Luka 7
7
1AKI Yesu osizaka bitefelo bikae biuma nd’atoi b’anto, aomotswa Kapalanauma.
2Ko bosali owa capitaine emo, oki’nd’ookak’eefe, aki la nkangi, ko aotutama l’iwa. 3Ko aki’nd’ookaka lokumo ja Yesu, aolotomela bingambe bia Ba-Yuda, ouola wae ende ay’oikya bosali’okae. 4Ko ak’iy’okite ele Yesu, baoloonda, baokela, Ende eji wete w’okeele joi line; 5la ncina wae aolanga ese ekiso, ko aototongela sunagoga ekiso. 6Ko Yesu aocwa l’iyo. Ko aki’nd’otutamaka l’ilombe, capitaine aolotomela balongo’akae wae bokele, Nkolo, wambocike; el’emi mpeji wete w’otswa nd’ilombe ikami; 7nd’ewel’eko, ncitang’emi mongo bonto ondeji wae njoy’ele we: lolo tefela joi kika, ko bosali’okami ifoikyama. 8El’emi bonto ondilami nda mpifo, ko nde la soldats bale nda mpifo ekami: nkel’one, Kenda, ko aocwa; ko nkel’onkina, Yaka, ko aoya; ko nkela bokwala’okami, Kela ngone, ko aokela. 9Ko aki Yesu ooka baoyi’ane, aokamwa, ko aokengwana, ko aokela linyenga j’anto bandokimaki, Nsangel’inyo, Ncifena imeezo nda Yisalaele endekol’ene nye. 10Ko iy’atomamaki, ak’iy’outaka nd’ilombe, baotana bosali aika.
11Koko nk’elingi nd’afeka, aocwa bonanga’omo botangema Naina; ko bakimi’akae baocwa l’ende, l’etukuluku e’anto e’enene. 12Aki’nd’otutamaka la wiso w’onanga, bala, baotomba ilaka y’onto nd’anza, bona owa jende owa likinda owa nyango ekae, ko ende aki etuka: ko bouke w’anto b’onanga baki l’ende. 13Ko aki Nkolo oenaka bomot’oko, aolook’isei, ko aokela, Tolelake. 14Aotutama ko aofomwa etombelo e’ilaka; ko batombi baosilama. Aokela, Bosekota, nkokela we, Betswa. 15Ko bonto oki owei aoetswa, aosongongala, ko aanga lotefela. Aolokaya nyango ekae. 16Ko booma bolakwel’iy’auma, ko baomemya Nzakomba, baokela, Boteli ow’onene aoleny’el’iso: ko Nzakomba aoy’ele banto’akae. 17Ko lokumo lokande lokumyama nda Yudea euma, la nda bise biuma biki ntutama.
18Ko bakimi ba Yoane baolosangela baoyi’ane bauma. 19Ko Yoane aolela el’ende bakimi’akae bafe, ko aolatoma ele Nkolo wae bouole, W’ol’Ende oyei, la tolendez’onkina? 20Ko aki bant’ako okitaka el’ende, baokela, Yoane owa Wini aototoma ele we, aokela, W’ol’Ende oyei, la tolendez’onkina? 21Nda heure eko ayoikya bant’auke lima nkangi la bieto la bekali bi’obe: ko aokaya enelo ele bant’auke bawei’aiso. 22Ko aolamba, aokela, Lokenda, losangele Yoane baoyi bandok’inyo la baoyi banden’inyo; bawaki’aiso bayene, betengu beyokende, baeka baofetswa, bakokinz’atoi bayoke, bawaki baoetswa, ko bosako w’olotsi wongozama ele beola. 23Ko bonto ofene ncina ea ekunumwelo el’emi aosakema l’okako.
24Ko aki bikima bia Yoane oimana, Yesu aanga losangela etukuluku e’anto nd’eloko ea Yoane, Ok’iny’ocwaka oena nd’etekeleke na? La bokombe bofuka l’ompompo nde? 25Lolo locwaki oena na? bonto olota benkoto bi’esengo nde? Bala, iy’alota benkoto bi’esengo ko l’iy’aleka toma t’olotsi bale nda tolombe ta bakulaka. 26Lolo locwaki lae? Oena boteli? Onde, ko nsangel’inyo, aolekola boteli. 27One wet’ende ok’iy’okotelaka,
Bala, ntom’ekima ekami nda joso j’elongi eke,
Ende ifeza mboka ekawe nda joso likawe.
28Nsosolo, nsangel’inyo, L’iy’auma baotswaki l’amato, nk’onto olekola Yoane owa Wini: lolo osamba lokumo nda likulaka ja Nzakomba aolekol’ende. 29Ko ak’iy’ookaka, bant’auma ko la batakanyi ba mpuci, baolongya Nzakomba; ek’iy’oinamaka l’inelo ea Yoane. 30Lolonde Bafalusi la batefeji ba bisekyelo baotendola wango wa Nzakomba el’iyo mongo, ek’iyo ntabinama la Yoane. 31Emi nsonganya banto b’eotswelo ene la na? 32Bale ngole banolu bakit’ase nd’itenela y’esombi, ko betana, bakela, Tulelak’inyo, lolo inyo ntaloinaki boina; tolelaki el’inyo, lolo inyo ntalulaki nkimo ea lilelo. 33Yoane owa Wini ayaki, ko ntaleki mampa, ko ntamelaki basanga; ko lokela, Ende ale la demona. 34Bona ow’onto ayaki, ayole ko ayomele, ko inyo lokela, Bala bolei owa toma, la bomeli ow’asanga, boseka wa batakanyi ba mpuci la bant’obe. 35Lolo wanya bolonga la bana’akae bauma.
36Ko Bofalusi omo aoloeta wete ale toma l’ende. Ko aolotswa nd’ilombe ya Bofalusi, ko aokit’ase nda mesa ea toma. 37Ko bala, bomoto owa bonanga’oko oki ow’obe; ko aki’nd’oea wete akokit’ase nda mesa ea toma nd’ilombe ya Bofalusi, aoyela ekucu ea alabasitolo e’auta ba mpimbo, 38ko aolemala nd’afeka ntutama l’akaka’akae, aolela la mpisali, aanga losola bakaka’akae la mpisali, ko aoluol’ako l’abwo b’otsa’okande, ko ayofomwa bakaka’akae la mbebu, ko aobis’ako l’auta ba mpimbo. 39Ko Bofalusi ondoetaki, aki’nd’oenaka ngoko, aotefela l’ende mongo, Ng’ont’one ale boteli, siki aokotola elenge ea bomot’one ondofomwa wae ale ow’obe. 40Ko Yesu aolamba, aolokela, Simona, emi nde la joi wae nkosangele we. Ko aokela, Bolaki, sangaka. 41Aokela, Bosombyi’omo aki l’ant’afe baki l’embale l’ende; omo aki l’ende bombale francs benkam’etano, ko onkina francs ntuku itano. 42Ak’iyo ntabaata bosolo osiz’embale, aolafofeza bembale iy’ak’afe. L’iy’ak’afe, ondook’eefe endekola na? 43Simona aolamba, aokela, Ntanga wae ende oki’nd’ofofezaka bombale bolekol’onene. Aokela, Okaola o ci. 44Ko aokengwana ele bomoto, aokela, Simona, wena bomot’one? Njotswaki nd’ilombe ike, ntonka basi b’akaka’akami, lolo ende aosola bakaka’akami la mpisali ikae, ko aoluol’ako l’abwo’akae. 45Ntonsambela la baiser: lolo ende, lim’aki’m’otswaka, atafambya lofomwa bakaka’akami la mbebu. 46Ntoisa botsa’okami l’auta: lolo ende aoisa bakaka’akami l’auta ba mpimbo. 47Wete nkosangela, beketo bekae bi’obe bele beuke, ko aotungwa lim’ako: el’ende aolok’eefe euke: lolo os’otungwa lim’eketo bi’obe bef’euke, ok’eefe nk’isisi. 48Ko aokel’omoto, Otungwa lim’aoyi’obe bake. 49Ko banto bakokit’ase l’ende nda mesa ea toma baanga lokela el’iyo mongo. One otungol’anto lim’aoyi’obe ale na? 50Ko aokel’omoto, Imeezo eke eokoikya; kenda la kuci.
Currently Selected:
Luka 7: NTMN58
Highlight
Share
Copy
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
