Yoane 6

1ND’AFEKA ba baoyi’ako Yesu aocwa wij’a lieke ja Ngalilaya (wae lieke ja Tibelia). 2Koko etukuluku e’anto e’enene baolokima nd’ewela ek’iy’oenaka ntaza iki’nd’okelaka el’iy’andokaki nkangi. 3Ko Yesu aounda nda ngongo ko aokit’ase eko, ende l’akimi bakande. 4Ko elambo e’Efendelo ea Ba-Yuda eotutama. 5Aki Yesu ounzak’aiso’akae aolena etukuluku e’ant’auke baoy’el’ende, aokela Filipo, Tifosomba mampa wae bane bale lima nko? 6Aokela ngone wae omeke, eki’nde mongo oeaka joi li end’okela. 7Filipo aoloamba, Mampa ya francs benkam’efe ifokoke l’iyo, wae wengi’onto akol’isisi. 8Omo ow’akimi, Andelo, okosangi la Simona Petelo nd’ooci, aolokela, 9Bonolu al’ane ole la mampa itano ya tu, ko la nse ife: lolo iko iokoka la bouke w’anto ngone ngamo? 10Yesu aokela, Lokel’anto wae bakit’ase. Bailo b’esobe baki nd’itenel’iko bauke. Ko baende baokit’ase o ngoko, boanji nga nkoto itano. 11Yesu aokola mampa, ko aki’nd’osimaka Nzakomba boya, aokaf’el’iyo bakitak’ase: o ngoko la nse, bouke ngok’iy’olangaka. 12Ak’iy’okindaka aokela bakimi’akae, Lotakanya wumbo bociki wae nko yomba ifitane. 13Ak’iy’oleka, baotakanya wumbo bokociki wa mampa iko itano ya tu, ko baoyoza bioko jom la bife la wumbo boko. 14Aki bant’oenaka lotaza loki’nd’okelaka, bakela, Nsosolo, one ale boteli’oko oya nd’okili.

15Aki Yesu oeaka wae baoy’okanda wae boile bokulaka owa roi, aoluta lenkina nda ngongo nk’ende kika.

16Aki bokolo okite, bakimi’akae baokitela nda lieke, 17ko baokondela nda wato, ko baofenda lieke baocwa Kapalanauma. Wilima boy’okwa, ko Yesu atafoy’el’iyo. 18Ko lieke jofuka ele bompompo w’onene bokumba. 19Ak’iy’olukaka nkai kilomètres nkina nsambo, baolena Yesu ayolande nda lieke o njafema, ko aotutama la wato: ko iyo baanga mbaanga: 20lolo ende aolakela, Ale nk’emi, taloangake. 21Nd’ewel’eko baolanga wae bokole nda wato; ko nkakoyoko wato bokit’okili bok’iy’ocwaka.

22Nda mbile ea lobi, etukuluku e’anto bakemi wij’a lieke baolena wae boki eko o wato bomoko kika, ko baolena wae Yesu ntakondela la bakimi’akae nda wato boko, lolo bakimi’akae baokenda nk’iyo kika, 23(lolonde biato bemo beoya lima Tibelia, ntutama l’itenela ik’iy’oleka mampa, aki Nkolo osimaka Nzakomba boya): 24koko aki etukuluku e’anto oene wae Yesu l’akimi’akae ntabaki eko, iyo mongo baokondel’a biato beko, ko baoya nda Kapalanauma, bayase Yesu. 25Koko ak’iy’otan’ende wij’a lieke, baolokela, Labi, oyaki ane ekeke ele nko? 26Yesu aolaamba, akela, Nsosolo, nsosolo, nsangel’inyo, inyo londasa, afa nd’ewela ek’iny’oenaka ntaza, lolo nd’ewel’ek’iny’oleka mampa, ko lokindaki mbimbi. 27Talokambake nd’ewela ea toma tofitana: lolo loate toma toyala elaka nko loiko ja seko: o toko toe Bona ow’onto oka inyo: eki Ise, wae Nzakomba, oilak’ende lotaza lokae. 28Baolokela, Joi li is’okela na, wae tokambe belemo bia Nzakomba? 29Yesu aolamba, aolakela. Bone wete bolemo wa Nzakomba, wae limez’ende oki’nd’otomaka. 30Baolokela, Lotaza loe w’okela na, wae tene, ko tokimeza? Bolemo bokamba we na? 31Baise bakiso baleki mana nd’etekeleke; ngoki joi okotama, Aolaka mampa lima loola wae bale. 32Yesu aolakela, Nsosolo, nsosolo, nsangel’inyo, Mose ntakaak’inyo mampa eko lima loola; lolonde Fafa ekami ayoka inyo mampa ea nsosolo lima loola. 33Ele mampa ea Nzakomba ele wet’ende okitela lima loola, ko ayoka ba-bokili loiko. 34Baolokela, Nkolo, otoka mampa ene wengi’aefa, 35Yesu aolakela, Emi nde mampa ea loiko: ondoy’el’emi afaoka nzala nye, ko onjimez’emi afaoka mposa nye. 36Lolo nsangel’inyo, wae lonjenaki, lolonde lofimeza nye. 37Bak’auma bankaaka Fafa bifoy’el’emi, ko mpaitany’iyo nye. 38El’emi njoya lima loola, afa wae nkele wango’okami mongo, lolo wango’okande ontomaki. 39Koko bone wae wango’okande ontomaki, wete mpocwey’omoko ow’ako baki’nd’onkaaka; lolo mbetole bauma nda mbile ea nsukela. 40Ko bone wae wango wa Fafa ekami wete wengi’onto oteemeza Bona, ko ondoimez’ende ifoata loiko ja seko, ko njifoetol’ende nda mbile ea nsukela.

41Nkako Ba-Yuda baomemesana nd’ewel’ekande eki’nd’okelaka, Emi wae mampa ekitelaki lima loola. 42Iyo bakela, One afa Yesu, bona owa Yosefa? Tea ise la nyango ekae: l’aeyoko ende akela, Nkitelaki lima loola, ngamo? 43Yesu aolamba, aolakela, Talomemesanake el’inyo mongo. 44Nk’onto okuseya loy’el’emi imola nko Fafa ontomaki aolobela, ko njifoetol’ende nda mbile ea nsukela. 45Joi jokotama nd’enkanda bia bateli, Iy’auma bifolakema la Nzakomba. Wengi’onto ondokozaki Fafa, ko ondekela l’ende, aoy’el’emi. 46Afa wae bonto enaki Fafa, imola nk’ende oya lim’ele Nzakomba, ende aolena Fafa. 47Nsosolo, nsosolo, nsangel’inyo, Ondimeza aata loiko ja seko. 48Emi nde mampa ea loiko. 49Baise’akinyo baleki mana nd’etekeleke, ko bawaki. 50Ene wae mampa ekitela lima loola, ncina wae, bonto ale mampa eko, ko afaowa. 51Emi nde mampa eyoike, ekitelaki lima loola: nga bonto nko loswele ala mamp’ene ifoika seko: koko mampa e em’oka ele wae wunyu bokami, bo em’oka nd’eloko ea loiko ja banto b’okili bauma.

52Nd’ewel’eko, Ba-Yuda baolikyana bikoli, baokela, Bont’one akuseya loka wunyu’okande wae tole, ngamo? 53Yesu aolakela, Nsosolo, nsosolo, nsangel’inyo, Ayak’inyo lofole wunyu wa Bona ow’onto, ko lofomele balongo’akae, lofa la loiko el’inyo mongo. 54Os’ola wunyu’okami, aata loiko ja seko: ko njifoetol’ende nda mbile ea nsukela. 55Ele wunyu’okami bole toma ta ndala ta nsosolo, ko balongo bakami bale emeelo ea nsosolo. 56Os’ola wunyu’okami ko amela balongo’akami ayal’el’emi, ko emi njal’el’ende. 57Eleng’ele Fafa eyoike antomaki, ko emi njoike nd’ewela ea Fafa: o ngoko bonto ond’emi ndala, ende ifoika nd’ewel’ekami. 58Ene ele mampa ekitelaki lima loola: afa ngoki baise’akinyo oleka mana, ko bawaki; os’ola mamp’ene ifoika seko. 59Atefelaki baoyi’ane nda sunagoga, aki’nd’olakaka nda Kapalanauma.

60Aki bouke wa bakimi’akae ookaka baoyi’ako, baokela, Joi lile bolo mo, okuseya lokoza liko na? 61Lolo Yesu aokotola nd’otema’okae wae bakimi’akae baomemesana nd’ewela ea joi liko, ko aolakela, Kamba joi line jokunumwez’inyo? 62Ayaka lena Bona ow’onto ayulela nd’itenela iki’nde nda joso mo? 63Bolimo akaaka loiko; wunyu bole o mpampa: baoyi baki’m’osangelak’inyo bale bolimo ko bale loiko. 64Lolonde bam’akinyo bafimeza. Eki Yesu oeaka lim’iango bako bafimeza, ko la bonto ocw’oangel’ende: 65nd’ewel’eko akela, Nd’ewel’eko, nsangelak’inyo wae nk’ont’okuseya loy’el’emi, imola oko oki Fafa okaak’eyelo.

66Lim’ako bouke wa bakimi’akande baoliman’el’ende, ko ntabut’okenda l’ende bolongo. 67Nd’ewel’eko Yesu aokela ba-jom-l’afe, L’inyo ngoko lolanga limane? 68Simona Petelo aoloamba, akela, Nkolo, tocw’ele na? W’ole la baoyi ba loiko ja seko: 69koko tolimeza ko tea fombo wae ole ow’oeko wa Nzakomba. 70Yesu aolaamba, Ncisonak’inyo ba-jom-l’afe nde? Ko omok’okinyo ale liloka. 71Aotefela la ncina ea Yudasa bona owa Simona, bosi Keliota, el’ende wae ocw’oangela Yesu, ko ende aki owa ba-jom-l’afe.

Currently Selected:

Yoane 6: NTMN58

Highlight

Copy