Matayo 17
17
1Eneki bekol’otoa oetaka, Yesu aotamba Petelo ko la Yakobo la Yoane onotwa l’ende en’ecimo, ko amatola ena lingonji lina litale ena lokuko. 2Ko ende aohalingwa bokotu’okina en’oso’oniyo: elongi enande eololoma yoka bosamb’onololoma bina, ko bisenda binande bioyalama telele yoka fololo. 3Ko lenda, Mose la Eliya baenya eneyal’iyo, bayesole l’ende. 4Koko Petelo aolokwela Yesu, ate, Nkolo, bolotsi lacin’eho toyali mendo: yomb’olanga, bolotsi tofake mendo balombe basaso: limoko line, limoko lina Mose ko limoko lin’Eliya. 5Nk’enem’end’otenda, lenda, lilo lina kalikali limakunda; ko lenda, lofoso lookana ena lilo, loila, ate, One nko Bon’onami ona nganji, onombatel’emi enyanga mene; bolofamele. 6Eneki bakili ookaka, baokwa ena bilongi biniyo, ko baoka losomo mene. 7Ko Yesu aolama l’iyo, amasuka, ate, Bemala, botokake losomo. 8Ko enek’iy’oenolaka baiso’aniyo, baten’oto, yengoko Yesu kei.
9Enem’iy’okita ena lingonji, Yesu amasumola, ate, Botasumolake boto’omoko yoi line, yengoko kuma Bon’on’oto aetwa enek’anawaki. 10Koko bakili’anande bamoufola, iy’ate, Batengi ban’ekanda baila, Mbo akoli lacina Eliya ayi en’oso, ncina eka nai? 11Yesu amakutwela, ate, Solosolo, akoli lacina Eliya ayi, ko aongya baoyi bahatu; 12koko lakosumol’ino, Eliya amosila liya, ko iyo bateeya, koko bailelak’ende nko baoyi banak’iyoamene olangaka. Nk’osamb’oho Bon’on’oto angen’ino l’iyo. 13Nkwaho bakili baonongany’oka atangaki nko Yoane Bini.
14Enek’iy’oyelaka eneyali bik’ike bon’ato, mpame emoi aoy’eneyal’ende, ayune baongo en’oso’onande, ate, 15Nkolo, okamela bon’onami ona mpame isei; lacin’ende aen’ino mene l’osinga; ma-ma akwela nkoi, ko mama akwela lose; 16lomoyedyaka eneyali bakili’ane, koko iyo batiikyisa. 17Yesu aokutola, ate, Eotwelo enefan’imeedyo l’ena lopoko! nongokinda l’ino bolingolingo boya? Nkokong’ino bolingolingo boya? Boyaka l’ende eneyal’emi. 18Ko Yesu aofela demona lofeli; ko aofola eneyali ende, ko bonome aikaki nk’ena heure eho. 19Bakili baoya eneyali Yesu ena lokuko, ko bamufola, Mbo iso totofodyisa lacina nai? 20Yesu amasumola, ate, Lacina enefan’ino imeedyo; lacin’emi lakosumol’ino, solosolo, yomb’ino boyali l’imeedyo, kang’iho ikoli la boona bona sinapi kei, tumbe bongosumola lingonji line, Uma mendo, coaka mei; ko linguma. Efaataki ekambwa enefakambis’ino. 21(Koko demona en’okotu’one efafole yengoko la boondo ko la nkila ena toma.) 22Ko enek’iy’oyalaka ena Ngalilaya, Yesu amasumola, ate, Bon’on’oto angolekyama en’akasa ban’ato; 23ko bangoyak’ende, ko en’ina bon’esaso angetwa en’ewedi. Ko iyo baokaki lokeseli mene.
24Enek’iy’oyelaka ena Kapalanauma, basusanyi bana mpuci ena tempelo baoy’eneyali Petelo, Mbo, bolaki’onino afafute mpuci ena tempelo? 25Ate, Afuta. Ko eneki’nd’otuaka en’otumba, kum’ataat’etelo otenda, Yesu amoufola, ate, Simona, bafoka bana loko batambeela mpuci yombo lombande eneka nai? yombo eneka bana baniyoamene, yombo enek’efenda? Na kanel’e? 26Eneki Petelo oilaka, ate, Enek’efenda, Yesu amosumola, ate, Yok’oho bana mene bafafute. 27Ohonde, lacina totokumb’iyo, ombocoa, fusa ndofanyi ena lose, tamba nse enengund’e en’oso; ko enengi omumola bonyua bona nse ongosungya sekele emoko; tamb’eho, ko af’iyo lacin’enami l’ene.
Currently Selected:
Matayo 17: BBY62
Highlight
Share
Copy
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
