Yoane 13

Yesu losoola batindi ba baeki

1Loaaka nde oso wa Elambɔ ya Lieti mbo Yesu aluwakä mbo mbile esoya eyetosokwa lande nda wenda-bo ndoinwa ende Sango; asamaka nde baina lande nda wenda-bo, Inde lɔɔlwa osamak’iyo hɔlɔɔ. 2Alak’iyo bieka ya ocho, ani Satana asosila ndofɔɔlɔ botema wa Yudasi wa Keliote, wana wa Simona, mbo awambeke Yesu, 3l’ani Yesu aluwakä mbo Sango asofaef’Inde bitotina nda besamba yande, la mbo asokwak’Inde ende Sango la mbo atoinwa imɔ ko ende Sango, 4limɔ Inde losokwa nda bieka, Inde lowatola kanjo, Inde lɔɔsɔ itambala ndowata shao nda lɔtɛta. 5Inde lɔwɛlɛ balia nda isako, Inde loakola okasöökole batindi ba baeki bande la ndɔɔmbɔkɔlɔ bao la itambala esiwati Inde nda lɔtɛta. 6Nde iyak’Inde ende Simona Petelo, Petelo loonga lande mbo— ¿Ngɛnɛ, Aɛ nd’atosööla batindi bami? 7Yesu lomutola lande mbo— Elotokela nde Imi kwani, otiluwe, nde mbisa boluwaka nde litina. 8Petelo loonga lande mbo— Otiasööle batindi bami ko layalaya. Nde Yesu lomutoel’inde mbo— Eyambo itisööle aɛ, ambo otisangane lami. 9Simona Petelo loonga lande mbo— Ngɛnɛ, inga to batindi bami kongo, kangä imɔ besamba la botö. 10Yesu loonga lande mbo— Oyasokwa ikuli ati la boeno bosöölomo, sakolo ko batindi, nde asotana bindo fee; ino nd’atani nde inga to batotina. 11Eoka aluwaka nde oyakawambek’Inde, ko la litina-li Inde mbo— etiango ino yaatotina nd’ayali batanu.

12Asilakä Yesu ndosööla batindi bau, Inde lowata esinda yande, Inde loyala se liasi; Inde loonga lau mbo— ¿Oluwi nde litina lia loao elosokeela’mi okeel’ino? 13Ino osotanga’mi mbo Boekesi, la Ngɛnɛ, ongoma osokela olau eoka yende ongoma. 14Eya to mbo Imi ako Ngɛnɛ la Boekesi, nd’asosööla batindi banu, ambo lole lanu ndosöölana batindi. 15Isotamb’ino etichelo, mbo ino imɔ okeleke kwa akeliki nde Imi end’ino. 16Wewe, wewe itoonga lanu mbo bɔkɔwa aitolongela ngɛnɛ wande la oyatomomu aitolongela oyatom’inde. 17Boluwa to njasɔ-bi, wende la limɛngɔ ani otokɔcha to yao. 18Itionge to loasɔ loanu yaatoti, isoluwa ebasoaa’mi ndoaa iyo, nde yende kwa atomoko nda Lokasa mbo bikɔchɔmɔkɔ biko mbo— Oyasola lituma liami, atoilia Imi la batindi. 19Isokambes’ino loao ko kwani, oso ani lokayi, mbo akayeke loao, ino koimela mbo Imi nd’ayali ko Inde kongo. 20Wewe, wewe itoonga lanu mbo— Oyatoaela oyakatomeke’mi, ambo aeli nde Imi angɛnɛ; la oyatoaela Imi, ambo aeli nde Inde oyatomakä Imi.

Yudasi losokwa nda Elambɔ

21Aongaka Yesu ongoma Inde looka ngandi finɛ, Inde loonga liölo mbo— Wewe, wewe itoonga lanu mbo ɔmɔi wanu nd’atowamba’mi. 22Limɔ baeki lotichakana, iyo lotana fee mbo ndai wau asoongelomo lande. 23Ɔmɔi wa baeki bande ako oyasamomu la Yesu, aɛkɛmɛkɛ nda bokuku wande; 24Simona Petelo lomekoel’inde mbo akambeseke to inde oyatoongomo la Yesu. 25Aɛkɛmɛkɛ to inde tina la bokuku wa Yesu, inde loonga lande mbo— Ngɛnɛ, ale to ndai? 26Yesu lomutola mbo— Ale boto ona oyatofaefami ofaef’inde yaki eyetolufiela’mi; la Inde lolufia yaki ya lituma nda bosusu limɔ Inde lofaefa Yudasi wana wa Simona wa Keliote. 27Mbisa ya yaki, Satana lɔɔtɛlɛ Yudasi. Yesu loonga to lande mbo— Elotokel’aɛ, kelaka oko lisasaya. 28Nde angwɛnɛ ɔmɔi wa ebayalaka nda bieka oyaluwaka litina eliaongaka Yesu lande; 29bamɔi loenyela mbo Yesu loonga lande mbo— Sombeläk’iso yao ebile lasu la boeno nda Elambɔ; kwa mbo afeke eba touwe bieto, eoka Yudasi atolaka sanduku ya bieto. 30Ongoma aelaka Yudasi yaki la lituma, kwaamao inde louma lousa la yaaka mbile ya ocho.

Baoi ba Yesu ende Baeki bande liu la ɔmɔi

31Asilaka Yudasi ndokuswa, Yesu loonga lau mbo— Kwani Wana wa boto asotaliomo tala, la Mungu imɔ asotaliomo imɔ ko lande, 32la Mungu etaliomo ko lande, Mungu imɔ atotalia Inde tala eyande angɛnɛ la atotalia Inde kwanikwani. 33Bana ba booi, ko mbile sinyo Imi ikoyali lanu, bolukaka’mi nde kwa aongaka’mi la BaYuda mbo— Olo akaɛkɛ lami, ino botiakɔkɔlɛkɛ ndoya; kwa atoonga’mi lanu imɔ ko kwani. 34Isofaef’ino ekela eyai, eko mbo— Samanaka, kwa asosama’mi osam’ino. 35Bosamakana, ambo lisamakani lianu koyala ndembe yoluwesa bato batotina mbo wende baeki bami.

36Simona Petelo loonga lande mbo— Ngɛnɛ, ɔtɔkɛ to anima? Yesu lomutola mbo— Olo atɔkɛ lami, aɛ angokɔkɔlɔ otuta’mi kwani, nde botutaka mbisa. 37Nde Petelo loonga lande mbo— ¿Ngɛnɛ, monito itikɔkɔlɛ ndotut’Aɛ ko kwanikwani? Yemachaka nde liwawi liami ko l’eoka yaɛ! 38Yesu lomutola mbo— ¿Bomachaka nde liwawi liaɛ ko l’eoka yami? Wewe, wewe itoonga laɛ mbo— Kɔkɔ angota lɔkɔkɔlɔkɔ oso ani okaanganyi’mi baanganya basatɔ.

Currently Selected:

Yoane 13: NTKE58

Highlight

Copy