Malako 16
16
1Eneki bina bona Sabata osilaka, Malia Mangandala, la Malia nyango ena Yakobo, la Salome baosomba toumba, lacina bayi oyokya boduo la toho. 2Ko l’okulu mene en’ina bon’oso bon’eyenga, nko l’ekedyo ena bina, baoya ena nketa. 3Ko baoufolana, iy’ate, Onongotokilimwedya lufe en’ofolo bona nketa oka nai 4Koko enek’iy’oenolak’aiso’aniyo, baen’oka lufe limosila yumolama; lufe liho liyaaki bokolo mene. 5Ko enek’iy’otuaka ena nketa, baena bofenga ayakisase en’ili bona lo l’ome, ayalote bokoto bona telele bon’otale; ko iyo baoka losomo. 6Ende amasumola, ate, Botokake losomo; ino bokemba Yesu ona Nazaleta, onowaki en’ekulusu. Ende amoletwa en’ewedi, afayali mendo; lenda, edye enek’iy’oambyaka eh’ene! 7Koko bocoaka, bosumole bakili’anande ko la Petelo, in’ate, E nde ayete en’oso’onino ena Ngalilaya; bongen’ende nko meho, yok’onoki’nd’okosumolak’ino. 8Ko baofola ena nketa, ko baolota la mbango; lacin’oka baofefa ko bailima; ko batasumol’oto yoi limoko, lacin’oka baanga nko mbanga.
9Eneki Yesu oetwaka en’ewedi en’ina bon’oso bon’eyenga, nko l’okulu mene, aenyaki en’oso eneyali Malia Mangandala, onoki’nd’ofodyak’ale bademona nsambo. 10Ende aocoa osumol’iy’anayaaki’ale la Yesu, enem’iy’ooka lokeseli ko bayalele. 11Koko iyo, enek’iy’ookak’oka Yesu amolika, ko amenya eneyali Malia, batimedya.
12Ena mbusa, aenya l’okotu’okina eneyali bafe’aniyo enem’iy’ocoa ena mboka en’asala. 13Iyo baocoa osumola ban’amoi; ohonde batimedya nko le yoi liniyo.
14Koko ena mbusa aenya eneyali ba-jo l’omoko enem’iy’okisase oyola toma; ko amafela lacin’ena biinda boniyo bon’imeedyo ko la bocilingitano bon’etem’eniyo, lacin’oka batimedya iy’aneenaki eneki’nd’oetwaka en’ewedi. 15Koko amasumola, ate, Bocoaka en’enyanga behetu, bosumole bato bahatu bosimo bon’olotsi. 16Ende onimedya ko ainama en’asi angika; koko ende onofimedya angokoiyama likambo. 17Ndembi ine ingenya l’iyo banimedya: bangofodya bademona ena lina linami; bangotenda la mposo in’itoto; 18bangambola njua l’akasa; ko kanga bamel’iyema inaw’ato, iho ifayakaki; ko bangotadya bakasa eneyali bato banawa nkangi, ko iyo bangika.
19Ko Nkolo Yesu, eneki’nd’okadyaka litenda l’iyo, aotambama ena loola, ko aokisase en’ili bona likasa y’ome lina Yakomba. 20Ko iyo baocoa, ko baosekodya bosimo bon’olotsi en’ili behetu, ko Nkolo aokamba l’iyo, ko aokikya yoi la bikambwa bina mpefa en’ili bona liho. Ndoho.
Currently Selected:
Malako 16: BBY62
Highlight
Share
Copy
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
