Malako 1

1Limatsako lin’osimo bon’olotsi bona Yesu Masiya, Bon’ona Yakomba.

2Yok’onoki baoyi otengamaka en’okanda bona Yesaya bosumoli,

Lenda, latoma ekima enami en’oso bon’elongi ene;

Ende angokoongedya mboka ene.

3Lofoso lon’oto’omoi onololua ena sengelenge:

Boongya mboka ena Yawe,

Bociedya mboka inande.

4Yoane ayaki, ko ainaki’ato en’okala bona sengelenge, ko alakaki lilako lin’eumbelo en’aoyi’owe lacin’en’etungwelo ena baho. 5Ko bato ban’onyanga bona Yudea bahatu la baise Yelusalema baocoa eneyal’ende, ko bainamaki l’ende ena lose lona Yoladane, enek’iy’ofisolaka baoyi’owe’aniyo. 6Yoane aolota bisenda bina besa bena ngamela, ko la bokoli bon’ekoto ena nyama ena litenaka linande; ko toma tonande tona ndaka nko mpalika la bohe. 7Ko aosekody’osimo, ate, Boto’omoi onondek’emi locili ayayi ena mbusa enami; emi mpakoli lacina nsuname oyolitola bekoli bena tombwaku tonande. 8Emi lakin’ino ena lose solosolo; koko ende angokin’ino ena Bolimo bon’olotsi.

9En’esik’eho Yesu aoya ena Nazaleta, nk’eluku emoi ena Ngalilaya; ko ainama la Yoane ena Yoladane. 10Ko isasanga, enem’end’otefwa ena lose, aena loola lokombwa, ko Bolimo boyakite eneyal’ende nko la yonge yok’ekoso. 11Ko lofoso lookana ena loola, ate, E oyali Bon’onami ona nganji, onombatel’emi ekiko mene.

12Isasanga Bolimo amotoma ena sengelenge. 13Ko ayaaki ena sengelenge bekolo ntuk’inei, ayamekame la Satana; ayaaki meho ende la nyama in’olema; ko bikima bina loola bamokambya.

14Eneki Yoane otungamaka en’onyolo, Yesu aoya ena Ngalilaya, ko aosekody’osimo bon’olotsi bona Yakomba, 15ate, Esike emoyela, lifoka lina Yakomba limoolama; boyosume en’aoyi’owe, ko bimedya bosimo bon’olotsi.

16Enem’end’oeta en’oseleka bona lose lona Ngalilaya, aena Simona ko la Andelo onotwa l’ende, bayafuse lisangi liniyo ena lose, lacin’oka iyo bayaaki bakembi bana nse. 17Ko Yesu amasumola, ate, Boyaka, bonkile, ko nongokoil’ino boyalame bakembi ban’ato. 18Ko isasanga baumbela basangi’aniyo ko bamokila. 19Ko eneki’nd’olindak’isisali, aena Yakobo, bon’ona Zebedayo, la Yoane onotwa l’ende, bayatele basangi nk’en’atu. 20Isasanga amaelela, ko baocika Zebedayo bafango’oniyo ko l’asali en’atu, ko baokila nk’ende.

21Ko baocoa ena Kapalanauma; ko isasanga en’ina bona Sabata aotua ena sunagoga ko amalaka; 22ko baofefa la lilako linande, lacin’oka amalaka yoka boto’ona lifoka, efa yoka batengi ban’ekanda. 23Ko boto’omoi onoyaaki la lifoi lina nsefo ayaaki ena sunagoga; ko aololua, 24ate, Iso l’e, Yesu ona Nazaleta, tond’oya? Omoya nde oyoteehya? Lakey’e, On’oeka ona Yakomba. 25Ko Yesu amofela lofeli, ate, Yala mwi, ko fola eneyal’ende. 26Eneki lifoi okambolak’ende, liho yololua la lofoso lona lokolo, ko yofola eneyal’ende. 27Ko bato bahatu baofefa mpefa mene, ko baufolana, iy’ate, Yoi line lind’oya? Noka, lilako lina litoto nde liho! Asumola bafoi mene bana nsefo yoi, ko baimedya! 28Isasanga lokumo lonande lolinda ena bekala l’ekala en’onyanga bona Ngalilaya bohotu.

29Isasanga, enem’iy’ofolaka ena sunagoga, baotua en’otumba bona Simona l’ona Andelo, iyo la Yakobo la Yoane. 30Koko nyango en’ooli bona Simona aeci la nkangi en’efefe ena yonge, ko isasanga baosumola Yesu lacin’enande. 31Ko aoya, amounda la likasa, ko ameetola; ko isasanga nkangi en’efefe eosila eneyal’e nde, ko amakambela.

32Ko la likolo, eneki bina oilaka, bamoyela bato bahatu banayaaki la nkangi ko l’iyo banayaaki la bademona. 33Ko bonyanga bohotu bosusana en’onyua bon’otumba. 34Ko aikya bike bon’ato banayaaki la nkangi ina bekotua l’ekotua, ko aofodya bademona bike; ko aofekya bademona batatendake, lacin’oka baho baeyak’ende.

35Ko l’okulu mene, nko l’akel’ina, aetwa, ko aofola lacina acu ena sengelenge, ko aonda meho. 36Koko Simona l’iyo banayaaki l’ende bamokemba bili l’ili; 37ko enek’iy’osungyaka, bamosumola, iy’ate, Bato bahatu bakokemb’e. 38Ko amasumola, ate, Tocoake en’ili ben’enyanga ben’oli lacina nsekodya bosimo meho: ncina eneki’m’oyaka nd’eho. 39Ko aocoa oyosekody’osimo ena basunagoga baniyo bahatu ena Ngalilaya endotu, ko aofodya bademona.

40Ko boto’omoi onoyaaki la nkangi en’okenge aoya eneyal’ende, amoonda, ko amoosamela, ate, Nk’olanga yok’oho, onsongisa. 41Ko Yesu amookamel’isei, aonanola likasa linande ko amosuka, amosumola, ate, Lalanga, songwaka. 42Ko nk’enem’end’otenda, bokenge bosila eneyal’ende, ko aokulwa. 43Ko isasanga amoutodya, ko amofekya, 44ate, Lenda, tasumolake boto’omoko yoi line tu; koko coaka, oyotume eneyali nkanga, ko lekya toma lacin’en’esongwelo ene, nko toho tonatoki Mose otendak’ale, yoka ndembi eneyal’iyo. 45Koko ende aocoa, ko aomatsa lisekodya yoi liho, ko aolinza liho bike mene; ko la ncina eho, Yesu ataata etuelo en’onyang’oho la fololo: aocikala ena mbiolo en’onyanga, nk’en’ekala bena sengelenge; ko bato baoy’eneyal’ende nk’en’ili behetu.

Currently Selected:

Malako 1: BBY62

Highlight

Copy