Luka 21

1KO Yesu aounz’aiso, ko aolen’anto b’aaci bandilaki nganji ikiyo nd’efongelo e’aumba. 2Ko aolena bomoto ow’etuka ow’oola mongo ondil’eko tokakota tofe. 3Ko aokela, La nsosolo, nsangel’inyo, etuka ene e’oola aolila nganji endekola nganji ik’iy’auma; 4eki bane bauma oilaka nganji lima bofula wa liaci likiyo; lolo ende ilaki lima boola bokae liaci likae liuma.

5Ko aki bant’amo otefelaka nd’ewela ea ilombe ya Nzakomba, elenge ek’iy’okombyak’iko l’okombe wa bikenje bia lituka la nganji y’oeko, aokela, 6Ele belemo bene benden’inyo, bembile bifoya, wae nk’ekenje ekotai nd’ekenje emo eciki lifi efausama nd’ase. 7Ko iyo baolouola, baokela, Bolaki, baoyi’ako bifokelama ekeke ele nko? ko lotaza wae baoyi’ane baotutama jenya lole na? 8Ko aokela, Loalaka, nyango lofolungusana: ele bant’auke bifoya nda lina likami, bifokela, Emi nde nk’ende; ko, Ekeke eotutama; Talakimake. 9Ko a iny’oka besako bia bitumba la bitongo bia wamba, talokake booma; ele baoyi’ane biel’olo nda joso; lolonde nsukela ef’aeyoko.

10Ko aolakela, Bonanga wifouna l’onanga, ko la likulaka la likulaka; 11ko bekili bifofuka mpafuka mongo, ko bieto bia nzala la nkangi bifoya nda totenela tomo; ko belemo bi’ooma la ntaza y’anene bifenya lima loola. 12Lolonde nda joso j’aoyi’ane bauma, bifokand’inyo, ko bifonyokol’inyo, ko bifoleky’inyo ele bitakano bia ba-sunagoga la nda tolombe ta njanga, ko bifoyel’inyo nda joso ja bakulaka la gouverneurs nd’eloko ea lina likami. 13Baoyi’ako bifoyala el’inyo nga lotaza. 14Nd’ewel’eko lokiteza betema bekinyo, wete lofaokakaza nda joso elenge e iny’oamba: 15el’emi mongo njifokay’inyo bomwa la baoyi ba wanya bafa baini bakinyo bauma oambe, ko baf’iy’oikya bikoli. 16Lolonde baise l’anyango bakinyo, l’iy’asangi l’inyo nd’ooci, la bioto, l’alongo bifoleky’inyo: ko bifooma bam’akinyo ci. 17Ko inyo lifinama jino l’anto bauma nd’eloko ea lina likami. 18Ko libwo limoko ja betsa’ekinyo lifaofitana nye. 19Lifoata belimo’ekinyo l’ikelo ekinyo e’otema.

20Lolonde a iny’oena Yelusalema esamana la bitukuluku bia soldats, mpanga lea wae emelengano ekae eotutama. 21Nkako kel’iyo bale nda Yudea balote nda ngongo; ko kel’iyo bale nd’etei ekae biman’eko; ko kel’iyo bale nda bise bafomotsw’eko. 22Nd’ewela wae bene bele bembile bia nsombola ea nkele, wae baoyi’auma bakotama bakelame. 23Elo el’iy’ale l’aemi, ko ele bialekeli nda bembile beko; la ncina wete elo mongo ifenya ele banto b’okil’one, ko la nkele ele bant’ane. 24Ko iyo bifokwa l’ompempe w’ifaka y’etumba, ko bifotombama njanga nda bise biuma: ko Bafaya bifomatela Yelusalema, elaka nko bikeke bia Bafaya biokoka.

25Ko ntaza ifenya nda jefa la nsonge la tooci; ko nd’okili baoyi b’elo nda bise biuma, banto bifotataana nd’ewela ea efelemela ea lieke j’okwa l’efukelo e’asi; 26banto bifokatswa l’ooma, ko la lolendezo lolendez’iyo baoyi’ane bayei nd’okili; ele belemo bia loola bia mpamba bifofukyama. 27Ko nkako bifena Bona ow’onto aoya nda litute la mpamba la jilangi mongo. 28Lolo ae baoyi’ane oanga jiela, loala nd’aliko, ko losunol’etsa bekinyo; la ncina wae esikwelo ekinyo eotutama.

29Ko aolasangela esonganya; Loala botamba wa liteli, l’etamba beuma: 30amela beko ntongi, inyo mongo lena ko lea wae ekeke ea biane eotutama. 31Eleng’eko inyo mongo, a iny’oena baoyi’ane baokelama, leaka wae likulaka ja Nzakomba jotutama. 32Nsosolo, nsangel’inyo, Eotswelo ene efaimana, elaka nko baoyi’auma baokelama. 33Loola l’okili bifimana: lolonde baoyi’akami bafaimana nye. 34Lolo loalaka inyo mongo, nyango betema’ekinyo befofitane la lompita nd’ewela ea mbimbi eleki ea toma, la ndalangwa e’asanga, ko l’ekakaano bia bokili’one, ko mbil’eko ifokwel’inyo sasimo ng’efeswelo e’ilonga; 35ele mbil’eko ifokwela o bant’auma bafetsa nd’okili bouma. 36Lolonde lesanyaka nda bikeke biuma, ko loondaka beondo, wae loate mpamba ea elotelo lim’aoyi’ane bauma bakelam’olo, ko l’emaelo nda joso ja Bona ow’onto.

37Ko wengi mbile ayolake banto nd’ilombe ya Nzakomba; ko wengi’otso aolola, ko aocw’oetama nda ngongo etangema Bilaya. 38Ko bant’auma baoya el’ende la nkesa mongo nd’ilombe ya Nzakomba wae bookoza.

Currently Selected:

Luka 21: NTMN58

Highlight

Copy