Luka 14
14
Ebiaongomökö nda ndakɔ ya BoFalusi
1Nda lise limɔi lia Yenga, ayaläkä Yesu nda ndakɔ ya Bokumi ɔmɔi oyäkä BoFalusi, iyo lolamb’Inde la shɔngɔlɔ; 2boto ɔmɔi oyaäkä la lokambo loa eila lɔɛnɛlɛ oso wande. 3Kwaamao Yesu lofela Bekumi la BaFalusi mbo— ¿Engani nde la Bikela ndosäsesa boto la lise lia Yenga kwa angoengana? 4Kongo ko iyo loyala tau. Limɔ Yesu lounda boto, Inde losäses’inde, Inde lomach’inde akɛkɛ. 5Limɔ Inde loonga lau mbo— ¿Ndai wanu, eya mbo funda yande angoko mbolo yande ekwa nda liulu nda lise lia Yenga, oitosaola yao lisasaya? 6Batiakɔkɔlɔ̈kɔ̈ ndomutoel’Inde nda loasɔ-lo.
7Limɔ Yesu lotela bato ebatomökö lioi nda elambɔ bombila ani ɛnɛ̈k’Inde mbo iyo lokalukake kangala ebieti olau, Inde mbo— 8Botomo lioi nda elambɔ ya lisɔngɔni, oyalëke se nda kangala eyeteli, eoka eluwa boto wa lokuku eloeteli eloaɛ, atatomo imɔ, 9limɔ ngɛnɛ wa elambɔ oyati l’aɛ lande lioi, ataoyaonga laɛ mbo— Faefaka boto-yo kangala-ye; limɔ aɛ angɛnɛ otoemala la sɔni okayala se nda kangala eyetikali liili.
10Nde botomo lioi nda elambɔ, kɛndɛkɛ okayala nda kangala ya liili mbo akayek’inde oyati aɛ lioi, inde koonga laɛ mbo— Wina, yauku l’ono nda kangala eyeti. Ongoma ototɛmyɔmɔ nda baiso ba batotina ebatoyalana laɛ nda elambɔ. 11Eoka boto oyatotaliak’inde angɛnɛ, ɛɔndwɛsɔmɔkɔ se hɔndwa, la oyatoɔndwa se inde angɛnɛ, etaliomoko tala.
12Lamao Inde loonga la boto oyatäk’Inde lioi nda elambɔ mbo— Bokela elambɔ, kwa la löwa, kwa la ocho, otëke baina laɛ, kwa bitungani yaɛ, kwa beoto yaɛ, kwa bafoka ebayalani laɛ, eoka mbo batata imɔ ko aɛ lioi eyau, l’ano batosakanesa loasɔ. 13Kongo ko, bokela elambɔ, taka eba touwe, la ebitukulu, la eba bikoti, la eba betuku, 14limɔ otoyalaka la limɛngɔ fuu eoka bati ango la yeka yoinel’aɛ; nde otoinolomo yao nda bakuswelo nda liwa ba eba liengani.
15Okäkä boto ɔmɔi w’ebayalanäkä lande nda bieka ebaoi-ba, inde mbo— Boto oyatola bieka nda Bɔkɔta wa Mungu eyalaka nde la limɛngɔ fuu. 16Yesu loonga lande mbo— Boto ɔmɔi akeläka elambɔ efi la atäkä bato wike lioi; 17enganäkä mbile yola inde lotoma bɔkɔwa wande okaongake l’ebatomökö lioi, mbo— Yauku, eoka bitotina bisoela. 18Nde iyo yaatotina lisanga loakola ndolukä litina liofeka ndoya. Oyo wa oso mbo— Isombiki nde elanga, isɔkɛ okaticha yao, isosombol’aɛ mbo imɛsɛlɔmɔkɔ. 19Wasi mbo— Isombiki mbolo bɔɔmwi ya likuwa, isɔkɛ okakotesa yao, isosombol’aɛ mbo imɛsɛlɔmɔkɔ. 20Wasi mbo— Isosɔngɔ wali, eokao itikɔkɔlɛ ndoya. 21Ongoma bɔkɔwa loinwa, inde lokambesa ngɛnɛ wande njasɔ-bi. Limɔ ngɛnɛ wa ndakɔ loonga la bɔkɔwa wande mbo— Kɛndɛkɛ mangu nda mboka la toloto, eshaka l’ono eba touwe, la e’bitukulu, la eba bikoti, la eba bituku. 22Limɔ bɔkɔwa loonga mbo— Ngɛnɛ, losokelomo kwa akambesi aɛ’mi, nde elela ekosandelu se. 23Ngɛnɛ loonga la bɔkɔwa mbo— Kɛndɛkɛ nda balabala la biëli okatinjak’iyo mbo baɔtɛkɛ, litina mbo ndakɔ yami etumeke 24eoka isoonga lanu mbo, Angwɛnɛ angɔɔmɔi w’ebatomökö lioi nde kooka elala ya elambɔ yami.
Baoi ba Yesu nda lɔkɛndɔ
25Bikuke ya bato wike bakɛsɛnɛkɛ lande; Inde lokikwa end’iyo la Inde loonga lau mbo— 26Boto eya ende’mi, nde angoiyela sango wande la nyango, la wali, la bana, la bitungani, la baelo, imɔ ko la liwawi liande angɛnɛ, ambo atikɔkɔlɛ oyala boeki wami. 27Boto oyaitotolaka lieka liande angɛnɛ oyatuta’mi, ambo atikɔkɔlɛ oyala boeki wami.
28Tɛnɛ, ɔmɔi wanu esanga ndoswaka ndakɔ ya botalemu efi; ¿aitotayalaka se ndotangaka loketi loa bieto mbo atayala la yao yoengana ndosilesa liswi lia ndakɔ? 29Aenaka ongoma, ani atoakol’inde ndoswa batalɛ nda nyɛlɛ, lamao angokɔkɔlɔ ndɔɔlɔlɛsɛ ndakɔ, limɔ akɛnɛkɛ bato ongoma, iyo komuchamucha la twɛlɔ, iyo koonga mbo— 30Boto-yo aakoläkä ndoswa ndakɔ efi nde atikɔkɔlɛ ndosilesa yao.
31Loasi imɔ; bokota oyatɔkɛ okanana bita la bokota wasi; ¿Aitotayala se ndoenyakela kwa mbo atokɔkɔlɔ ko la bato bilɛfu liu okanana la bokota wasi oyatoyatowana lande la bato bilɛfu kama imbale? 32Nde eyambo atienyele ongoma, limɔ, akoyali oyɔmɔi esika, atotoma ikomya sha wange okafela likomyi liotinya lokele.
33Ko ongoma, boto wanu oyaitosɛnyana la eyande bitoti, aitokɔkɔlɔ ndoyala boeki wami.
34Bokwa bole to olau; ¿Nde eya to mbo bokwa botemba shokana, botokana shokana liasi l’iye? 35Botiengan’imɔ yeka, kwa ndota nda nyɛlɛ, kwa nda liɔlɔ; bato batokusha wao tungi. Oyale la batoi booka, aokeke!
Currently Selected:
Luka 14: NTKE58
Highlight
Share
Copy
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.
