesa ena nyangetuke eniyo. 28Yesu amokutwela, ate, Boyoto, imeedyo ine iseki’okolo: yoi linalang’e yilame eneyal’e. Ko bon’onande aikyamaki nk’ena heure eho.
29Ko eneki Yesu oumaka meho, aoya ena mbolimboli la lose lona Ngalilaya; ailela ena lingonji, ko aokisase meho. 30Ko bik’ike bon’ato baoya eneyal’ende, baoya la bitumbe, ko la banodyak’aiso, ko la bekukuluku, ko l’anawisa bilama bimoi, ko l’ato’amoi bike, ko bamaambya en’akaka bana Yesu, ko amaikya. 31Ko bato bik’ike baofefa, enek’iy’oenaka bekukuluku bayatende, la banawis’ilama bayaike, la bitumbe bayakende, l’anodyak’aiso bayene; ko baokumya Yakomba ena Yisalaele.
32Koko Yesu aelelaki bakili’anande eneyal’ende, ko aila, ate, Emi lokamel’ato’ane bik’ike isei, lacin’iyo bayali l’emi beco’esaso, ko bafana toma; ko mpalange njatongole nko njala, batotenya ena mboka. 33Bakili’anande bamosumola, iy’ate, Mendo ena sengelenge tongata mampa bike inakolana likinz’ato bik’ike yok’one meya? 34Yesu amaufola, ate, Boyali la mampa inga? Iy’ate, Nsambo, la tosese tonatofan’ike. 35Ko aosumola bato’aho bik’ike bakisase ena loko; 36ko aotamba mampa iho nsambo ko la nse; ko aokanga Yakomba lokango, ko aokesa, ko aofa bakili’anande, ko bakili baofa bato. 37Balaki nk’iyatu, ko baokinda; ko baambola bitate binicikalaki tofondo nsambo nko to. 38Ko iy’analaki bayaaki mpame nkoto inei ko l’ayato l’anatome. 39Ko aotongola bato’aho bik’ike, ko aoyokela en’atu, ko aoyela en’onyanga bona Mangandala.
Currently Selected:
Matayo 15: BBY62
Highlight
Share
Copy
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
