Yoane 13

1NDA joso j’elambo e’Efendelo, Yesu aolea wae heure ekae eokita wae ende imana lim’okili bone, ko acw’el’Ise ekande. Ende okaki bakae mongo baki nd’okili eefe, ko aolaok’eefe elaka nko nsukela. 2Koko nd’elelo ea toma e’okolo, aki Satana oilaka lokai nd’otema wa Yudasa, bosi Keliota, bona owa Simona, wae angele Yesu: 3ko Yesu aolea wae Ise aoloka belemo beuma nd’akata bakande, ko aolea wae ayaki lim’ele Nzakomba, ko acw’ele Nzakomba, 4nd’ewel’eko, aolemala lim’elelo, ko aolambya benkoto’ekae, ko aokol’itambala, ko aolemb’iko nd’onkeke. 5Nkako aobongol’asi nda lokongo, ko aanga losola bakaka b’akimi, ko aoluol’ako l’itambala iki’nd’olembaka nd’onkeke’okae. 6Koko aoy’ele Simona Petelo. Ende aolokela, Nkolo, we osola nde bakak’akami? 7Yesu aolamba, aolokela, Joi likel’emi ofea aeyoko, lolo wifea nd’afeka. 8Petelo aolokela, We ofaosol’akak’akami nye. Yesu aoloamba, Nga; mpokosole, ofoate liondo l’emi nye. 9Simona Petelo aolokela, Nkolo, afa bakak’akami kika, lolo l’akat’akami ko l’otsa’okami. 10Yesu aolokela, Ondokaki basi, wela bondel’ende wae asole bakak’akae kika, lolo ale soto mongo: koko inyo lole soto, lolo af’iny’auma. 11Eki’nde oeaka oko ondoangela, nd’ewel’eko aosanga, Inyo lole soto, lolo af’iny’auma.

12Aki’nd’osolaka bakak’akiyo, ko aokola benkoto’ekae, ko aokit’ase, aolakela, Lolea bolemo boki’m’okambelak’inyo? 13Inyo lontang’emi Bolaki la Nkolo, ko la ngoko lotefel’olotsi; el’emi nde o ngoko. 14Ng’emi, Nkolo la Bolaki, nsolaki bakak’akinyo, siki inyo losolanaka bakaka’akinyo ngoso. 15Eki’m’okaak’inyo lotaza wete lokele ngoki’m’okeelak’inyo. 16Nsosolo, nsosolo, nsangel’inyo, bokwala ntalekolaka nkolo ekae: ko ekima ntalekolaka ondotomaki. 17Ayaka lolea baoyi’ane ko lokel’ako lole l’ekemo. 18Mpokel’iny’auma, njea baki’m’osonaka; lolo ncina wae bikotelo bia Nzakomba bikelame: Os’ola yoko ikami antoka jina. 19Aeyoko nsangel’inyo joi line atafa liko okelama, ncina wae ae liko okelama limeza wae emi nk’ende. 20Nsosolo, nsosolo, nsangel’inyo, os’oamb’ende o em’otoma anjamb’emi; ko onjamb’emi aamb’ende ontomaki.

21Aki Yesu okelaka ngoso aokakaana nd’olimo, ko aosanga joi, akela, Nsosolo, nsosolo, nsangel’inyo, omo’okinyo ifonjangela. 22Bakimi baalana te, ko baokakaza, Bonto oki’nd’oandaka na? 23Omo owa bakimi oki Yesu ookak’eefe, aki nda mesa ea toma, akeki nda ntolo ea Yesu. 24Simona Petelo aoloeta la likata, aolokela, Otosangele bonto oand’ende. 25Ende ondekama ngoko nda ntolo ea Yesu aolokela, Nkolo, bont’oko na? 26Nd’ewel’eko Yesu aolamba, Nk’ende o em’otufela mampa, ko o em’oka eko. Aki’nd’otufaka mampa, aokola ko aoka Yudasa, bona owa Simona, bosi Keliota. 27Nd’afeka b’etufelo, Satana aolotswa ele Yudasa. Nd’ewel’eko Yesu aolokela, Joi likela we, kela nkaola. 28Nk’ont’omo oki nda mesa eaki ncina eki’nd’otefeelak’ende ngoso; 29bamo baotanga wae eki Yudasa otombaka ntombi, Yesu aolokela, Somba toma tondel’iso nd’elambo: nkina akaya banto b’eola yomba. 30Aki’nd’oambaka mampa eki Yesu otufaka, aolola nkakoyoko: ko ekek’eko eki botso.

31Aki’nd’oolaka Yesu aokela, Aeyoko Bona ow’onto aomemyama, ko Nzakomba aomemyama el’ende: 32koko Nzakomba ifomemy’ende el’ende mongo, ko ifomemya nkaeyoko. 33Bana’akami ba tosisi, njala l’inyo nk’isisi fele. Inyo lifondasa: ko ngoki’m’osangelaka Ba-Yuda, Ecw’emi lofaokitey’eko; aeyoko nkel’inyo ngoko. 34Nka inyo esekyelo e’aeyoko wae lokan’eefe; ngoki’m’ookak’inyo eefe, inyo lokan’eefe ngoko. 35La ngone bant’auma bifea wete lole bakimi’akami, ng’inyo lokan’eefe.

36Simona Petelo aolokela, Nkolo, ocwa nko? Yesu aolamba, Ecw’emi, ofonkimey’eko aeyoko, lolo wifonkima nd’afeka. 37Petelo aolokela, Nkolo, ewela ef’em’okokimeya aeyoko na? Njifambya loiko lokami nd’eloko ekawe. 38Yesu aolamba, La wifambya loiko loke nd’eloko ekami? Nsosolo, nsosolo, nkosangela, atafa nsoso ea jende oeka, wifonjangana biangana besato.

Currently Selected:

Yoane 13: NTMN58

Highlight

Copy