Luka 2

Liotomu lia YESU

1Yaäkä nde la bacho bana mbo Kaisala Auguseto atäkä ndola mbo bato ba wenda bototina batomoko baina nda lokasa lotanga loketi loau. 2—lotango-lo loa oso loatangomökö ani Kuliniu aakä Gouverneur wa yese ya Sulia.— 3Eokao bato batotina lɔkɛ okata lina nda lokasa, oto la oto nda okenge wande angɛnɛ. 4La Yosefa imɔ losekwa nda yese ya Ngalilai, nda okenge wa Nasaleta okakɛ nda yese ya Yudea konda okenge wa Dawidi boko Betelehemu, —eoka aakä wa bofindi wa bɔkɔ̈kɔ wa Dawidi— 5ndokatä lina liande amamwito la Malia oyakɛ̈kɛ̈ lande liäla, la ojaakä la lieme. 6Ayaläk’iyo omao mbile yande yoota loengana, 7la Malia lota wana otolome wa oso la inde lolingela wana la bisinda yokandak’inde la inde loingesa wana nda bombeya, eoka batiäkä la elela nda ndakɔ ya eba kɛndɔ.

Bakitomo la betingani ya bɛkɔkɔ

8Nda yese ena betingani ya bɛkɔkɔ baingaläkä lousa nda elanga ndolamba liasa lia bɛkɔkɔ yau la ocho. 9Limɔ bokitomo wa Ngɛnɛ Mungu lɔɛnɛlɛ end’iyo la bɔfɛkɔ wa Ngɛnɛ loangangel’iyo la iyo lowangaka la bɔwa finɛ. 10Kongo ko bokitomo loonga lau mbo— Owangëke eoka, tɛnɛ, isoyaeshel’ino mboli bilau ya linɛngina lifi elitoomana la bato batotina, 11mboli biko mbo— Wana asootelomo ino louse, nda bokenge wa Dawidi, wana ende Bouwesi ako Masiya Ngɛnɛ. 12Ndembe yosung’ino ndolembeel’Inde eko mbo booshaka wana-oli alingelomu la bisinda la aingesomu nda bombeya. 13Futuku, amamwito la bokitomo ona, botükä wa bakitomo ba use ebainakeläkä Mungu, iyo mbo— 14Loomalo lofi ende Mungu ɔlɔ nda Use, la ono se nda wenda, ko lilatemi sisi ya bato ebatoomales’Inde.

15Asekwäkä bakitomo ende betingani ya bɛkɔkɔ okakɛ ɔlɔ eyau nda use, limɔ betingani loongana mbo— Totangweke to olo nda Betelehemu okɛnɛ lona elokokelomo ona, la eloluwesomu iso la Ngɛnɛ. 16Iyo loya la mangu, iyo loyaosha Malia la Yosefa la wana aingali nda bombeya; 17la ɛnɛk’iyo wana, iyo loluwesa bato lioi eliaongomökö lau loasɔ loa wana-yo; 18la batotina ebokäkä, iyo lomwaakala eyaongomökö lau la betingani ya bɛkɔkɔ. 19Nde Malia angɛnɛ loisaka bitotina-bi nda botema ani atoenyaka yao la wɛlï. 20La betingani loinywa eyau la liineli la lisemoli ende Mungu eoka ya mboli eyokäk’iyo la njasɔ eyɛnɛ̈k’iyo kwa aongomökö lau oso.

21Asiläkä becho bonanɛi, lisho liotena wana itombe loengana la Inde lotomo lina liko YESU, eliafomökö Inde la bokitomo oso ani nyango wande akaeli lieme.

Liuchomu lia Yesu la Simeona

22Asiläkä becho yosaesa bokili wa lioti, kwa ekela eyatäkä. Mose, iyo loeshana lande nda Yelusaleme ndüch’Inde ende Mungu 23—kwa ekela eyatomökö nda lokasa loa Bikela ya Mungu mbo— Botolome la botolome oyatoliola kuko ya otomali, etangomoko wüchomo ende Mungu— 24la mbo bakusoleke lifaefi kwa ekela ya Mungu, mbo— Boya la bangambo bambale angoko bana bambale ba bikükü.

25Nda Yelusaleme aäkä nde boto lina liande liko Simeona, ayaläkä la liengani la boto wolitesa Mungu, awɛlɛ̈kɛ̈ Liɔngɛsi lia BaIsalaele baiso, la Bolimo Botanu ayaläkä lande. 26Aluwesomökö la Bolimo Botanu mbo atilɛnɛkɛ liwa oso ani akɛni ngo Masiya wa Ngɛnɛ. 27Eoka ya Bolimo inde lɔɔtɔ nda Ndakɔ ya Mungu limɔ kwaani aɔtɔkɔ ebaoti wana Yesu, mbo bakeeleke wana eloengani la Bikela ya Mungu, 28limɔ Simeona loila wana nda besamba yande, inde loinela Mungu ko ndoongel’Inde mbo—

29E, Ngɛnɛ wa bɔkɔwa waɛ, kwani osofaikola’mi mbo itangweke la lilatemi nda botema, kwa atikäk’Aɛ lisakä;

30Eoka baiso-ba bami basɔɛnɛ liuwesi liaɛ

31Elisokomya Aɛ fololo oso wa bato ba tukela bitoti;

32Elile kwa löwa loanyemela bato ba biese yasi,

La tala ya lokuku loa bato baɛ bako Isalaele.

33Sango la nyango wa wana lomwaala ebiongomu eoka yande. 34Lamao Simeona loongel’iyo baoi ba lifotesi la inde loonga la Malia, nyango wande mbo—

Tɛnɛ ngo, Wana-yo asootomo loasɔ loa lokwesomu la liemesi lia bato wike ba Isalaele la eyalaka nde ndembe ya tofenya, 35—Eingo, likɔ̈kɔ litɔtwɛlɛ botema waɛ angɛnɛ— mbo baenyakeli ba betema wike bɛnɛsɔmɔkɔ fololo.

Ana

36Botomali ayaläkä omao ako Ana oyaäka bɔtɔndɔli, la wana wa Fanuele wa tukela ya Ashela. Otomali ona ayaläkä sumbu inunu; ayaläkä nde la olome miaka osambale nda lisɔngɔni, 37la mbisa ya liwa lia olome ayaläkä lotika ko miaka kama bonanɛi la inɛi, la inde angosekwaka nda ndakɔ ya Mungu, nde kosemokolaka Mungu omao la likili lia bieka la lisomboli la ocho la löwa. 38Ko la mbile-ao inde loya, inde lofa Mungu kelekëlë limɔ inde loongana la bato batotina ebaumbakeläkä liendoli lia Yelusaleme.

39Akɔchäk’iyo bitotina ya ekela ya Ngɛnɛ Mungu, iyo loinywa nda Ngalilai, konda bokenge wau angɛnɛ boko Nasaleta. 40La Wana lokonda la Inde lowangema la bofoka, ayaläkä la wɛli finɛ, la elame ya Mungu loyala lande.

Isenge Yesu nda Yelusaleme

41Ebaotäk’Inde bakɛɛkɛ mwaka la mwaka nda Yelusaleme nda mbile ya Elambɔ ya Lieti. 42Ayäk’Inde miaka liu la imbale, iyo lɔkɛ nda elambɔ kwa boyaeli wau, 43la asilesäk’iyo becho ya elambɔ, iyo loinywa nde Wana ako Yesu lotikala liili nda Yelusaleme, la ebaot’Inde batialuwäkä ongoma. 44Batangäkä nde mbo ayali nda bolenga, eokao iyo lɔkɛ lɔkɛndɔ loa lise limɔi ani iyo loluk’Inde ende bato ba bokulü wau la baina lau, nde batiɛnɛ̈k’Inde; 45lamao iyo loinywa Yelusaleme liasi okaluk’Inde omao. 46Mbisa ya becho isatɔ iyo lɔɛnɛ Inde nda ndakɔ ya Mungu ani ayali se sisi ya baekesi, Inde lolaila iyo la afelakäkä imɔ iyo felo. 47Batotina ebokäkä Inde, iyo lomwaala liluwani lia bamutoli bande. 48Ɛnɛk’iyo wɛnɛ Inde, iyo lowa liena la nyango wande loonga lande mbo— Wana, ¿Osokeel’iso ani eoka iye to? Iso la sango waɛ lami tosolukak’Aɛ la botema wale finɛ. 49Inde loonga lau mbo— ¿Monito oluki nde’mi; otiluwe nde mbo lole loami mbo iyaleke nda ndakɔ ya Sango wami? 50Nde batialuwäka litina lia lioi eliaongäk’Inde lau.

51Lamao Inde lɔkɛsɛnɛ lau, Inde loiya nda Nasaleta, Inde lolites’iyo la wɛlï; la nyango wande loisaka ebitotina-bi nda botema wande. 52La Yesu lokonda nda wɛlï la liɔwa nda bindo la nda elame ya Mungu la bato lisanga.

Currently Selected:

Luka 2: NTKE58

Highlight

Copy