Tomo Ya Batomomu 2
2
Loyo loa Bolimo Botanu
1Limɔ ayaka lise lia Pentekosete, liko lise lioücha buka wa eula, beoto bayalaka amamwito nda elela ɛmɔi. 2Futuku elundi efi losokwa nda use kwa mbo fömba bitoeta, yao lotumesa ndakɔ etotina olo ayalak’iyo. 3La iyo lɔɛnɛ ndame kwa eya bösä ebisokaelakana, lɔmɔi lɔmɔi loaa se ende boto la boto wau, 4la batotina lotumesomoko la Bolimo Botanu, la iyo yaatotina loakola ndoonga la baoi ba kanda yasi kwa afaefaka Inde ofaef’iyo baölo boonga.
5BaYuda to balimelaka nda Yelusaleme, balitesi ba Mungu ebasokwaka nda biese bitotina ya wenda. 6Okanakä to etondo-ye iyo losɔngɔmɔ etanda efi ya bato, iyo loeyaeya finɛ ani okak’iyo beoto batoonga ngɔlu ya oto la oto, 7la iyo lowa liena, iyo lɔmwaala, iyo loonga mbo— ¿Tɛnɛ ngo, ebatoonga-ba bati ba Ngalilai? 8¿Monito iso totooka boto la boto ngɔlu eyande eyaotomoko lande? 9Twende BaPalatia, BaMedea, BaElama, la ebayali nda yese ya Mesopotamia, BaYudea, BaKapodokia, l’Eba Ponto la Asia, 10BaFulugia, la bato ba Pamfulia, ba Ejipeto, ba yese ya Libwe tina la Kulene, la bato ba fɛtɛti ba Loma la BaYuda la eba ndimela, 11la bamɔi ba Kulete, la BaAlaba, iso yaatotina tosooka iyo batoonga la baoi basu angɛnɛ ko tokesa twa Mungu. 12Iyo lowa to liena batotina, iyo lowa toloi, iyo lofelakana mbo— ¿Litina moni nda loasɔ-lo? 13Nde bamɔi lomuchamucha, iyo mbo— Basookanelo la bänä bayai.
Inango sha Petelo
14Kongo ko Petelo loemesana l’eba liu la ɔmɔi, inde lokusola limiki liande, inde loonga lau baölo mbo— Ino bato ba Yudea la batotina ebaingali Yelusaleme kwani, eloasɔ-lo loluwaneke lanu la ɔtɛsɛkɛ baoi bami ko nda batoi banu, 15eoka ebato-ba batiwe bänä, kwa atoenyel’ino, eoka ele ko bonyanya oku; 16kongo ko löle ngo ko loao eloatɔndɔlɔkɔ Yoele ewa Bɔtɔndɔli mbo— Mungu asoonga mbo,
17Nda bacho ba liko, yɛwɛlɛkɛ Bolimo wami ende balomboki batoti;
La bana banu batolome la batomali bɛtɔndɔlɔkɔ,
La tosenge twanu bɛnɛkɛ baɛni,
La biuwa yanu betaka saki;
18Eingo, yewɛlɛkɛ Bolimo wami la bacho bana
Ende bɛkɔwa yami batolome la batomali, la betɔndɔlɔkɔ.
19Yetambaka tokesa nda use likolo,
La ndembe ya bisisho nda nyɛlɛ ose,
Bakila la bösä la ngungu ya bölïlya.
20Liso lia use likinjwaka nde lilima
La tengai etufaka kwa bakila,
Oso wa loyo loa lise lina lifi lia Ngɛnɛ Mungu elitoɛnɛlɛ swa.
21Nde oyakasingweke lina lia Ngɛnɛ, inde kouwesomoko.
22Ino BaIsalaele, okaka ebaoi-ba mbo Yesu wa Nasaleta Inde oyalembeelesaka Mungu elembeeles’ino ko la tokesa la befoka ya bisisho la ndembe eyakelaka Mungu ko lande sisi yanu, kwa aluw’ino angɛnɛ, 23Inde kongo, oyawambomokö la likomyi la loluwo loa Mungu, ino nd’awachak’Inde nda lieka, ososɛɛsɛlɛs’Inde ko la besamba ya bato ebatilitese bikela; 24Mungu asotɛmwɛs’Inde nda liwa, asofaikola tokängë twa liwa eoka atikɔkɔlɛ ndokanjomo la liao. 25Dawidi loonga loasɔ loande mbo—
Yɛnɛkɛ̈ Ngɛnɛ oso wa baiso bami bacho batotina,
Eoka ayali nda bosamba wa olome wami mbo italɛlɛlɛlɛ;
26Eokao botema wami bosoomala la lolame loami losoyaimwa la limɛngɔ,
La lokomba loami imɔ lotoyalaka l’iyeli sha liwawi,
27Eoka oitomacha bolimo wami nda ewelo,
La oitomacha oyasamomu laɛ mbo ɛnɛkɛ liɔli lia liwa.
28Osɔɛnɛsɛ’mi mboka ya liwawi,
Ototumesa botema wami la linɛngina oso wa baiso baɛ.
29Beoto, isokɔkɔlɔ oonga lanu fololo loasɔ loa Dawidi ngau wasu mbo awaka la aombomoko la losai loande lokoyali ono eyasu konda eweuse. 30Kongo ko ayalak’inde bɔtɔndɔli la eoka mbo aluwaka mbo Mungu atinyaka ekanɔ yosɛlɛ ɔmɔi wa lioti liande Bɔkɔta, 31ongoma Dawidi lotaluwa la atɔndɔlɔ̈kɔ̈ eoka ya losokwo loa Yesu nda liwa, mbo atiamachaka bolimo wande nda ewelo ango mbo bindo yande ndoɛnɛ liɔli lia liwa. 32Yesu-yo kongo nd’asokusolomo la Mungu nda liwa ko la liwawi la iso-ba nd’ayali ebɛnɛkɛ̈ loasɔ-lo. 33Ataliomoko Inde tala ko la bosamba wa Mungu, atikelomöko lisakä lia Bolimo Botanu ko la Sango, eokao asowɛlɛ kwani loao elosɔɛnɛ la elosok’ino. 34Dawidi atiakɛndɛkɛ likolo nda use, nde inde angɛnɛ loonga mbo—
Bɔkɔta Mungu loonga la Bɔkɔta wami mbo— Yalaka se
Nda fangi ya bosamba wami wa olome,
35kond’akateke Imi
Baiyani laɛ kwa esolo ya batindi baɛ.
36Eokao tukela etotina ya BaIsalaele baluweke fololo mbo Mungu asotalia ngo ko Yesu-yo, oyaolak’ino nda lieka mbo Ngɛnɛ la Masiya.
Lilufi lia oso lia Etanda
37Okaka bato ebaoi-ba, iyo lokaka betema wäle finɛ, iyo loonga la Petelo la batomomu ebamɔi mbo— ¿Tokeleke to moni? 38Petelo loonga lau mbo— Kalanganaka la lufiomoko ino yaatotina nda lina lia Yesu Masiya eoka ya limɛsɛli lia batwanelo banu limɔ bɔɔlɔkɔ lifaefi liko Bolimo Botanu, 39eoka lisakä lile lianu la elia bana banu la elia batotina ebayali esika ebatotaka Mungu wanu ot’iyo lioi. 40Ko la baölo basi wike inde lokambes’iyo la inde lofumbes’iyo mbo— Uwesomoko nda fɛtɔ-ye ya bato ebatiengane. 41Ongoma ebimelaka inango shande, iyo lolufiomo, la nda lise lina bato bilɛfu isatɔ lowatema lau, 42Iyo lokɔkɔmɔ kɔkɛ ko la liekesi lia Batomomu la lisukani lia beoto la nda liuni lia lituma la nda basomboli.
43Bato batotina lokwelo bɔwa la ndembe ya bisisho wike yakelomoko ko la Batomomu. 44Batotina ba liimeli losɔngɔkɔmɔ la iyo lokaana bieto yau bitotina, 45la bilanga la biengo yau, iyo loungekesa yao, iyo lokaana la basi batotina kwa aenoko oto. 46Lise la lise iyo lɔɔtɔkɔkɔ nda Ndakɔ ya Mungu amamwito, iyo lounaka lituma la ndakɔ la ndakɔ yau olo alak’iyo bieka la bɔfɔɔmu la limɛngɔ nda betema; 47iyo loinakela Mungu, la bato batotina loyalana lau la booto. La Ngɛnɛ lowatekemesa lau ko ebatouwesomo lise la lise.
Currently Selected:
Tomo Ya Batomomu 2: NTKE58
Highlight
Share
Copy
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.
