Luka 5

1KOKO aki etukuluku ea banto okam’el’ende, wae boke joi ja Nzakomba, akemi nd’eselo ea lieke ja Ngenesaleta; 2ko aolena biat’efe besemi nd’esemelo ea lieke; lolo baasi ba nse baosafwa lima biato, ko bayosole betai’ekiyo. 3Ko aokondela nd’omo wa biato beko, boki wa Simona, ko aolouola wae asemwa isisi lim’okili. Ende aokit’ase ko aolak’anto b’etukuluku lima wato. 4Ko aki’nd’osizaka lotefela, aokela Simona, Lotomba wato nd’asi ba njindo, ko lokiteza betai’ekinyo, loome nse. 5Ko Simona aolamba, aokela, Nkolo, tasaki bots’otso, ko ntatoata nse nye; lolonde la joi like njifokiteza betai. 6Ko ak’iy’okelaka ngoko, baokomba bouke wa nse l’etai; ko betai’ekiyo beanga jatsa; 7ko baoleta l’akata balongo bakiyo baki nda wato bomo, wete baye bakambya. Ko baoya, baokondeza nse nda biato bek’efe to, wae beanga loina. 8Lolo Simona Petelo, aki’nd’oenaka joi liko, aokwa nd’aongo ba Yesu, aokela, Imana el’emi, O Nkolo, el’emi nde bonto ow’obe. 9Nd’ewel’eki’nde okamwaka, ende l’iy’auma baki l’ende, l’ofula wa nse bok’iy’oomaka; 10ko la Yakobo la Yoane bana ba Zebedayo, baamanaki la Simona nda jasi ja nse, baokamwa ngoko. Ko Yesu aokela Simona, Tawokake booma; lim’aeyoko wifoyalema wasi ow’anto. 11Ko ak’iy’osemyaka biato bekiyo nd’okili, baosundola toma touma, ko baolokima.

12Koko aki’nde nd’onang’omo, bala bont’omo aki eko la jonge liuma lifitana l’aeka; ko aki’nd’oenaka Yesu, aokwa mbosama, ko aoloonda, aokela, Nkolo, ayaka olanga, ompetoleya. 13Ko aosembya likata likae, ko aolofomwa, aokela, Ndanga, fetswaka. Ko nkakoyoko baeka baolimana el’ende. 14Ko aolokela, Tosangelake bont’omoko: lolo kenda, eneya nkanga jonge like, ko nd’eloko ea efetswelo eke lekya nganji iki Mose osiselaka nga lotaza el’iyo. 15Lolo lokumo lokae lokumyama bouke mongo; ko bitukuluku bi’anene bi’anto baotakana wae bokoza, ko baikyama lima tongoi tokiyo. 16Lolo ende aolimana, ko aocwa nda bitekeleke, ko ayoonde.

17Koko nda mbil’emo ayolake lilako; ko Bafalusi l’alaki ba bisekyelo bakokit’as’eko, bayaki lima benanga biuma bia Ngalilayala Yudea ko lima Yelusalema: ko mpamba ea Yawe eki l’ende wae aikya banto. 18Ko bala, banto baoyela bonto oki la nkangi ea nkataana nda ntange; ko basaki wete botswey’ende nd’ilombe, ko boambya nda joso likae. 19Ko ak’iyo ntaben’otswelo, likambo ja etukuluku, baounda nda nsamba e’ilombe, ko ak’iy’oteolaka nsamba e’ilombe, baolokiteza nda ntange ekae nd’etei nda joso ja Yesu. 20Aki’nd’oene imeezo ekiyo, aokela, Bonto, otungwa lima baoyi’obe’akawe. 21Ko bakoci b’enkanda l’afalusi baanga lokakaza, baokela, Bont’one osaola Nzakomba isaola ale na? Omo otungol’anto lima baoyi’obe na, imola nko Nzakomba kika? 22Lolo Yesu aokotola bakakaza’akiyo, aolamba, aokela, Inyo lokakaza nd’etema ekinyo lae? 23Nkina nkele, Otungwa lima baoyi’obe bakawe; la nkele, Betswa, ambola ntange ekawe, ko kenda; oleki ikao nd’etefelo na? 24Lolo nd’ewela wae lea Bona ow’onto ale la mpamba nd’okili wae atungol’anto lima baoyi’obe (aokela bonto owa nkangi ea nkataana), Nkokela we, Betswa, ambola ntange ekawe, ko kenda nd’ilombe ikawe. 25Ko nkakoyoko aolemala nda joso likiyo, ko aolambola ntange eki’nd’okeci, ko aocwa nd’ilombe ikande, aomemya Nzakomba. 26Ko iy’auma baokamwa, ko baofika Nzakomba; ko baokama l’ooma, baokela, Tolena baoyi b’eleng’enkina mbil’ene.

27Ko nd’afeka b’aoyi’ane aolola; ko aolena botakanyi owa mpuci otangema Lewi, akokit’ase nd’itenela ifut’iyo mpuci, ko aolokela, Onkim’emi. 28Ko aosundola toma touma, aolemala, ko aolokima.

29Ko Lewi aololambela elambo e’enene nd’ilombe ikae; ko etukuluku e’enene ea batakanyi ba mpuci l’ant’ankina bakokit’ase l’iyo baleki toma. 30Ko Bafalusi l’akoci b’enkanda bakiyo baomemesanela bakimi bakae, baokela, Inyo lola ko lomela la batakanyi ba mpuci l’ant’obe lae? 31Ko Yesu aolamba, aolakela, Banto bakema bolo ntabelaka nkanga e’ete; lolonde bandoka nkangi. 32Nciyaki oeta banto bandeji, lolonde bant’obe nd’eututaelo.

33Ko iyo baokela, Bakimi ba Yoane bakila toma bekila beuke, ko baoonda beondo, ko bakimi ba Bafalusi o ngoko; lolo bake baleka ko bamelaka. 34Ko Yesu aolakela, Lifokiza balongo ba wengi owa waji toma nd’ekeke ekit’ase wengi l’iyo nde? 35Lolo ekeke ifoya endimana wengi lim’el’iyo, mpanga bakile toma nd’embile beko. 36Ko aolasangela esonganya, aokela, Nk’onto otena ebolo lim’onkoto w’aeyoko wae asamb’eko nd’onkoto w’ojwela; ng’akel’o ngoko, siki akanjola bonkoto w’aeyoko, ko ebolo lim’onkoto w’aeyoko efosongane la bonkoto w’ojwela. 37Ko nk’onto ondila basanga b’aeyoko nda bikucu bia kalakala, nyango basanga b’aeyoko bafoole bikucu, ko basanga mongo bafutele, ko bikucu bifofitane. 38Lolonde bilaka basanga b’aeyoko nda bikucu bi’aeyoko. 39Ko nk’onto omelaki basanga ba kalakala aut’olanga b’aeyoko; el’ende aokela, Ba kalakala baolekol’olotsi.

Currently Selected:

Luka 5: NTMN58

Highlight

Copy