Malako 10
10
Lisɔngɔni
1Asekwaka Yesu omao, Inde lɔkɛ nda yese ya Yudea la konda fangi yasi ya Yaladene, la bato wike losɔngɔmɛlɛ Inde liasi, la Inde loekes’iyo kwa akelakäkä Inde oso. 2BaFalusi bamɔi loya end’Inde oyafel’Inde felo yokɔtɔl’Inde, Iyo mbo— ¿Loengani nde la Bikela mbo botolome asokoleke wali’ande? 3Inde lomutoel’iyo mbo— ¿Mose nd’atelak’ino eni ekela? 4Iyo mbo— Mose amachelak’oto ndosɔnɔ lokasa losɛnyana la losokola wali. 5Nde Yesu loonga lau mbo— Ko l’eoka ya betema yanu bewaü, Mose nda’amachelakä ino ekela ena, 6kongo ko nda baakoelo Mungu akelaka iyo, la otolome la otomali. 7Eokao botolome atomacha nde sango la nyango’ande la atowatema la wali’ande, la iyo yaambale batoyala oto ɔmwito; 8bat’imɔ bindo imbale, kangä ɛmwito; 9eokao eyesowacha Mungu, bato angowatola yao.
10Nda ndakɔ baeki bande lofel’Inde liasi nda loasɔ-lo. 11Inde loonga lau mbo— Boto oyatosokola wali’ande la kosɔngɔ wasi, inde nd’atotwela wali’ande nyongo; 12la otomali ɛsɔngɔnɔ la otolome wasi ani asosokola olome, asotwa nyongo.
Yesu la Bainɛngɛ
13Aeshelak’iyo bana baoli ende Yesu mbo amatek’iyo, baeki loima ebayaka la bana. 14Nde ɛnɛkɛ Yesu ongoma Inde looka botema wale finɛ; Inde mbo— Machaka bana baoli bayeke ende’mi. Okufesëk’iyo, eoka Bɔkɔta wa Mungu wende ende ebofɔnɔ-bo. 15Wewe, itoonga lanu mbo— Boto oyaitoaela Bokɔta wa Mungu kwa atokela wainɛngɛ, ani inde angɔɔtɔ omao. 16Limɔ Yesu lokusamel’iyo, l’ani asotalia bangasi end’iyo, Inde lofotesa bana la baoi balau.
Boto wa Lifoka
17Atangwak’Inde okaila lɔkɛndɔ, boto ɔmɔi loyel’Inde la mangu; inde lokwa bakulusembe oso wa Yesu, inde lofela Yesu mbo— Boekesi Bolau, ikeleke moni mbo yɔ̈leke loiko loa layalaya? 18Nde Yesu loonga lande mbo— Monito ototanga’mi bolau? Angwɛnɛ ango ɔmɔi olau sakolo ko Mungu angɛnɛ. 19Oluwi nde Bikela, Ochwëke nyongo, Wolëke oto, Wiyëke, Otëke nanga, Olimbëke oto, Litesaka sango waɛ la nyango. 20Inde loonga mbo— Boekesi, isolitesa e-bikela-bi bitotina konda isenge shami konda eweuse. 21Atinganaka Yesu lande, Inde losama inde, la Inde loonga lande mbo— Osoomelo lɔmɔi kongo; kɛndɛkɛ okatambesa bitotina ebile laɛ, faefaka yao ende bato touwe, -ongoma otɔɔlɔ bondanda nda Use-limɔ yauku tutaka’mi. 22Bɔmbɔ wande lokwelo wuno eoka ya lioi-li, inde lɔkɛ la ikɛnɛnɛ nda otema eoka aaka lifoka lia likama.
23Yesu lɔɛlɛlɛ baeki bande, Inde loonga lau mbo— Aina owaü ende bafoka ndɔtɔ nda Bɔkɔta wa Mungu. 24Baeki lomwaala baoi bande, nde Yesu loonga lau liasi mbo— Bana’mi, aina owaü ndɔtɔ nda Bɔkɔta wa Mungu. 25Bowaü wa ngamela woeta nda lifola lia iolo, botiengane la bowaü wa oto wa lifoka ndɔtɔ nda Bɔkɔta wa Mungu. 26La iyo lomwaala finɛ, iyo mbo— Ndai to atokɔkɔlɔ ouwesomo? 27Yesu lotingana lau, Inde mbo— Lona losolongela bato, nde inga to Mungu, eoka Mungu atokɔkɔlɔ bitotina.
28Petelo leakola oonga lande mbo— Tɛnɛ, iso nd’asomacha bitotina yasu la tosotutak’Aɛ. 29Yesu loonga mbo— Wewe, itoonga lanu mbo, Boto oyamachi ndakɔ, angoko baloo, angoko baelo, angoko nyango, angoko sango, angoko bana, angoko bilanga, ko l’eoka yami la eoka ya mboli ilau, 30ɛɔlɔkɔ nde nda mbile-ye mia ya ndakɔ, ya baloo, ya baelo, ya banyango, ya bana, ya bilanga, amamwito la likongolomu, la nda mbile eyekayeke loiko loa layalaya. 31Nde wike ebale betoli oso, bende ko mbisa; la eba mbisa betolaka oso.
32Akɛndɛkɛ iyo nda mboka ya Yelusaleme, Yesu loetel’iyo oso la iyo losisimwa la ebatutak’Inde lowängaka. Aoshäkä eba liu la ambale oosh’Inde liasi, Inde loakola okambes’iyo njasɔ ebikayeke ende Inde, 33Inde mbo— Tɛnɛ, tosɔkɛ Yelusaleme, lamao Wana wa oto atowambomo ende kanga ebieti la batikasa, iyo ana batof’Inde se mbo aolomoko, limɔ batɔkɛsɛ Inde ende bato ba yese yasi, 34batot’Inde kungutu, batochwɛlɛ Inde sɔi la batoomak’Inde fimbo, la batool’Inde la mbisa ya becho isatɔ atouwa liasi.
Liömbi lia Yakobo la Yoane
35Banatolome bambale ba Sebedai, bako Yakobo la Yoane, loya ende Yesu, iyo mbo— Boekesi, tolɛmbi mbo okeelek’iso kwa atofel’iso ofel’Aɛ. 36Inde mbo— Olɛmbi mbo ikeelek’ino to iye? 37Iyo mbo— Lɛmbɛlɛkɛ mbo toyaleke laɛ, ɔmɔi nda osamba wa olome, ɔmɔi nda osamba wa wali, eyalayalek’Aɛ nda tala yaɛ. 38Nde Yesu mbo— Otiluwe elosofel’ino ofela’mi. ¿Otokɔkɔlɔ nde ndomwa kɔpɔ eyetomwa’mi la otokɔkɔlɔ ndolufiomo la lilufi eyetolufiomo lami? 39Iyo mbo— Totokɔkɔlɔ. Limɔ Yesu loonga lau mbo— Otomwa nde kɔpɔ eyetomwa’mi la otolufiomo la lilufi elitolufiomo lami, 40nde ndoyales’ino nda osamba w’olome la nda ewa wali, loti loami ndof’ino kangä ende ebasotonjelomo loao. 41Okaka eba liu baoi-ba, iyo losoma la Yakobo la Yoane. 42Limɔ Yesu lot’iyo lioi, Inde loonga lau mbo— Oluwi mbo bato ebasotangomo betoli oso ya yese yasi, batoka-kales’iyo la bato bafi bau bende la isosha end’iyo. 43End’ino, loti ongoma, kongo ko oyatolɛmbɛ mbo ayaleke boto bofi wanu, ayaleke bokuweli wanu, 44la oyatolɛmbɛ mbo ayaleke botoli oso wanu, inde koyala bɔkɔwa wa batotina. 45Wana wa oto, imɔ, atiye ndokuwelomo, kangä okuwela basi, la ndofa liwawi liande angɛnɛ kwa liendoli lia bato wike.
Batimayo
46Limɔ iyo lɔkɛ Yeliko… asekwak’Inde Yeliko amamwito la baeki bande la windi wa bato, BaTimayo, wana wa Timayo, ayalaka la botuku, inde loyalaka se nda ɔngɔ wa mboka ani atömba yeka. 47Okaka inde mbo ende Yesu wa Nasaleta inde loakola ndoamama, mbo— Yesu, Wana wa Dawidi, okelak’mi ngandi. 48Bato wike loim’inde mbo ayaleke tau, kongo ko inde loamama liamami lioeta, mbo— Yesu, Wana wa Dawidi, okelaka’mi ngandi. 49Yesu losikama, Inde mbo— Tak’inde lioi. Iyo lota ewa botuku lioi, iyo mbo— Tendelaka, emalaka, asot’aɛ lioi. 50Umbolak’inde esinda yande, inde loemala, inde loya ende Yesu. 51Yesu lofel’inde mbo— ¿Olɛmbi nde mbo ikeelek’aɛ iye? Boto wa botuku loonga lande mbo— Boekesi mbo yɛnɛkɛ liasi. 52Limɔ Yesu loonga lande mbo— Kɛndɛkɛ eyaɛ, liimeli liaɛ lisouwes’aɛ. Lisasaya inde lɔɔlɔ liɛni liasi, inde lotuta Yesu nda mboka.
Currently Selected:
Malako 10: NTKE58
Highlight
Share
Copy
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.
