Luka 7
7
Liuwesomu lia Bɔkɔwa wa Komanda
1Asiläkä Yesu tonango twande tototina nda lioki lia bato, Inde lɔɔtɔ bokenge wa Kafenauma. 2Bɔkɔwa wa Komanda ɔmɔi ayaläkä la loo lowaü tina lowa, la Komanda loyala lande l’itimya, 3okaka to Komanda lokuku loa Yesu, inde lotoma biange ya BaYuda ende Inde ndofel’Inde mbo ayeke ndoyuwesa bɔkɔwa wande. 4Iyäk’iyo ende Yesu, iyo lolɔmbɔkɔl’Inde la boliliya, mbo— Aondu nde mbo Yesu akeelek’inde eloasɔ-lo, 5eoka asami nde tukela yasu la inde angɛnɛ nd’asoswel’iso ɛsɔngɔmɛlɔ yasu. 6Limɔ Yesu lɔkɛsɛnɛ lau la aäkä Inde at’imɔ esika la ndakɔ, Komanda lotoma baina lande ende Yesu, iyo loonga lande mbo— Ngɛnɛ, wokëke bosoi woya eyami, eoka itiengane mbo ɔɔtɛkɛ ose ya bɔtɔndɔ wami; 7eokao itifaeme mbo iondu nde ndoya imi angɛnɛ end’Aɛ, nde ongaka ngo lioi kongo, limɔ wana wami kosäsolomo; 8eoka imi angɛnɛ yende boto wolitesa isosha la yende imɔ la basilikani ose yami, la yeonga la ɔmɔi mbo— Kɛndɛkɛ, limɔ atɔkɛ; la ende wasi mbo— Yauku, inde atoya; la ende bɔkɔwa wami mbo— Kelaka lona, limɔ atokela loao. 9Okäkä Yesu baoi-ba Inde lomwaala, Inde lokikwela ebatutani lande, Inde mbo— Isoonga lanu mbo ikoshi kɔni liimeli lifi ongoma ango ende bato ba Isalaele angɛnɛ. 10Ainwäkä ebatomomökö nda ndakɔ, iyo loosha bɔkɔwa ani asokwelo oko bosasu bolau.
Louweso loa Wana wa botomali wa lotika
11Mbisa ya becho bimɔi, Yesu lɔkɛ nda bokenge ewatangomökö mbo Naina la baeki bande la ekuke ya bato imɔ lɔkɛsɛnɛ lande. 12Iyäkä Inde tina la bome nda liko lia bokenge, iyo lotowana la bolyo ewatolomökö nda liömbi; aäkä wana ɔmwitoto wa nyango la nyango wande aäkä lotika la ekuke efi ya bato ba okenge bɔäkä lande. 13La ɛnɛ̈kɛ̈ Ngɛnɛ Yesu wɛnɛ otomali, Inde loonga lande mbo— Olelëk’imɔ. 14Inde losishana tina la Inde lomata shange eshatolomökö la bolyo, limɔ ebatoläkä shao losikama. Limɔ Inde loonga mbo— Isenge, itoonga laɛ mbo— Emalaka; 15limɔ inde oyawäkä loemesa bɔkɔngɔ, inde loakola ndoonga la Yesu lof’inde ende nyango wande. 16Batotina lowa bɔwa finɛ, iyo loinakela Mungu, iyo mbo— Bɔtɔndɔli ofi asotɛmwa sisi yasu; la imɔ mbo— Mungu asoyela bato bande. 17Mboli yande lomelana nda kenge bitotina ya Yudea la nda biese bitimbi.
Wɛndi wa Yoane Bolufi
18Baeki ba Yoane lokakambes’inde ebitotina-bi, 19limɔ Yoane lota baeki bande bambale lioi, inde lotom’iyo wɛndi ende Ngɛnɛ Yesu, mbo— ¿Aɛ nd’ale Inde oyakayeke, kwa mbo tolukeke wasi? 20Iyaka iyo ende Yesu, iyo mbo— Yoane Bolufi asotom’iso end’Aɛ ndoonga laɛ mbo— ¿Aɛ nd’ale Inde oyakayeke kwa mbo tolukeke wasi? 21Ko la mbile-ao Inde louwesa bato wike ba ngwo la biale la belimo ebe, la Inde lofaka bato b’etuku wike liɛni ndoɛnɛ liasi. 22Limɔ Yesu lomutola lau mbo— Kɛndɛkɛ okakambesa Yoane ebisɔɛnɛ ino la ebisook’ino, mbo eba betuku basɔɛnɛ liasi, eba bikoti basokɛndɛ fii, eba baɛndi basotanesomo, eba biökö basooka, ebawi basoemesomo yai, la eba touwe basonangoelomo Mboli Ilau. 23Limɛngɔ lile la oto ona oyaitɔɛnɛ tale eoka yami.
24Atangwäkä eba wɛndi ba Yoane, Yesu loakola ndoonga la bikuke ya bato loasɔ loa Yoane, Inde mbo— ¿Ino waɛ̈kɛ̈ nda liɔmbɛlɛ okɛnɛ iye? ¿Mbo liangala elisolɛlɛlɛ la lofofo? 25¿Waɛ̈kɛ̈ nde okɛnɛ iye to? ¿Mbo oto oyawati bisinda ya bɔfɛkɔ? Tɛnɛ ngo, ebatowata bisinda ya bɔfɛkɔ, la bafofa yeka, iyo ana bayali nda ndakɔ ya bɛkɔta. 26¿Nde waɛ̈kɛ̈ okɛnɛ iye to? Okɛnɛ bɔtɔndɔli? Eingo ko, Imi mbo— Asolongela Bɔtɔndɔli finɛ. 27Ende inde oyatelomökö nda lokasa mbo—
Tɛnɛ, itotoma wɛndi oso waɛ,
Oyatokakomya mboka yaɛ oso waɛ.
28Isoonga lanu mbo— Angwɛnɛ boto oyasootomo la otomali, asɔɛnɛlɛ wolongela Yoane Bolufi, kongo ko inde oyayali ewa liili nda Bɔkɔta wa Mungu asolongela Yoane. 29Okäkä bato batotina l’eba besombesi elioi-li, iyo lokulia likomyi lia Mungu eoka balufiomokö la Yoane, 30kongo ko BaFalusi la Baekesi ba Bikela lofeka likomyi liande loaso loau, eoka batialufiomökö lande.
31¿Itokweela to efɛtɔ-ye l’iye? ¿Bende kwa bandai? 32Bende kwa bana ebasoyalaka se nda liongo, batotakana la baina lau lioi mbo—
Tosoomel’ino bofilingi, nde otiineke bisha,
Tosoleel’ino etondo, nde otiomakeke yɛlɔ nda ewa.
33Nde Yoane Bolufi ayiki, atile lituma, atimwe bänä, nde ino koonga mbo— Ale la bolimo obe. 34Wana wa Boto asoya, atola la atomwa, nde ino mbo— Tɛnɛ ngo afofa la bowi bänä, lisaɔ lia basɔnji ba bosombi la bato babe. 35Nde Wɛlï wa Mungu bosoluwana olau ko la bekeeli ya wao.
Botomali losoola batindi ba Yesu
36Ɔmɔi wa BaFalusi lofela Yesu mbo aleke bieka lande la Inde lɔkɛ nda ndakɔ ya ewa BaFalusi; ayaläk’Inde se ndola, 37kwaamao otomali wa okenge oyayali otomali obe, aluwäkä inde mbo Yesu akola bieka nda ndakɔ ya ewa BaFalusi, inde loya la isako sha litalɛ sha baningo ba liɛsɛ, 38inde loemala ombisa ya batindi ba Yesu; aleläkä botomali, foo yande loakola ndotonyaka nda batindi ba Yesu; otomali lɔɔmbɔkɔlɔ batindi la swee yande bisa la inde loumba batindi la bɔnɔkɔ la inde losingɔlɔ bao la baningo. 39Nde ɛnɛ̈kɛ̈ ewa BaFalusi oyafeläk’Inde nda bieka elokeli otomali, inde loenyela nda botema mbo, eya to mbo oyo ende Bɔtɔndɔli ani aluwiki otomali-yo la boyaeli wande mbo ende botomali obe.
40Nde Yesu lomutoela lienyeli liande, mbo— Simona, yende la lioi lionga laɛ. Inde mbo— Ongaka to, Boekesi. 41Yesu mbo— Bato bambale baɔsɔ̈kɔ̈ bieto belima ende oto ɔmɔi oyafakäkä sɔmbya; ɔmɔi aɔsɔ̈kɔ̈ falanga pata mia bɔɔmwi, la ɔmɔi pata kama bɔɔmwi. 42Kongo ko eoka batiaäkä la bieto yokamba belima, inde lɔmɛsel’iyo yaambale. ¿Ndai to wau yaambale atosamak’inde la losamɔ loeta? 43Simona lomutola mbo— Itangi nde mbo oto ona oyamɛsɛlɔmɔ̈kɔ̈ bieto eyoeta. Yesu loonga lande mbo— Lioi liaɛ liengani chaa. 44Limɔ Yesu lokikwa ende botomali ani Inde loonga la Simona mbo— Otitiche ebotomali-bo? Imi iɔtiki nda ndakɔ yaɛ, nde otife’mi balia bosoola batindi bami, kongo ko botomali asotonyaka batindi bami la foo yande la asɔɔmbɔkɔlɔ bao la swee yande. 45Aɛ otiumbeke’mi bɔnɔkɔ wonyangela’mi, nde konda baɔtɛlɔ bami, botomali-yo akamachi ndumbaka batindi bami. 46Aɛ otisingɔlɛ baita nde botö wami, kongo ko botomali-yo asingɔli nde batindi bami la baningo. 47Eokao to itoonga laɛ mbo— Batwanelo bande kwa ayali bao wike, bimɛsɛlɔmuku nde, eoka losamɔ loande loende lofi; nde oto oyasomɛsɛlɔmɔ ko sinyo, oyo asami ko sinyo kongo. 48Limɔ Yesu loonga la botomali mbo— Batwanelo babe baɛ basomɛsɛlɔmɔ. 49Limɔ bato ebaäkä omao ndolaka bieka lande, iyo loongana mbo— Oyo to ende ndai oyatomɛsɛlɛ ango batwanelo babe? Limɔ Yesu loonga la botomali, mbo— Liimeli liaɛ lisouwes’aɛ, kɛndɛkɛ la lilatemi.
Currently Selected:
Luka 7: NTKE58
Highlight
Share
Copy
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.
