Luka 24

Litɛmwi lia Yesu nda Liwa

1Limɔ nda lise lia osooso, la nɔngɔnɔngɔ iyo loya nda losai, iyo loesha imɔ mwemwe la baningo ebitonji nd’iyo; 2iyo loosha litalɛ lisoundukolomo nda losai. 3Iyo lɔɔtɔ atiteni ya losai nde batiaoshäkä bolyo wa Ngɛnɛ Yesu. 4Aäkä iyo batoeumɛlɛ la loasɔ-lo, futuku iyo lɔɛnɛ batolome bambale bemali tina lau la bawati bisinda ya ngɛlingɛli, 5la batomali lowangaka finɛ; atuliäkä biɔmbɔ se ndoticha nyɛlɛ, batolome loonga lau mbo— ¿Monito otoluka ewa liwawi sisi ya ebawi? 6At’imɔ eyamaya, asotɛmwa; enyelaka kwa aongäk’Inde lanu ani akoyali nda Ngalilai, 7mbo— Wana wa Boto ewambomoko nda besamba ya bato babe, eolomoko nda lieka, la mbisa ya bacho basatɔ etɛmwɛkɛ liasi.

8Limɔ iyo loenyela baoi ebaongäk’Inde, 9la iyo losokwa nda losai, iyo loinwa okenge okakambesa eba liu la ɔmɔi la basi batotina, enjasɔ-bi bitotina. 10Batomali baäkä nde Malia wa Mangandala, la Yoana, la Malia nyango wa Yakobo, la batomali basi amamwito lau, iyo lokambesa batomomu bitotina-bi; 11baoi-ba baaka nda batoi bau kwa beongaonga la batiaimelaka batomali. ( 12Kongo ko Petelo loemala, inde lofata mangu konda losai, inde loinama se, inde lɔɛnɛ bisinda bifufu biyali oko yao angɛnɛ wawa; inde lokuswa okakɛ eyande ani atomwaala njasɔ ebiakelomökö.)

Yesu lɔɛnɛlɛ ende bambale ba Emau

13Nda lise-ao bambale bau bakɛndɛ̈kɛ̈ nda bokenge boko Emau ebole esika la Yelusaleme ko kilomɛta liu la ɛmɔi. 14Iyo loonganaka loasɔ loa bitotina bina ebiakelomökö, 15la aonganäk’iyo ndofelakana litina, Yesu angɛnɛ looshana lau, Inde lɔkɛsɛnɛ lau. 16Nde baiso bau lokufesomo mbo bataluw’Inde. 17Inde loonga to lau mbo— ¿Bani baoi ebatoongakanak’ino ani atoeta ino la mboka? Iyo losikama la yɔmbɔ yuno, 18la ɔmɔi wau, lina liande liko Keleofa, inde lomutola lande mbo— ¿Ko Aɛ kongo w’eba fɛtɛti nda Yelusaleme oyatiluwe njasɔ ebisokelakomo ina la ebacho-ba? 19Yesu mbo— ¿Bini to njasɔ? Iyo mbo— Eya Yesu wa Nasaleta oyasɔɛnɛlɛ Bɔtɔndɔli wa bofoka nda yao ebisokelak’Inde la ebisoongak’Inde imɔ nda baiso ba Mungu la eba bato lisanga; 20la kanga ebieti la biange yasu lɔkɛs’Inde nda liwa la iyo lool’Inde nda lieka; 21la tokɛsiki nde iyɛli mbo Inde nd’atoendola BaIsalaele, kongo ko yao bisoeta la kwani louse lole lise lia asatɔ mbisa ya njasɔ-bi. 22Nde to loasɔ lɔmɔi lole mbo batomali basu bamɔi lomwaales’iso eoka aɛ̈kɛ̈ iyo la nɔngɔnɔngɔ nda losai, 23batiɛnɛ̈kɛ̈ bolyo wande nde iyo loya oyakambes’iso mbo bɛnɛkɛ oko bakitomo ebaongaka lau mbo akoyali la liwawi, 24limɔ batolome bamɔi basu, iyo lɔkɛ konda losai, iyo lɔɛnɛ imɔ ongoma kwa aongaka batomali, kongo ko batiɛnɛkɛ to Inde angɛnɛ.

25Limɔ Inde ako Yesu loonga lau mbo— Ino ba elemolemo la botembu woimelaka baoi batotina ebaongäkä betɔndɔli; 26¿Lotiaaka ende Masiya mbo okeke etokange-to limɔ ndɔtɔ nda tala yande? 27Limɔ Yesu loakola ko la lokasa loa Mɔsɛ la kasa ya bɛtɔndɔli yasi, Inde losanoel’iyo baoi batotina ebatomökö loasɔ loande angɛnɛ.

28Asishanäk’iyo tina la okenge olo atɔkɛ lau, Inde asiakoetaka nde iyo 29lolɔmbɔkɔl’Inde, iyo mbo— Tikalaka lasu, likɔlɔse lisoya to tina la löwa losɔkɛ. Limɔ Inde lɔtɔ lau ndakɔ, Inde lotikala lau. 30Ayaläk’Inde se ndola bieka amamwito lau, Inde lɔɔsɔ lituma, Inde lofa Mungu kelekëlë, Inde louna liao, limɔ Inde lofaef’iyo liao, 31la baiso bau loliolomo, iyo lolembeel’Inde, limɔ Inde angɔɛnɛlɛ’imɔ nda baiso bau.

32Iyo loongana mbo— ¿Betema yasu betiyaimweke atiteni yasu ani Inde atoonganaka lasu nda mboka, l’ani alioelak’iso litina lia baoi ba lokasa loa Mungu? 33Nda mbile-ao, iyo loemala, iyo loinwa nda Yelusaleme, omao iyo loosha eba liu la ɔmɔi basɔngɔmɔ̈kɔ̈ etunda amamwito la basi, iyo ana loonga l’eba bambale mbo— 34Ngɛnɛ asɔtɛmwa wewe la asɔɛnɛlɛ ende Simona. 35Limɔ ebambale lokambes’iyo atotina ebiakelomökö la mboka l’ani asolembeel’iyo Yesu ko la bounyeli lia lituma.

Yesu lɔɛnɛlɛ ende baeki bande

36Aongäk’iyo baoi-ba, Yesu angɛnɛ loemala sisi yau, Inde loonga lau mbo— Lilatemi end’ino! 37Nde iyo losisimwaka, iyo lowanga finɛ, iyo lotanga mbo basɔɛnɛ bolimo. 38Inde loonga lau mbo— ¿Monito osowa tolöi? ¿Monito bototanaka fee nda betema yanu? 39Tichaka bangasa bami la batindi bami mbo yende Imi angɛnɛ; matakaka’mi la ɛnɛkɛ, mbo bolimo ati la winyo la tokwa ebiyali lami kwa atɔɛnɛ ino. 40Aongäk’Inde ongoma, Inde lotamb’iyo bangasa bande la batindi bande.

41Aäk’iyo batitaimeläkä kɔni eoka ya limɛngɔ la asisimwäk’iyo, limɔ Inde loonga lau mbo— ¿Wende la yeka yola eyamaya? 42Lamao iyo lof’Inde botüku wa swi botumbe, 43la Inde lɔɔsɔ, Inde lola oso wa baiso bau.

Yesu losanoela baeki baoi ba Lokasa loa Mungu

44Inde loonga lau mbo— Baoi-ba bami ebaongäkä’mi lanu, eyayaeläkä’mi amamwito lanu, bende mbo losoengana mbo bitotina ina bikɔchɔmɔkɔ kɔkɛ, biko eyatomökö loasɔ loami nda Bikela ya Mɔsɛ la nda kasa ya batɔndɔli, la nda Bɛɛlɛ ya BaYuda. 45Limɔ Inde loliola baenyeli bau mbo baluweke litina lia kasa ya Mungu; 46Inde loonga lau mbo— Losotomo nda lokasa ongoma, mbo loengani nde ende Masiya mbo okeke tokange la mbo atɛmwɛkɛ nda liwa nda bocho wa isatɔ, 47la mbo likalangani la limɛsɛli lia njasɔ ibe binangolomoko nda lina liande ende bato ba biese bitotina. Akakolek’ino nda Yelusaleme, 49ino wende ebasɔɛnɛ njasɔ-bi la Imi nd’atotomel’ino lisakä elia Sango wami end’ino; ino nd’atotikala nda bokenge-bo konda akawatesomoko ino la bofoka ebotosokwa nda Use.

50Yesu lɔkɛsɛnɛ imɔ lau ko tina la Betania, la Inde loilaka besamba yande, Inde loongel’iyo baoi ba lifoti, 51la aongäk’Inde ongoma, Inde losenyana lanu, Inde loilomo nda Use. 52Iyo lotulamel’Inde se, iyo loinwa nda Yelusaleme la limɛngɔ fuu, 53iyo lokayalake nda ndakɔ ya Mungu ani bainakelak’Inde.

Currently Selected:

Luka 24: NTKE58

Highlight

Copy