Matayo 3

Yoane Mubatisa

1Omo biro ebyo Yoane Mubatisa mwahika, akakangirirya omo mbwarara yeYudea ati, 2Mubinduke, kusangwa obwami bwelubula buri hakuhi. 3Kusangwa yoyo wahulawa nomuminyereri Isaya omugulu abuga ati,

Omulenge oyu kabirikira omo mbwarara:

Mukokotaye enzira yoMukama,

Mutungananaye esyombalu siwe.

4Yoane abya ambite olukimba lwobweya bwengamia, nomukoba wengobi omo mbindi yiwe; nakaryo kuwe kabya esyongike nobuki bwomoli. 5Yerusalema neYudea ne kihugo kyosi ekihererenie neYorodani mobaya ahari, 6mobabatisibwa naye omo lusi lwaYorodani, ibanemokangya ebibi byabo. 7Nikwa omugulu alangira abaFarisayo na baSadukayo erihika okwibatisya, mwabuga nabo ati, Inywe bana besyonzoka! Ni ndi wabasagisaya okwisaga erikarama rikandisyasa kwehi? 8Mubute ebiguma ebitolere eribinduka, 9simuganiraye eriyibwira muti, Tuwite Abrahamu yo tata wetu; kusangwa ngababwira nyiti, Mungu angatoka eribindulira Abrahamu yabana omo mabwe aya. 10Na lino embasa ikirye oko murihi wemiti; oburi muti owatebuta ebiguma byowene akakondawa ahisi iniaguswa oko muliro. 11Ngababatisaya omo magetsi busana neribinduka, nikwa oyu kasa enyuma kwingye andengirye kagala, sinyitolere eriheka esyongendero siwe; asyababatisya neKirimu Kibuyirire nomo muliro. 12Olugare luwe luri omo byala biwe, asyabirya ekibuga kiwe nerihindanya enganu yiwe omo mbiso, nikwa omusunga asyahisya go omo muliro owatehombera.

Eribatisibwa rya Yesu

13Neryo Yesu mwalwa eGalilaya mwasa oko Yorodani ku Yoane eribatisibwa naye. 14Nikwa Yoane asonda erimuganisya ati, Ingye nyitolere iwanyibatisya nawe ukanyihikako kwehi? 15Nikwa Yesu mwamusubirya ati, Unyiligire eribya litya lino; kusangwa ritolere itwaberererya ebitunganene byosi. Neryo mwamuligira. 16Neryo omugulu Yesu amabibatisibwa, neryo-neryo mwalwa omo magetsi, lebaya, elubula molwakingukala naye mwalebya eKirimu kyoMungu kikandagala nga kalikuku, nerimwikirako; 17kandi lebaya, omulenge mwalwa elubula ati, Oyu ni Mugala wage mwanze, namatsemesibwa omwisi wuwe ndeke.

Currently Selected:

Matayo 3: NTN62

Highlight

Copy