Bikitshino 5
5
1Anka kubadi muntu eshina die bu Ananaisa na mpian’e Safaila, abahene kintu kiabadi n’akio, 2abafile kihindji kia mulo, mpian’e badi mwiūkye, bafwishishe kingi kihindji, bekitudile ku ngwa ya batumibwa. 3Anka Petelo bakwile’ shi: A Ananaisa, a nkinji Satana bausha eshimba diobe kudimba Kikudi-E-Selelee, na kufia kingi kihindji kia mulo w’efuba? 4Hadibadi kwanka, tadibadi bu diobe be? na hobohu kwidihana tadikalanga’nka mwamuleyebela eshimba diobe be? A nkinyi kibokumina uno mwanda kwikala mwishimba diobe? twemudimbe bantu’be nyi Efile Mukulu. 5Biabia Ananaisa hakuhusha bino bishima, bahonene hashi, afwididila; abahushishe yino myanda abakwetwe na moo ukata. 6Basongwalume abebwele bamwanya, bamutwala, batuka n’e hasha mu kumushika.
7Habakile kihindji su mbu nsa yisatu, mpian’e namu batwelele, tamwiukye kibakitshinwe. 8Petelo bamwihwishe’ shi: Ndungule su nubahene nsenga ku mulo ukampanda? E bamwalulwile’shi: Ee, anka ku biabia. 9Henyihaha Petelo bamwambile’shi: A nkinyi kianubalombana hamune kutompa Kikudi kia Yehowa? Tala, ngwa yiabashikanga mulunda obe ngia yi ha kibelo, ayikakutwala, yitukye n’obe hasha. 10Binyibiabia bahonen’anka hanka ku ngwa ye, afwididila: biabia basongwalume abatwelele, bamusañene mufwe, abatukile n’e, bakamushika hehi na mulunda e. 11Binyibaibia kikoñeno kioso ki’Efile Mukulu kibakwatshilwe na moo ukata, na kwi bangi abahushishe yino myanda namu.
12Na ku māsa a batumibwa kubakitshinwe bitundwilo, na bia kukanya bibungi munkatshi mwa bantu, (n’abo boso abadi n’eshimba dimune mu kishikamino kia Solomone. 13Biabia bangi tambakume kwisoba kwabadi, ooo, anka bantu abebatumbishe. 14Na bakumine abakile kufwimishwa kwi Nfumwetu, bibumbu na bibumbu bia balume na bia bakashi.) 15Nyi hābafishishe bambabashi ba masungu mu misee, bebaladisha ha nsala na ha mambata’shi, sunga mwesheshi wa Petelo, ha kukila su mbiaudia kubwikila bamo b’abo. 16Ku Yelusalema kubafikile namu kibumbu kia mu bibalo bibadi ’makunkula, kikwete kufisha bambabashi, n’aba abadi bakwatwe na bikudi bibutete, abahwishishwe abo boso.
17Henyihaha tshiite-mwakwidi badi hanundu ha bakwabo bebwele, na boso babadi n’e (abadi ba ku luhese lwa Basadusea) abakwetwe na nsungu, 18abakwete batumibwa, bakebatwesha mu nshibo ya lukano yiabatulā bantu boso. 19Anka bufuku mwikeilu a Yehowa bashitwile bibi bia ku nshibo ya lukano, bebatushishe hasha’shi: 20Ndai, nukemane mu ntempelo, nukalungule bantu boso bishima bioso bia uno muwa. 21Abo hakuhusha biabia, abatwele mu ntempelo na mashik’ēse bwee, tabalambukisha; anka tshiite-mwakwidi e hanundu ha bakwabo, bafikile n’aba badi n’e, bakongyele kikoñeno kia kimu na bakulu boso ba ku bena Isalele, batumine muntu ku nshibo ya lukano kwibafishe. 22Anka habafikile tuhalai tambebahete mu nshibo ya lukano, abālukile, bakebalungula’shi: 23Tubasañana nshibo ya lukano ngifungibwe anka hoo, na bansamo namu abadi bemane ku kibelo; anka hakwibishitula tubasangana mwi bisumanga, sunga ngumune. 24Binyibiabia tshiitemwakwidi e hanundu ha bakwabo, na kahitene ka mu ntempelo, na batshiite-bakwidi bakata, habahushishe yino myanda, mashimba’bo abadi akalakala munda su uno mwanda aukekwikala na minyi. 25Henyihaha umune bafikile, bebalungwile’shi: Talangai, benyi bantu benubatwesheshe mu nshibo ya lukano, mbaba bemane mu ntempelo, bakwete kulambukisha bantu. 26Binyibiabia kahitene bayile na tuhalai mu kwibafisha, kushī ha bukoho; mwanda abatshinyi bantu’shi, tala betuasa mabwe. 27Habahwile kwibafisha, bebatudile ku mpala kwa kimu. Biabia tshiitemwakwidi e hanundu ha bakwabo bebehwishe’shi: 28A tatwibenukamikye’shi; tunukalambukishanga mu dino eshina, talangai, nubausha Yelusalema ese na lulambukisho lwenu, anukimbi namu mwakwitufishisha mase a uno muntu kwatudi.
29Henyihaha Petelo na batumibwa abālulwile’shi: watudi n’ao ngwa kukokyela Efile Mukulu he kwi bantu. 30Efile Mukulu a bashyetu-kulu babushishe Yesu anubabambile ha mutshi uhingishene. 31E Mwanabuwa, na bu Muhashi, Efile Mukulu bamukamishe ku mboko yibalume ye, ha mwanda wakuhabena Isalele lwilango lwa mashimba na lulekyelo lwa milwisho. 32N’atwe twi tumonyī’twe twa yino myanda; na Kikudi-E-Selelee hamune, nyi Efile Mukulu bamuhele’ba abamukokyela.
33Habahushishe uno, abatahilwe ku mashimba, abebadidile lukūku lwa kwibeha. 34Henyihaha kubebwele umune a mu kimu, Mufadisea, eshina die mbu Ngamadiele, mulambukishi a bishila, badi munemekwe munkatshi mwabantu boso, bakamikile’shi: Batumibwa batushibwe kihindji kihela. 35Bebalungwile’shi: Anwe Bena Isalele, dimukai anwe bana bene mwanukyebe kukitshina ha mwanda wa bano bantu. 36Mwanda kwibedi ano mafuku kubebwele Teudasa, badi mwinemekyeshe: Nyi muntu mukata; kwadi, kibumbu kia bantu, bu nkama yinanka kibafumankene; bayihayilwe, na bantu boso abadi bamukokyele abahalakeshwe na kufishwa bu bisumanga. 37Ku nyima kwa uno muntu kubwebwele Yudasa a ku Ngadilea, mu mafuku a lubadiko lwa bantu, e bōngwele bantu be bungi ba kumulonda; e namu bayihayilwe na boso, abadi bamukokyele abahalakene. 38Binobino nenulungula’shi: Katukai ku bano bantu, tanwibakitanga kintu, mwanda su kano kalolo na uno mufubo mbia bantu, biabia abikafiki bu bisumanga. 39Anka su mbi’Efile Mukulu, anwe tanukamono mwa kwibihonesha, tala hangi nwakasañanwa bu abalua ngoshi n’Efile Mukulu. 40Biabia abamukuminyine; henyihaha habaitanyinwe batumibwa, na kwibakuhila, abebakamikile’shi: Tanukākulanga dimo mwishina dia Yesu; abebahoswele.
41Biabia abakatukile ku mpala kwa kimu bakwete kusehela’shi: Twibahwandjikile kumona būfu ha mwanda w’eshina die. 42Biabia abo, kwifuku n’efuku mu ntempelo na mu mashibo oso, tambalekye kulambukisha na kulungula ya Yesu’shi, e nyi Kidisitu.
Currently Selected:
Bikitshino 5: NTLK52
Highlight
Share
Copy
Want to have your highlights saved across all your devices? Sign up or sign in
© 1952 Alliance Biblique de la République Démocratique du Congo
