Matayo 18
18
1ND’EKEK’EKO bakimi baoy’ele Yesu, bakela, Oleki nda likulaka ja loola na? 2Ko Yesu aolet’el’ende inkune, aoloemya nd’etei ekiyo, 3ko aokela, Nsosolo, nsangel’inyo, ayak’inyo lofoututala baoyi’obe, ko lofoyaleme ngole tonkune, lofaotswa nda likulaka ja loola nye. 4Nd’ewela eko, ondasots’omongo ngol’inkun’ine, end’aleki nda likulaka ja loola. 5Os’oamba inkune ng’ine nda lina likami aonjamb’emi. 6Lolo okunumwez’omo owa bane ba tosisi banjimez’emi, bolotsi el’ende wae balembe ekenje ea nene eminyol’asangu nda nkingo ekande, ko bolinza nda njindo ea lieke. 7Elo ele benanga beuma nd’ewela ea bikunumwelo! Bikunumwelo bifoya nsosolo; lolonde elo ele bont’oko ondieza biko! 8Nga likata likawe, nkina likaka likawe likokunumweza, tena liko, ko boka lim’ele we; oleki’olotsi ele we wae wotswa nda loiko l’olema nkina botengu, afa wae wusame nda tsa totasilaka l’akata bak’afe nkina bakaka bak’afe. 9Ko nga liso likawe likokunumweza, tokola liko, ko boka lim’ele we, bolotsi ele we wae wotswa nda loiko la liso limoko, afa wae wusame nda Ngena ea tsa la baiso bak’afe. 10Loalaka, nyango lofotengwel’omo owa bane ba tosisi; el’emi nsangel’inyo, bikima bikiyo nda loola benak’elongi ea Fafa ekami ole nda loola. 11[Bona ow’onto aoy’oikya ocwaki.] 12Okanel’inyo na? Nga bonto aata mpate bonkama, ko emo eocwa, afocike mpate ntuku ibwa l’ibwa, ko aocwa nda ngongo oasa mpate ecwei? 13Wenaka atan’eko, nsosolo, nsangel’inyo, ekemo endok’ende nd’ewela ea mpate ecwaki eolekola ekemo endok’ende nd’ewela ea mpate ntuku ibwa l’ibwa itacwaki. 14Eleng’eko, Ise ekinyo ole nda loola afolange wete omo owa bane ba tosisi afitane.
15Nga lilongo likawe akokeele joi j’obe, kenda y’osangel’ende joi likae j’obe, we l’ende kika; nkin’akokoza, oata lilongo likawe. 16Lolonde nkin’afokokoza, tomba la we bont’omo, nkina bant’afe, wae baoyi’auma bezama la bemwa bia bandoka bafe nkin’asato. 17Ko nkin’afokoz’iyo, sangela ba-ekelesia ea Nzakomba: nkin’afokoza ba-ekelesia, kel’end’ayaleme ele we nga bont’ofea Nzakomba l’otakanyi owa mpuci. 18Nsosolo, nsangel’inyo, baoyi nko loswele batungy’inyo nd’okili bifotungama nda loola; ko baoyi nko loswele batungol’inyo nd’okili bifotungwa nda loola. 19Lenkina nsangel’inyo, nkina bam’akinyo bafe baamane nd’okili nd’eloko ea joi linduol’iyo, joi liko lifokelam’el’iyo la Fafa ekami ole nda loola. 20Etakana bant’afe nkin’asato nda lina likami, emi nd’eko nd’etei ekiyo.
21Nkako Petelo aoya, aolokela, Nkolo, lilongo likami ankeele joi j’obe, ndotungole betungola benga? Elaka nko betungola nsambo? 22Yesu aolokela, Emi mpokokele we, elaka nko betungola nsambo; lolonde elaka nko betungola ntuku nsambo ya nsambo. 23Nd’ewela eko, likulaka ja loola josongana la Bokulaka omo owa roi olanga loandola bembale bia bakwala’akande. 24Aki’nd’oanga loandola, baoloyela omo oki l’ende bombale batalento kese. 25Aki’nde ntaat’aumba osiza bombale, nkolo ekande aokela wete botekya ende la waji’okande l’ana, ko la baumba baki’nd’oataka bauma, ko basiza bombale. 26Nd’ewela eko, bokwala’oko aolotataanela, ko aoloonda, akela, Nkolo, ik’otema nd’eloko ekami, ko njitosiz’ombale nye. 27Nkolo ea bokwala’oko aolok’ende isei, aolotungola, ko aolofofeza bombale. 28Lolonde bokwala’oko aolola, ko atana bokwala’omo oki l’ende bombale francs ntuku ibwa; koko aolokanda, aolominya nd’ongongo, akela, Siza bombale ndats’emi la we. 29Bokwala’oko aokwa nd’akaka’akande, aoloonda, akela, Ik’otema nd’eloko ekami, ko njifosiza bombale nye. 30Ko ende ntalanga; lolo aocwa ous’ende nd’ilombe ya njanga, elaka nko asiz’ombale. 31Aki bakwala’amo oenaka baoyi bakelamaki, iyo baoloka lokeseli mongo, ko baoy’osangela nkolo ekiyo baoyi bandielaki bauma. 32Lim’ako nkolo ekae aoloeta, aolokela, We bokwala ow’obe, nkotungolaki we lim’ombale’oko bouma, eki w’ombondaka; 33we ntotokela bokwala’oko isei, ngoki’m’okokelaka we? 34Ko nkolo ekande aololemwa, aololekya ele basisozi, elaka nko asiz’ombale bouma fe. 35Ayaka wengi’ont’okinyo afotungole lilongo likae lim’aoyi’obe l’otema, Fafa ekami ea loola ifokeel’inyo nk’eleng’eko.
Currently Selected:
Matayo 18: NTMN58
Highlight
Share
Copy
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
