Yoane 3

Lioi lia Yesu ende Nikodemo

1Yaäkä boto wa BaFalusi, lina liande liko Nikodemo, ayaläkä Bokumi wa BaYuda. 2Boto-yo loya ende Yesu la ocho, inde loonga lande mbo— Labi, toluwi nde mbo wende Boekesi oyasokwi ende Mungu; angwɛnɛ to boto angɔmɔi wokɔkɔlɔ okelaka ndembe ya tolombo ebitokelak’Aɛ, sakolo ngo Mungu koyala lande. 3Yesu lomutoel’inde mbo— Wewe, wewe, itoonga laɛ mbo, Sakolo ko boto kootomo lɔɔtɔ loa Use, ani inde angokɔkɔlɔ ndɔɛnɛ Bɔkɔta wa Mungu. 4Nikodemo loonga lande mbo— ¿Boto kokɔkɔlɔ nde ndootomo ani asoya inunu la moni? Atokɔkɔlɔ ndɔɔtɔ liasi nda sɔlɔ ya nyango wande la ndootomo? 5Yesu lomutola mbo— Wewe, wewe, itoonga laɛ mbo, sakolo ko boto kootomo la balia la Bolimo, ani aitokɔkɔlɔ ndɔɔtɔ nda Bɔkɔta wa Mungu. 6Eyeotomu la bindo, ele ko bindo, la eyeotomu la Bolimo, yende ngo Bolimo. 7Omwalëke mbo iongiki mbo— Loengani nde lanu ndootomo lɔɔtɔ loa Use. 8Lofofo lotofofa l’olo l’olo atosanga loao, la otoka limiki lia loao, nde otiluwe olo asokwi la loao, kwa olo atɔkɛ la loao; lole ongoma la boto la boto oyaotomu la Bolimo.

9Nikodemo lomutoel’Inde mbo— ¿Lotokɔkɔlɔ oyala ongoma moni? 10Yesu lomutoel’inde mbo— ¿Aɛ wende Boekesi wa Isalaele, nde otiluweke eloasɔ-lo? 11Wewe wewe, itoonga laɛ mbo tosoonga ko baoi ebasoluwak’iso, la tosokambekesa bato ko yao ebisɔɛn’iso; kongo ko ino botikulye inango shasu. 12Yekambes’ino eya ono se ani otiimele; ¿Otoimela to moni eya Use ebitokambesa’mi ino? 13La angwɛnɛ imɔ boto oyasoilama nda Use, sakolo ngo ko Inde oyasosulwa se nda Use, ako Wana wa Boto angɛnɛ. 14Kwa iläkä Mɔsɛ njɔ nda liɔmbɛlɛ, ongoma loengani la Wana wa Boto mbo Inde ilomoko imɔ koilomo, 15ko mbo oyakalendeloko Inde ɛɔlɔkɔ nde liwawi lia loiko.

16Mungu asamäkä to bato ba wenda la losamɔ loeta, eokao afäkä Wana ɔmwitoto wande mbo oyatolendelo Inde, atiangosɛɛsɛlɛkɛ, kongo ko ɛɔlɔkɔ nde liwawi lia loiko. 17Mungu atiatomäkä Wana wande nda wenda ko mbo afeke bato ba wenda se, kangä mbo eba wenda buwesomoko ko lande. 18Oyakalendeloko Inde, aitofomo se, nde oyatialendeloko Inde akofomo se ko kwani, eoka atilendelo lina lia Wana ɔmwitoto wa Mungu.

19Lifomu se lina lile mbo löwa losoya nda wenda, kongo ko bato basosama lilima la losamɔ loeta eloa löwa, eoka bekeeli yau bende imɔ ibe. 20Eoka boto la boto oyatokelaka bekeeli ya bɔwɛwɛ, atɔɛnɛ löwa mbo bobe, la aitoyaka nda löwa mbo bekeeli yande bitatombolomo; 21nde inde oyatokelaka ko eya wewe, eyaka nde nda löwa, mbo bekeeli yande yɛnɛlɛkɛ fololo mbo bikelomu l’isosha sha Mungu.

Yesu nda yese ya Yudea

22Mbisa yamao Yesu la baeki bande lɔkɛ nda yese ya Yudea la Inde lolengela omao amamwito lau, Inde lolufia bato. 23Yoane imɔ lolufiaka bato omao nda Ainona tina la Salema eoka balia baaka wike omao, la bato lɔkɛsɛkɛnɛ end’inde ndokalufiomo, 24ani Yoane akakushomu kɔni nda bɔnyɔlɔlɔ. 25Ongoma baeki ba Yoane la BaYuda bamɔi lofenyakana lioi loasɔ loa lisooli liko lilufi, 26la iyo lɔkɛ ende Yoane, iyo loonga lande mbo— Labi, tɛnɛ ngo, Inde oyaaka laɛ fangi y’ona ya Yaledene, oyaongelak’aɛ eongel’Inde, atolufia bato la batotina batokɛkɛ end’Inde. 27Yoane lomutola mbo— Boto angokɔkɔlɔ ndɔsɛlɛ isosha sakolo ko mbo shao kofomo inde ko la Use. 28Ino angɛnɛ nd’atokɔcha lioi liami mbo iongiki mbo— Imi iti Masiya, kangä mbo yatomomökö oso wande. 29Oyaundi bowai, ende ko bɔsɔngi; nde wina wa bɔsɔngi oyatoemala lande, atookaka inde lioi liande, inde koomala finɛ eoka ya limiki lia bɔsɔngi; eokao limɛngɔ liami nda loasɔ-lo lisɔɔlɔlɔ hɔlɔ. 30Loengani nde lande mbo asɛngɛkɛ, nde lami mbo yɔndwɛkɛ se.

31Inde oyasokwi nda Use nd’alongeli batotina; nde oyasokwi ono se, nd’ayali ewa se la inde nd’atoonga eya ono se. Inde oyasokwi nda Use nd’alongeli batotina, 32la atoluwesa bato yao ebiɛni la ebiokak’Inde, kongo ko angwɛnɛ boto wokulya inango shande. 33Oyatoimela inango shande, ambo ona asokɔcha lioi mbo Mungu ende wewe. 34Oyatomomökö la Mungu, nd’atoonga inango sha Mungu la Mungu nd’atofaef’Inde Bolimo wande l’angwɛnɛ ikai. 35Sango asoniya Wana la asɔsɛlɛ bitotina nda bosamba wande. 36Oyatolendelo Wana, ambo inde ayali la liwawi lia loiko, nde oyatotefola Wana, atilɛnɛkɛ liwawi, nde efango ya Mungu esɔɔnwelɔ inde.

Currently Selected:

Yoane 3: NTKE58

Highlight

Copy