Malako 10
10
1Koko eneki’nd’oemwaka meho, aoya en’onyanga bona Yudea, nk’en’ili bona Yoladane. Ko bik’ike bon’ato baosusana lakina eneyal’ende; ko amalaka lakina yoka bosamb’onalakeel’ende. 2Ko Bafalusi baoy’eneyal’ende, bamomeka la njufola, iy’ate, Yomb’oto aumola booli’onande, afulunganya nde beeka? 3Ko amakutwela, ate, Boeka bonoki Mose okeekedyaka boka nai? 4Iy’ate, Mose aimedyaki’oka totenge bokanda bona njaka ena liala, ko tumole booli. 5Ko Yesu amakutwela, ate, Akotengelak’ino boeka bone lacin’ena bocilingitano bon’etem’enino. 6Ohonde ena limatsako lin’enunwelo Yakomba anunolaki mpame l’oyoto. 7La ncina ene boto angocika bafango’onande la nyango enande, ko angambana l’ooli’onande; 8ko iy’afe bangoyala yonge limoko; bafayalaki lakina bato’afe: bangoyala nko yonge limoko. 9Lacin’eho, boto ataambolake baho banaki Yakomba oambanyaka. 10Koko enem’iy’oyala en’otumba, bakili’anande bamuufola lakina ena likambo liho. 11Ko amasumola, ate, Boto l’oto onumola booli’onande, ko aosong’okina, aotata likele; 12ko yombo booli auma eneyali bome’onande, ko aosongana l’okina, aotata likele.
13Ko baoya la banatome eneyal’ende, lacina ayasuke. Ko bakili baofekya iy’anayaki l’iyo. 14Koko eneki Yesu oenaka yoi liho, aolemwa, ko amasumola, ate, Bacike, banatome bayoya eneyal’emi; botafekyake, lacin’oka baise lifoka lina Yakomba bayali yok’iyo. 15Solosolo lakosumol’ino, boto l’oto onofatambe lifoka lina Yakomba yok’onome, afatuaki meho. 16Ko amahama ena beyo benande, ko aotadya bakasa eneyal’iyo, ko amasakela bosako.
17Eneki’nd’opusolaka ena mboka, boto’omoi aoya eneyali ende la laango, amoosamela, ko amuufola, ate, Bolaki’on’olotsi, njil’oya lacina nsangole liiko lonelofakale? 18Ko Yesu amokutwela, ate, Ontang’emi bolotsi lanai? Onoyali bolotsi nk’omoko kei, nko Yakomba. 19Omeya beeka: Tayakake boto, Tatatake likele, Tiyake, Tafotake boto, Tatungyake boto, Fika bafango’one ko l’oyango’one. 20Ko amokutwela, ate, Bolaki, momonya baoyi’ane bahatu nko l’olenge’onami. 21Ko eneki Yesu olendak’ende, amookamela nganji; ko amosumola, ate, Oinda nko yoi limoko: coaka, sombya toma tonatoat’e tohatotu, ko faka bato beinda, ko ongata lituka ena loola; ko yaka, onkile. 22Koko enem’end’ookaka yoi liho, aocingy’elongi, ko aocoa la lokeseli, lacin’oka aataki lituka mene lina toma.
23Ko Yesu aolengalenga, ko aosumola bakili’anande, ate, Etuelo enatua batuki bana toma ena lifoka lina Yakomba eseki locili. 24Ko bakili baofefa bike mene l’aoyi’ane. Koko Yesu aotenda l’iyo lakina, ate, Bana, etuelo ena lifoka lina Yakomba eniyo banil’etema ena lituka eseki locili. 25La ngamela atianya bokole bona ntonga, la ntuki atua ena lifoka lina Yakomba, onoleki locili nk’etuelo enatua ntuki ena toma. 26Ko iyo baofefa bike mene, ko baoufolana, Mbo onokolana yikyamisa oka nai? 27Yesu amatakamela, ko aila, ate, Yoi line lifilamisa l’ato, ohonde efa yok’oho la Yakomba; lacina Yakomba akambisa baoyi bahatu. 28Ko Petelo aomatsa litenda l’ende, ate, Lenda, iso tomumbela toma tohatotu, ko tomokokil’e. 29Yesu amokutwela, ate, Solosolo, lakosumol’ino, efan’oto onumbelaki botumba, yombo batoolo yomb’akune, yombo bambangela, yomb’afango, yombo nyango, yomb’ooli, yomb’ana, yomb’asala, lacin’enami ko lacin’en’osimo bon’olotsi, 30onofatambaki yok’okam’okama isanga en’esik’ene, betumba, l’atoolo l’akune, l’ambangela, l’anyango, l’ana, l’asala, ko la njen’ino; ko, en’esike enengoya angotamba nko liiko lonelofakale. 31Bike’oniyo banayali en’oso bangoyala ena mbusa; ko banayali en’otungu bangoyala en’oso.
32Ko bayaaki ena mboka enem’iy’ocoa ena Yelusalema; ko Yesu aeta en’oso’oniyo; ko baofefa, ko iy’anokilaki baanga nko mbanga. Ko aotamba lakina ba-jo l’afe, ko aomatsa yasumola baoyi banangilama eneyal’ende. 33Ate, Lenda, toyacu Yelusalema; ko Bon’on’oto angolekyama eneyali nkanga ina toome, ko l’eneyali batengi ban’ekanda, ko bangokoiy’ende likambo lacina awu, ko bangoleky’ende eneyali Befenda; 34ko iyo bangonyeel’ende, ko bangutel’ende nsoi, ko bangofoma la mpomi, ko bangoyaka; ko en’ina bon’esaso angetwa lakina en’ewedi.
35Ko Yakobo la Yoane, ban’ana Zebedayo bana mpame, baoy’eneyal’ende, iy’ate, Bolaki, tolanga otilel’iso yoi linakufol’iso. 36Amasumola, ate, Yoi linalang’ino nkilel’ino lika nai? 37Iy’ate, Otof’iso ekisel’ase, omoi en’ili bona likasa line y’ome, ko omoi ena likasa line y’ooli ena lifoka line, 38Yesu amalokwela, ate, Ino bofanonganya yoi lineyufol’ino. Ino bomelisa nde ekala enamel’emi? Ko binamisa nde l’inelo eninam’emi? 39Bamosumola, iy’ate, Tinya. Yesu amasumola, ate, Bongomela ekala enamel’emi solosolo, ko bonginama l’inelo eninam’emi; 40ohonde ekisel’ase en’ili bona likasa linami y’ome la likasa linami y’ooli ef’enami lacina njofe boto: eho engofam’iyo banaki eho okoedyamaka. 41Eneki bakili’amoi jo ookaka, baomatsa lilemwa lacina Yakobo la Yoane; 42koko Yesu amaelela eneyal’ende, ko amasumola, ate, Ino bey’oka iy’anatangama bafoka ban’efenda baotumanya bato’aniyo; ko banaleki la lifoka bamatomeela ntomo. 43Ohonde afa yok’oho eneyal’ino: koko onosokolanga ayale boto’on’okolo eneyal’ino, ende angoyala bosali’onino; 44ko onosokolanga ayalame boto’on’oso, angoyala boombo bon’inatu. 45Lacina Bon’on’oto ataya lacina bato baosael’ende: ayaki lacina asaele bato, ko lacina alekya liiko lonande mbiko lacin’en’ato bike.
46Koko baoyela Yeliko; ko enem’end’ouma ena Yeliko, ende l’akili’anande la bik’ike bon’ato, Balatimayo, bon’ona Timayo ona mpame, onodyaki’aiso, aokisase en’oseleka bona mboka ayalombe toma. 47Ko eneki’nd’ookak’oka Yesu ona Nazaleta ayali, aomatsa yelela, ate, Yesu, Bon’ona Dawidi, onjokamel’emi isei! 48Ko bato bike bamofekya, atatendake; ohonde aofudya yelela la locili mene, ate, Bon’ona Dawidi, onjokamel’emi isei! 49Ko Yesu aemala, ko aila, ate, Beelele. Ko baelela boto onodyaki’aiso, ko bamosumola, Mbo kikaka, emala, akelela. 50Ko ende aoka bokoto bonande mboka, ko aemala, ko aoya eneyali Yesu. 51Yesu amufola ate, Ekambwa enalang’e nkilel’e eka nai? Boto onodyaki’aiso amosumola, ate, Laboni, lalanga njene lakina. 52Yesu amosumola, ate, Ombocoa, imeedyo ine imokiikya. Isasanga baiso’anande baolifwa, ko aokila Yesu ena mboka.
Currently Selected:
Malako 10: BBY62
Highlight
Share
Copy
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
