Malako 15

1Aaka bonyanya bososɔswa, lisasaya kanga ebieti la biange la batikasa iyo lɔɔtɔ ikumbɛ, iyo lokanda Yesu, iyo lɔkɛ lande mbo bamachek’Inde nda besamba ya Pilato. 2Pilato lofela Yesu mbo— ¿Aɛ wende Bɔkɔta wa BaYuda? Yesu lomutoel’inde mbo— Aɛ nd’aongi. 3Kanga ebieti lowanjakel’Inde bawanjeli wike; 4limɔ Pilato lofel’Inde liasi mbo— ¿Otimutole ango lioi? Toka, bawanjeli wike ebatowanjel’iyo Aɛ. 5Nde Yesu angomutola ango sinyo imɔ, la ongoma Pilato lomwaala finɛ.

6Nda lise lia Elambɔ, Pilato ayalaka la boyaeli wofaikoela boto ɔmɔi wa ebakandomu kwa akalɛmbɛkɛ iyo angɛnɛ. 7Oto ɔmɔi lina liande liko Balaba, akandomuku amamwito la ebachwakaka kuko ya bita la ebaolaka bato. 8Windi wa bato loya ndoyafelaka Pilato mbo akeelek’iyo kwa akelakaka inde oso. 9Inde lomutol’iyo mbo— ¿Olɛmbi nde mbo ifaikoeleke ino Bɔkɔta wa BaYuda? 10eoka Pilato lolembeela mbo kanga ebieti basoesha Yesu nda likomyi ko l’eoka ya lisiela kongo. 11Kongo ko kanga ebieti lofumbesa bato mbo afaikoelek’iyo ko Balaba. 12Pilato lomutoel’iyo liasi mbo— ¿ikeleke to moni la boto oyasotangomo lanu mbo Bɔkɔta wa BaYuda? 13Iyo loanjanja liasi mbo— Olaka’Inde nda lieka. 14Pilato mbo— Eoka iye? ¿Boni obe ebosokel’Inde? Kongo ko iyo loanjanja likama liasi mbo— Olak’Inde nda lieka. 15Limɔ Pilato losɔmbɔɛl’iyo Balaba, eoka alɛmbɛkɛ ndoomalesa windi wa bato. Limɔ ani Yesu asoomakomo fimbo, Pilato lɔkɛsɛ Inde nda liwa nda lieka.

16Basilikani ba Pilato lɔkɛ la Yesu nda lɔmbɔ loa ndakɔ yau, lamao iyo lota botükä wau bototina, 17iyo lowates’Inde esinda etelu limɔ iyo lotaka likala lia kɛ̈kɛ̈ iyo lotel’Inde liao nda otö, 18iyo lolamokol’Inde mbo— Ho, Bɔkɔta wa BaYuda. 19Iyo looma botö wande la isosola, iyo lochwɛlɛ Inde sɔi, iyo loswel’Inde balui se kwa lisemoli. 20Limɔ asilak’iyo ndot’Inde kungutu, iyo losokoel’Inde esinda etelu, iyo lowates’Inde esinda yande angɛnɛ, limɔ iyo loumes’Inde okaol’Inde nda lieka.

Liwa nda Lieka

21Iyo loundesa oto ɔmɔi ako Simona wa Kulene ani atosekwa nda bilanga, iyo lotoles’inde lieka lia Yesu. (Oto ona aaka sango wa Alesandelo la Lufu.) 22Iyo loesha Yesu nda elela eyatomoko mbo Ngolongota, litina mbo:— Longö-loa-otö. 23Lamao iyo lotamb’Inde bänä ebabuyani la lisoo mbo amweke nde atiɔsɛ bao. 24Iyo loanyemes’Inde nda lieka limɔ iyo lokaana esinda yande ko ndota ngongo nda likao elikaɔlɛkɛ oto la oto. 25Buse wiyelaka bonyanya booku ani baanyemesaka Yesu nda lieka. 26Loasɔ elosowanjelomo Inde losɔnɔmu nda lionga mbo— Bɔkɔta wa BaYuda. 27Baanyemesaka eba beoni lisanga amamwito lande, ɔmɔi nda bosamba wa olome la oyɔmɔi nda ewa wali.… 29Ebetaka losungakel’Inde, iyo lofilingakel’Inde betö, iyo mbo— Aha, oyatomelesa Ndakɔ ya Mungu koswa liasi ko la becho isatɔ, 30uwesaka lokomba loaɛ angɛnɛ, sokwaka nda lieka. 31Imɔ ko kanga ebieti lolimbokol’Inde la batikasa lisanga, iyo mbo— Auwekesäkä basi, atikɔkɔlɛ ndouwesa lokomba loande angɛnɛ; 32Masiya Bɔkɔta wa Isalaele asokweke nda lieka, mbo twɛnɛkɛ la toimeleke. La ebaanyemesomoko lande iyo imɔ lolimbol’Inde.

33Ayaka buse ifitika, lilima lokwa nda yese etotina konda lilongolongo. 34Lamao nda lilongolongo Yesu lota limiki lifi, Inde mbo— Eloi, Eloi, lama sabakatani? Litina mbo, ¿Mungu wami, Mungu wami, moni osomacha’mi booi? 35Bamɔi ebaemalaka ina, iyo looka, iyo mbo— Toka, asota Eliya lioi; la ɔmɔi lokwa mangu okafɔɛsɛ lilamba nda bänä, inde lota liao nda ifende, inde lof’Inde amweke; la inde loonga mbo— Macha, twɛnɛkɛ ango Eliya ataya oyasokol’Inde omao. 37Nde Yesu lota limiki lifi, Inde lokusola luli nda liwa.

38Esinda ya Ndakɔ ya Mungu losalya yaki imbale, ko likolo ko se. 39Ɛnɛkɛ Komanda wa basilikani oyaemaelaka tina la Yesu, ani asokwel’Inde se, inde mbo— Fufo, boto’yo ende ngo Wana wa Mungu.

40Batomali baaka esika sumbu otichaka elokelomu, bako Malia wa Mangandala, la Malia nyango wa Yakobo, oyo ɔkɛkɛ, la ewa Yose, la Salome, la basi 41ebatutaka Yesu la ebatinganaka lande ani akɛndɛlɛkɛ Inde Ngalilai la batomali basi imɔ ebayiki nda Yelusaleme amamwito lande.

Liombomu lia Yesu

42Iyaka buse litele, eoka mbo wende buse wotonja lise lia Yenga, 43oto ɔmɔi ako Yosefa wa Alimataya, oyaaka wolitesomo wa ikumbɛ la oyalukaka loyo loa Bɔkɔta wa Mungu, oto-ao lɔkɛ la lotendela ende Pilato okaömba bolyo wa Yesu. 44Nde Pilato lomwaala mbo asotakwela se, inde lota Komanda lioi, inde lofel’inde ango asosila ndowa. 45Aluwesomökö inde ongoma ende Komanda, Pilato lofaefa Yosefa bolyo wa Yesu. 46Inde losomba bisinda bifufu; asulolak’inde bolyo wa Yesu se, inde lolingela Inde la bisinda, limɔ inde loinges’Inde nda losai eloafuwomökö nda batalɛ, la inde loundukokola litalɛ lifi liolinja ɛɔtɛlɔ ya losai. 47Malia wa Mangandala la Malia nyango wa Yose loticha elela olo aingesomökö Inde.

Currently Selected:

Malako 15: NTKE58

Highlight

Copy