Mariko 10
10
Erihikya nerikomola
1Neryo mwalwa eyo mwaya omo kihugo kyeYudea nekyeyisiria yeYorodani, nesyondeko mosyahindana ahari kandi; nakandi mwakangiriryabo, ngoko anatula akakola.
2AbaFarisayo mobasa ahari mobamubulya busana nerimu lengako bati, Rinatolere omo bihano omundu erihiga mukaliwe kwehi? 3Naye mwasubiryabo ati, Musa mwabategekeraki kwehi? 4Nabo bati, Musa mwaha mundu ehamuli yerisaka ebarua yerikomola, nerimuhiga. 5Nikwa Yesu mwabuga nabo ati, Busana nerikala ryemitima yenyu mwabasakira ekihano eki. 6Nikwa okwitsuka ryerihangika, Mungu mwabumbabo omu lume nomukali. 7Busana nomwatsi oyo omundu asyasiga ise na nyinya wuwe asyabegerania na mukaliwe, 8na babiri basyabya omubiri muguma. Na ritya isibakiri babiri, nikwa omubiri muguma. 9Neryo abo Mungu abiribegerania haguma, sihabye mundu ukagabulabo.
10Nomo nyumba abiga mobamubulya akandi busana nomwatsi oyo. 11Naye mwabuga nabo ati. Oburi mundu oyu kakomola mukaliwe akahikya ogundi, iniakasingira; 12naye amalwa oko iba wuwe akahikibwa nogundi, iniakasingira.
Yesu mwatsumula abana
13Neryo mobamuletera abana balere ambu atule kubo; nabiga mobakungabo. 14Nikwa Yesu abere alangira ekyo mwahitana, mwabuga nabo ati, Muleke abana balere base kwingye, simukakirayebo; kusangwa abari batya obwami bwoMungu ni bwabo.
15Kwenene, ngabuga nenyu, oyu tindasya ngirira obwami bwoMungu ngo mwana mulere siendisingira mubo na hake. 16Neryo mwawata kubo omo maboko wuwe mwatsumulabo, mwahira kubo kwebyala biwe.
Owebindu bingi
17Omugulu asonda eritsuka olugendo luwe, omundu mwa mutibitako mwamukukamira mwamubulya ati, Mukangirirya Mubuya, nangakolaki eribana erilagwa engebe yerikota kwehi? 18Yesu mwabuga naye ati, Busana naki ukanyahula mo mubuya kwehi? Sihari mubuya yono muguma oMungu. 19Unasi ebihano ambu: Siwite, Isiwasingira, Isiwiba, Isiwabihira abandi, Isiwateba, Usikaye tata wawe na koyo wawe. 20Naye mwabuga naye ati, Mukangirirya, Ebyosi ebi nabirikolabyo eritsuka omo bwana bwage. 21Yesu erimusamalira mwamwanza, mwamubwira ati, Ukisiya kiguma; genda, ugulaye ebyosi uwite, uhe abera, wasyabya nebindu elubula; kandi wase, ungwame. 22Busana nekinywa ekyo obuso buwe mobwasunza, mwagenda nobulige; kusangwa abya awite bindu bingi.
Eriitisya ryebindu
23Kandi Yesu mwatimbya ameso mwabwira abiga buwe ati, Monzo rikalire busana nabo bawite ebindu eriingira omo bwami bwoMungu!
24Abiga mobasweka oko binywa biwe. Nikwa Yesu mwabuga nabo kandi, ati, Abana, Monzo rikalire oko bakayiketera ebindu eriingira omo bwami bwoMungu!
25Ni ryolo busana nengamia erilaba omo kyuna kyenzanza kwilaba omundu webindu eriingira obwami bwoMungu.
26Nabo mobasweka kutsibu, bati, Byamabya ikobiri bitya ni ndi wasyatoka erilamibwa kwehi? 27Yesu mwasamalirabo mwabwirabo ati, Ekyo sikitokekana oko bandu, nikwa oko Mungu sibiri bitya; kusangwa ebyosi bikatokekana oko Mungu. 28Petero mwatsuka eribuga naye ati, Langira, twamasiga ebyosi twamakukwama. 29Yesu mwabuga ati, Kwenene nga buga nenyu, sihari oyu wamasiga enyumba kutse bagala babo kutse bali babo kutse nyinya kutse ise kutse abana kutse ebitaka busana nage, na busana nengulu yowene, 30oyu tinda-simya engendo igana oko mugulu wa lino, na manyumba na bagala babo na bali babo nabokoyo na bana nebitaka, haguma neri endereribwa, nengebe yerikota oko mugulu akandisyasa. 31Nikwa bangi bemuliro basyabya benyuma, nebenyuma basyabya bemuliro.
Eriagalwa rya Yesu
32Neryo babya omo nzira bakahetuka bakaya eYerusalema, Yesu abya akagenda embere syabo; nabo mobasweka, nabamu kwamire mobubaha. Neryo mwatwala erikumi na babiri kandi, mwatsuka eribwirabo ebyasonda eribya kwiye, 33ati Tunge rera, tukahetuka eriya eYerusalema; nomugala woMundu asyahoterwa oko bahereri bakulu nabasaki, basyamutswera olubanza lwerimwita, kandi basyamuha oko Bihanda; 34ba syamusiningurira, basyamutwira kwa matandi, basyamuswirya emikoba, ibamwita; nenyuma webiro bisatu inialubuka.
Yakobo na Yoane
35Na Yakobo na Yoane, abagala baZebedayo, mobamuhi kako, mobamubwira bati, oMukangirirya, tukasonda utukolere ekyosi tukakusaba. 36Neryo mwabuga nabo ati, Mukasonda inabahaki kwehi? 37Mobamusubirya bati, Utuhe eriikala, omuguma oko byala byamali byawe nogundi oko malembe wawe, omo lukengerwa lwawe. 38Nikwa Yesu mwabwirabo ati, Simwasi ekyo mukasaba. Mwangatoka eripulirya oko olutehi ngapulayako, kutse eribatisibwa omwibatisya nasya batisibwamo kwehi? 39Nabo mobamubwira bati, Twangana toka. Yesu mwabuga nabo ati, Olutehi olo nasyapulyako mwasyapulirya kulo; kandi eribatisibwa ngabatisibwamo, mwa syabatisibwa muryo; 40nikwa eriikala oko byala byage byamali kutse oko malembe wage siryage eribaharyo, nikwa ni ryababirikokoteribwaryo. 41Omugulu erikumi bowa ekyo, mobatsuka eriagalirwa uku Yakobo na Yoane. 42Yesu mwa birikirabo mwabuga nabo ati, Munasi abakayahula mo batabali beBihanda bakatabalirabo nehamuli, nabakulu babo bakatege kabo.
43Nikwa siryendisyabya ritya omukati-kati kenyu; nikwa oyu kasonda eribya omukulu ukwinywe abye atolere iniabya omugombe wenyu, 44noyu kasonda eribya werimbere ukwinywe abye omukobe wabosi. 45Kusangwa oMugala womundu mwatasa erikolerwa, nikwa erikolera, neriha engebe yiwe mo ndongolya busana na bangi.
Endimatime yeYeriko
46Neryo mobahika eYeriko; nomugulu abya akalwa eYeriko na biga buwe na bandu bangi, omugala wa Timayo, ye Bara timayo, endimatime eyikasabiriraya abya ikere oko musike wenzira. 47Neryo abere owa kwari Yesu wa Nazareti, mwatsuka eribirikira kutsibu ati, Yesu Mugala wa Dawidi, unyi genyere! 48Neryo abangi mobamukunga, ambu abye bukutu; nikwa mwabirikira kwilaba kwaho ati, Mugala wa Dawidi unyigenyere! 49Yesu mwahangana, mwabuga ati, Mumu birikire. Neryo mobabirikira endimatime, bati, Usikaye omutima; uhangane, amakubirikira. 50Nerigusa ekanzu yiwe mwahangana, mwahika uku Yesu. 51Yesu mwabuga naye ati, Ukasonda inakuyira nyiti kwehi? Endimatime moyabuga naye, ati, Mukama, Nyibane erilangira ryage. 52Yesu mwabuga naye ati, Uyigendere; erikirirya ryawe ryamakulamya. Neryo-neryo mwabana erilangira riwe mwamukwama omo nzira.
Currently Selected:
Mariko 10: NTN62
Highlight
Share
Copy
Want to have your highlights saved across all your devices? Sign up or sign in
Le Nouveau Testament et les Psaumes en Ndandi © British and Foreign Bible Society, 1962.
