Luka 23

1Binyibiabia, abebwele kibumbu kiabo kioso, abamutakwishishe ku mpala, ta bende n’e kwi Pilato. 2Ababangile kumwimukila’shi: Uno muntu tubamusañene kwete kulwisha mwīlo wetu, ahelesha (bantu) kulambula Kesala’shi: Ami na mwinyi nyi Kidisitu, Nfumu. 3Biabia Pilato bamwihwishe’shi: Obe we nfumu a Bena Yuda su? E bamwalulwile shi: Obe bwekiakula. 4Henyihaha Pilato balungwile batshiite-bakwidi bakata na bibumbu’shi, Nkimumone uno muntu na mwanda. 5Ank’abo abakambile kunyisha mwanda’shi: A bembula bantu, kwete kulambukisha kosokoso mu Yudea, kubanga ku Ngadilea mpaa na kuno. 6Habahushishe Pilato mwanda wa Ngadilea, bahwishe’shi: A uno muntu mwina Ngadilea su? 7Anka kahindji n’aka, habeukile ’shi, e nga ku kihindji kia matalwa a Heloda, batumine kwi Helodo, winyi e badi mu Yelusalema mu ā mafuku.

8Binyibiabia Heloda habamwene Yesu basehelele bikata: mwanda badi akyebe kumumona kihindji kila, mwanda bahushishe myanda yibungi ha mwanda we; badi atengyela’shi: ’mone kilengeleshi kikitshibwe kwadi. 9Henyihaha bamwihwishe mu myanda yibungi, anka E tamumwalule sunga mpahela. 10Batshiite-bakwidi bakata na bafundji ba-mikanda abaimene, abanyishishe bikata kumudimbila. 11Biabia Heloda na bantu be ba ngoshi tabamufukula na kumusēnga, abamufwadikile mutwelo auyingayinga, abamwalwishe dimonyi kwi Pilato.

12Ha dinyi efuku diadia Pilato na Heloda abekwatenene bukūku; mwanda kwibedi abadi beshikwene’bo banabene.

13Binyibiabia Pilato habetamine batshiite-bakwidi bakata, na batontshi ba bantu hamune, 14bebalungwile’shi: Nubamfwishisha uno muntu bu winyi alwisha bantu, talai namu, tampwila kumutompa ku mpala kwenu, nki musañane mwanda mu uno muntu yinemene mu yinyi myanda yanumwimuka. 15Ayoyo, sunga Heloda winyi, mwanda nenutumine kwadi, talai takwi mwanda wadi mukite auhwandjikila tufu. 16Binyibiabia ’mukuhile, ’muhosole. 17(Mwanda ubadi n’au ngwa kuhosola umune ha bidibwa bia kusehela). 18Biabia abo boso abanyishishe mayi hamune, eshi: Katusha uno’u, wetuhoswele Balabasa; 19(e winyi mwelwe mu nshibo ya lukano, ha mwanda wa kutusha bitulu mu kibalo na mwanda wa buntomboshi). 20Binyibiabia Pilato mwanda badi akyebe kuhosola Yesu, bakwile kwabadi dimonyi. 21Ank’abo abēle musase’shi: Mubambei ha nkulusu, mubambe ha nkulusu, 22Biabia e baihwishe diakasatu’shi: A mpa mwanda kinyi, a mbubi kinyi bwadi mukite? Ami nkimumone mwanda wadia kufwila. Biabia ’mukuhile, ’muhosole. 23Ank’abo abanyingamene na mayi e bukoho, na kukyeba’shi: Abambibwe ha nkulusu. Mayi a abo, n’a batshiite-bakwidi bakata abakambile a boso. 24Henyihaha Pilato batshibile kimu’shi: Biabatekyele bikitshibwe. 25Biabia e bebahoswelele winyi badi mwelwe mu nshibo ya lukano, ha mwanda wa kutusha bitulu na buntomboshi mwabakyebele; anka e bafishishe Yesu (kukita) amukyebela mashimba’bo.

26Habamukunkwishe, abakwete muntu umune Shimona, mwina Sailenia, badi atuku ku mahia, abamutentekyele mutshi uhingishene mwadia kulonda n’au Yesu. 27Kubamulondele kibumbu kikata kia bantu, na kia banabakashi babadi abamudidi namu na lukalo. 28Anka Yesu hakwialula kwabadi, bambile’shi: A bana-bakashi ba ku Yelusalema, tanundjilanga, anka mwīdile’nwe bana bene. 29Talai, mafuku anafikye mwanākule’shi: Mwabi kwi bankunga, na mafu ashī atande bana, na mabele ashī omeshe. 30Henyihaha banakabangye kwakula kwi mangulushi: Etuhonenei, na ku miengye namu’shi: Etubwikilei. 31Mwanda su abakitshi yino myanda ha mutshi ubishi, a nkinyi akikakitshibwa ha mutshi ūme?

32Kubadi bangi babidi namu balwishi babakunkwishwe n’e mu kwihaibwa. 33Biabia habādi abafiki henyi hantu habatemwinwe bu Kabale, henyi’ho nyi habamubambile ku nkulusu, na benyi balwishi, umune ku mboko yibalume, mungi ku mboko yibakashi. 34Henyihaha Yesu bakwile’shi: A Yaiya, ebalekye le, mwanda tabeuku kiabakitshi. N’abo abābanene bifwalwa bie, bebita bubale. 35Binyibiabia bantu abadi bemane abatala, na batontshi namu tabamufukula’shi: E bahashishe bangi, ehashe e na mwinyi su e Kidisitu musangulwe e Efile Mukulu. 36Basalai namu abamusēngyele, abafikile (kwadi) tabamutambika nfinega, 37eshi: Su obe we nfumu a Bena Yuda ehashe’be na mwinyi. 38Kubadi kifundwe namu kifundjibwe hanundu he mu bishimi bia Ngidiki, na bia Latshine, na bia Bahebelu’shi: UNO WINYI NYI NFUMU A BENA YUDA.

39Henyihaha umune a benyi balwishi abahudikilwe, bamukāyile mulomo’shi: Su obe we Kidisitu, ehash’obe na mwinyi, n’atwe (namu). 40Anka mungi bālulwile, amutosha’shi: obe twe mutshine Efile Mukulu, mwanda obe namu we mu kuhīshibwa kumunenka. 41Anka’twe nkwitulombene, mwanda atutambula bwinyi bwedi bwa bikitshino bietu; anka e tamusole mwanda, ooo. 42Binyibiabia bākwile kwi Yesu’shi: A Nfumwami, ontentekyesha hokāfiki mbufumu bobe. 43Biabia Yesu bamwalulwile’shi: Binyibinyi nakulungula’shi: Lelo’yo uno okekala n’ami mu mpaladisa.

44Nguba tabadi bu nsa yisamombo, mufito ubafumankene nsenga yoso mpaa na ku nsa kitema. 45Nguba namu bafitshile anka fututu. Kilamba kia lushiko kia mu ntempelo kibabālukile hankatshi. 46Henyihaha Yesu habadile n’eyi dikata, bakwile’shi: A Yaiya, natulu kikudi kiande mu māsa obe: habahwile kwakula biabia, batule muwa we.

47Binyibiabia winyi mulami a basalai lukama, habamwene bibakitshinwe, tatumbisha Efile Mukulu’shi: Biosobi uno badi muntu mululame. 48Biabia bibumbu bioso bia bantu bibekoñene hamune ku wawa mwanda, hakumona mwaubakitshinyinwe, abebabile ha biadi biabo, abālukile. 49Na boso abadi bamwiukye, na banabakashi babafikile ku Ngadilea abadi abamulondo, babadi bemane kula, bakwete kubandjila yino myanda.

50Talai, kubadi muntu atemunwa bu Yosefo, mwina kimu, badi muntu ebuwa, n’a kululama: 51(E winyi tabadi mukumine ku binangu na ku’kia abakitshine.) (Badi) mwina Adimatea, kibalo kia Bena Yuda, e na mwinyi namu badi atengyela bufumu bw’Efile Mukulu. 52Uno (muntu) bayile kwi Pilato tatekye kitanda kia Yesu. 53Bekikishe, ekihombela mu kilamba kia linene, ekiladika ’muta ubabangwilwe mwībwe, mubadi tamwaladikilwe kitanda. 54Diadi’ efuku dibadi diakulumbula, dia Sabado namu dibefubwile hehi.

55Bana bakashi namu abafikile n’e ku Ngadilea, abalondele kunyima, abamwene kilele, na mwabaladikīle kitanda kie. 56Biabia abālukile, bakalumbula abinunku mahembwe na mimu ya malashi. Efuku dia Sabado abeikishe mulombene kishila (ki’Efile Mukulu.)

Currently Selected:

Luka 23: NTLK52

Highlight

Copy