Bikitshino 3
3
1Henyihaha Petelo na Yoano abadi abakamina mu ntempelo ha nsa ya kuteka, yinyi nsa nyingisatu ya kiolwa. 2Kubadi muntu kishete kasha batandjilwe munda mwa nyin’e, abadi abamutulu kwifuku n’efuku ku kibelo kia ntempelo, akitemunwa bu Kibuwa, atekye biabuntu kwi abatwele mu ntempelo; 3E hakumona Petelo na Yoano tabadi abatwele mu ntempelo, bebatekyele biabuntu. 4Petelo, habamutale swee na Yoano hamune, bamulungwile’shi: Etutale. 5E batele eshimba na kutengyela’shi, nankatambula kintu kwabadi. 6Binyibiabia Petelo bakwile’shi: Mpata na nfalanga ya nsahabu nki n’ayo, ooo, anka kino kiandji n’akio, nankuha’kio. Mwishina dia Yesu Kidisitu a ku Nasaleta, ebwe, otambukye. 7Biabia bamukwatshile kwiasa die dibalume, amwimika. Henyihaha kahindji n’aka ngwa na tuhulu twe bibanyingile, 8N’e batambukile kwiilu, bemene, tatambuka, batwēle n’abo mu ntempelo, kwete kutambuka na kutumbuka, na kutumbisha Efile Mukulu. 9Bantu boso abamumwene kwete kutambuka na kutumbisha Efile Mukulu. 10Abeukile namu’shi, nyi winyi badi ashāla ku kibelo kibuwa kia ntempelo; abakanyine bikata na kuhūla ha mwanda wa kibamukitshinwe.
11Kishete habadi mulamate kwi Petelo na Yoano, bantu boso abekongyele hamune lubilo kwabadi mu kishikamino akitemunwa bu kia Nsolomone, bakwete kukanya. 12Petelo habamwene biabia, bālulwile kwi bantu’shi: Anwe Bena Isalele, a nkinyi kianukanya kino? A nkinyi namu kianwitubandjila mbu kwamba’shi, tubatambusha uno muntu ku bukome bwetu bu na mwinyi, su ku bwin’Efile Mukulu bwetu? 13Efile Mukulu a Abalahama n’ā Isaka, n’ā Yakoba, Efile Mukulu a bashyetu batumbishe Mwan’e Yesu; winyi anubatule ku kimu, nubamutūne namu ku mpala kwa Pilata, habadi n’eshimba dia kumuhosola. 14Ank’anwe nubatūne winyi Muhatulukye-E-Kishila, Mululame, nubatekyele namu ntomboshe kwinuhēbwa; 15Nubehayile Muhangi a muwa, winyi abasangwile ku lufu kw’Efile Mukulu; ha uno mwanda, twi bu tumonyi. 16Nyi lukumino lwa mwishina die lubanyisha uno muntu bukome, anumumono na meso, nakumwiuka: ee, nyi lukumino lwi kwadi lubamuha buno bukome bukumbane ku meso kw’anwe boso. 17Binobino bakwetu, neuku’shi, nyi ha mwanda wa luhatamino nubakitshine biabia, na bamunyi benu hamune. 18Anka yino myanda yibalesheshe Efile Mukulu kwibedi mu kanwa mwa batemuki be, eshi: Kidisitu akekufwambuka e beyikumbasha. 19Binyibiabia nwilangei ’mashimba, nwikale bālulwe’shi, milwisho yenu yishimangishwe, biabia akukafiki kwi Yehowa bihindji bia kukankamana kwishimba. 20E akatumu Yesu Kidisitu, winyi badi mulungulwe kwanudi kwibedi. 21Nkihwandjikile mwiilu kumutambula mpaa na ku bihindji bia kulumbula kwa bintu bioso, bibakwile Efile Mukulu ku kanwa kwa batemuki be bahatulwe-be-kishila, kasha babangile hanohansenga. 22Binbibinyi Mosesa bakwile kwi bayaiya’shi: Yehowa Efile Mukulu enu, akenwiboshesha mutemuki a ku bakwenu, anka hamune bu’mi, e nukamwifwakene mu myanda yoso yiakenulungula, su nkinyi su nkinyi. 23Akukekala’shi, su nanyi, su nanyi shyakefwakena yawa mutemuki akalwishibwa munkatshi mwa bantu. 24Binyi binyi batemuki boso, kubanga ku Samwele, mpaa na kwi-ba abamulondele kumongo, baba abadi abākula, abatemukile hamune ha myanda y’ano mafuku. 25Anwe nwi bana ba batemuki, na ba kihwano kibakitshine Efile Mukulu na banshyenu-kulu, habākwile kwi Abalahama’shi: Mu kekulu kobe bifuko bioso bia hanohansenga abikēlwa mwabi. 26Efile Mukulu hakwibosha mufubi e Yesu, bamutumine kwanudi kwibedi mu kwinuha mwabi wa kwinwalula’nwe boso ku bubi.
Currently Selected:
Bikitshino 3: NTLK52
Highlight
Share
Copy
Want to have your highlights saved across all your devices? Sign up or sign in
© 1952 Alliance Biblique de la République Démocratique du Congo
