Luka 19

1KO ende aomotswa Yeliko, ko ayocuwana. 2Ko bala, bont’omo otangema Zakayo; ende aki chef ea batakanyi ba mpuci, ko aki boaci mongo. 3Ende asa wae oene elenge ea Yesu, ko ntakuseya nd’ewela ea etukuluku, eki’nde yuwe. 4Ko aolikumwa nda joso, ko aounda nd’otamba wa bonkena wae oene; el’ende aocw’oleka mboka eko. 5Aki Yesu okitaka nd’itenel’iko, aounz’aiso, aoloena, ko aolokela, Zakayo, kitela nkaola; el’emi njifoyala nd’ilombe ike mbil’ene. 6Ko aokitela nkaola, ko aoloamba l’osalangano. 7Ko aki banto oenaka ngoko, iy’auma baomemesana, baokela, Aocw’okit’ase l’onto ow’obe. 8Ko Zakayo aolemala, ko aokela Nkolo, Bala, Nkolo, nkafele banto b’eola etei ea toma tokami, ko nga mponolaki bonto nko loswele yomba la bokembi, njuteya el’ende toma tonei tonei. 9Ko Yesu aolokela, Mbil’ene loiko loya nd’ilombe ine, el’ende ale bon’owa Abalayama. 10Nd’ewela wae Bona ow’onto ayaki wae aase ko aikya banto bacwei.

11Ak’iy’oke baoyi’ako, aout’otefela l’esonganya, eki’nde ntutama la Yelusalema, ko ek’iy’otangaka wete likulaka ja Nzakomba lifenya nkakoyoko. 12Nd’ewel’eko aokela, Bont’omo owa mpifo e’enene aocwa nd’ese emo e’esi wae ende ambe likulaka likae, mpang’aute. 13Ko aoleta bakwala’akae jom, ko aolacikela pounds jom, aolakela, Lokitola bosolo’one elaka nk’eyelo ekami. 14Lolo banto bakae baoloina tu, ko baolotomela bikima, baokela, Tofolange bont’one ayaleme bokulaka’okiso owa Roi. 15Ko aki’nd’outaka lim’eki’nd’oambaka likulaka, aotom’anto wae bete bakwala’ako el’ende, wae ea nkito ek’iy’okitolaka. 16Ko owa joso aoya nda joso likae, aokela, Nkolo pound eke eokitola pounds imo jom. 17Ko aokela, Ngoko bolotsi, we bokwala ow’olotsi; eki we okelak’olotsi nda joi j’isisi mongo, wifoata mpifo ea benanga jom. 18Ko ow’afe aoya, aokela, Nkolo, pound eke eokitola pounds imo itano. 19Ko aolokela, We o ngoko, wifoata mpifo ea benanga betano. 20Ko omo aoya, aokela, Nkolo, bala pound eke, eki’m’ofongaka nd’itambala: 21eki’m’okoangaka, nd’ewela wae ole bonto owa boonzwa, wambolaka eki we ntawambya, ko omukaka eki we ntawona. 22Aokela, We bokwala ow’obe, njifokotenela likambo lim’omwa’oke mongo. Weaki wae nde bonto owa boonzwa, njambolaka eki’mi ncambya, mmukaka eki’mi ncona; 23na, ntawila bosolo bokami nda banque ncina na, wae nd’eyelo ekami njambe boko, ko la nkito ea banque? 24Ko aokela iy’akemi eko, Lofonol’ende pound eko, ko lokaya bont’oko ole la pounds jom. 25Ko baolokela, Nkolo, ende aata pounds jom. 26Emi nsangel’inyo, ifokaema el’iy’auma baata: lolo bifofonol’ende ofoate eko eat’ende. 27Lolonde baini’ane bakami bafolange wete njaleme bokulaka’okiyo, layel’endo, ko laom’iyo ci nda joso likami.

28Ko aki’nd’otefelaka ngoko, aocwa nda joso, aounda nda Yelusalema.

29Koko aki’nd’otutame la Betefange la Betania, nda ngongo etangema Bilaya, aotoma bakimi’akae bafe, 30aokela, Lokenda nd’onanga wij’oi: a iny’omotsw’eko, lifotana bona owa mpunda, etungi, etaf’ont’oafema; lotungole, ko loyele. 31Ayak’onto aluol’inyo, Lotungola mpunda lae? lifokela, Nkolo alanga mpunda ene. 32Ko bikima baokenda, ko baotana ngoki’nd’oasangelaka. 33Ko ak’iy’otungole bon’owa mpunda, bamong’eko baokela, Lotungola bon’owa mpunda lae? 34Ko baokela, Nkolo alanga mpunda ene. 35Ko baoyel’eko ele Yesu, ko baolafy’enkoto bekiyo nda mpunda, ko baolafya Yesu nk’eko. 36Ko aki’nd’okende, baotand’enkoto bekiyo nda mboka. 37Ko aki’nd’otutama la nkitela ea ngongo ea Bilaya, etukuluku euma ea bakimi baanga losalangana, baokanga Nzakomba la lofoso ja lonene nd’ewela ea belemo beuma bia mpamba bek’iy’oenaka; 38baokela, Bokulaka oyei nda lina ja Yawe aosakema l’okako: kuci nda loola, ko l’imemya nd’aliko. 39Ko Bafalusi bamo nda linyenga baokela, Bolaki, sasa bakimi’akawe. 40Ende aolamba, aokela, Nsangel’inyo, ayaka bane bayala ko, bikenje bifobeleza.

41Ko aki’nd’otutama, aolena bonanga, ko aolela la mpisali nd’eloko ea boko, 42aokela, Nga w’eaki nda mbil’ene eke baoyi bandieza kuci eke! lolonde aeyoko baolisama lim’aiso’akawe. 43Ele bembile bifokiela bee baini’ake okolingola la lobala, ko bifokosamanya, ko bifokokomba nd’ekako beuma, 44bifokunza we nd’amoci, ko l’ana bake nd’etei eke; ko bafaocik’ekenje emo eke ekotai nd’ekenje emo; eki we ntawea ekeke ea eizelo ekawe.

45Ko aolotswa nd’ilombe ya Nzakomba, ko aanga joz’iy’atekya baoka, 46aokela, Joi jokotama, Ilombe ikami ifoyala ilombe ya boondo; lolonde inyo lokel’iko etakanelo ea baiyi.

47Ko ayolak’anto bembil’euma nd’ilombe ya Nzakomba. Lolonde nkanga ya joso l’akoci b’enkanda la bingambe bi’anto basaki wae boome; 48ko iyo ntabaata joi li iy’okela; eki bant’auma ofotamak’el’ende wae bokoz’ende.

Currently Selected:

Luka 19: NTMN58

Highlight

Copy