Matayo 18
18
Yesu Ekuigisia Beigisibua Bage Buno Banze.
Mk. 9:33-37; Lk. 9:46-48.
1Mu nkungu zezo beigisibua bavule ku Yesu, bamubuzizie bune, Nazi uli munene mu bukota bua meigulu? 2Yesu amanine muana muto, nu amubikile munkatini muabo, 3nu atendile bune, Lebelebe, nkumubula bune, Ndi tamuagaluka, nu kuba anga bana bato, tamukeingila mu bukota bua meigulu. 4Muntu unsania wibotia anga wono muana muto, ukaba munene mu bukota bua meigulu. 5Unsania wasekela muana muto anga wono muizina liane nti ansekela: 6tondo ukeinagia umozi wa ku babano bana bato bekunkatizagia mutima, buatananina akandue ikozi lia kugoga muikosi liage, nu kuisua muiziba lia kitatenge.
7Kabebe ku kisi ku kabamba ka kuinania mitima! Lebelebe, kuinania mitima kuatunganana kuvua, kabebe ku wozo ukuinia ungo mutima. 8Ndi kuboko kuobe aba kugulu kuobe kuakuinia mutima, nti wakusesa, nu nti wakuisa bulazi nobe; gunulumba wingila kitunga mu kalamo, kuteli kuingila mu keiya katanakuzima na maboko mabili nu magulu mabili. 9Ndi liso liobe liakuinia mutima, nti walitikia, nu nti walisa bulazi nobe; gunulumba wingila mu kalamo na liso limozi, kuteli kutumbua mu kiziba kia keiya na meiso mabili. 10Tamubenge muana muto umozi wa ku babano, kubuno nkumubula bune, Muigulu bindi binsania migenzi zabo zikulolaga ku meiso ma Tatane uli muigulu. 11(Kubuno Muana wa muntu avule konia kikio kiazimine.) 12Mukukengela buni? Ndi muntu eli na lukama lua mikoko, nu umozi wazimina, ndi ntanasiga zizingo makumi mubula nu mubula, nu kuenda mu muiduko kulonda wozo wazimine? 13Nu gagumonine, lebelebe nkumubula bune, Agubogedebogede, kutinga zezo makumi mubula nu mubula zitazimine. 14Ububo Soinyue uli muigulu ntakutunda muana umozi wa ku babano bana bato kuzimina.
Yesu Ekubula Beigisibua Bage Menge a Bantu a Bakukitila Bango.
Lk. 17:3.
15Ndi mubuto wobe akuagila, enda, umulolesie buakuagila inyue babili: ndi akunguilila, nti waluta mubuto wobe. 16Ndi anana nti wenda na muntu umozi aba bantu babili ububo bulongeki buasuage ku balongeki babili aba basatu. 17Nu ndi abanana, nti walondola mulondo wozo ku ekelezia; nu ndi anana ku ekelezia, nti abe kuguli anga wa Bilongo nu anga Mundelelombe. 18Lebelebe nkumubula bune, Kinsania kimuakandage ku kisi, nti kiakandue nukio muigulu, nu kinsania kimuakandulage ku kisi, nti kiakandulue nukio muigulu. 19Nkumubula lingo bune, Ndi babili beitabizania ku luango lumozi, nti basega, nu Tatane uli muigulu abakitile anga bubasegaga. 20Ndi babili aba basatu bakundamana kuizina liane, nunne nti nili munkatini muabo.
Yesu Ekubula Beigisibua Bage Bubasigilila Bango Bantu Buagi Buabo.
Lk. 17:3, 4.
21Nu Petelo avule nu amubuzizie bune, Mukota, ndi mubuto wane anagila nti namusigilila mambizi manga? Ndi mambizi mutuba kamo? 22Yesu amubuide bune, Nsikukubula tugu mambizi mutuba kamo; tondo Makumi mutuba kamo mambizi mutuba kamo. 23Ububo bukota bua meigulu bualingimana na mukota umozi watundaga kuganza biage biabezaga na bakambi bage. 24Nu galingile kuganza biage, bavule na umozi abezaga na nsombi za talanta tununu ikumi. #Mat. 25:15. 25Nuwe ntabezaga na kena ka kuliga nsombi zage, nu mukota wage atendile bune, Bamukunzie na mukazi wage nu bana bage nu biage binsania bubo ubualige nsombi zage. 26Mukambi aguede gansi amukumbamine, nu amubuzizie bune, Mukota nkuile kiombo, nkakuligaga nsombi insania. 27Nu Mukota wage amukuilide kiombo, amulekede, nu amusigilide na nsombi. 28Tondo mukambi atukile mu numba, akulumene nuwe na mukambi wage wabezaga na nsombi za ndenalise#18:28 Lili izina lia falanga za bantu ba kalazi. lukama, amukatide geikosi atendile bune, Ndige nsombi zane kano kaluma. 29Mukambi wage aguide gansi, amulakide bune, Nkuile kiombo, nkakuligaga nsombi zobe. 30Tondo we ananine, endile kumubika mu kikando, aba nu gakaliga nsombi. 31Gamonine bango bakambi banyage ku bubo mitima zabo zinine, bavule kusolela mukota wabo bunsania buakitaga. 32Mukota wage amumanine, amubuide bune, Uwe mukambi mubi, nakusigilide nsombi insania, kubuno wandakide: 33ndi ntunavuama kukuila munyobe kiombo anga bunakukuilide kiombo? 34Nu mukota wage ongilue, amubikile mu maboko ma basungia aba nu gakaliga nsombi insania. 35Ububo buamukite Tatane uli muigulu, ndi umozi wa kumuli ntakusigilila mubuto wage mu mitima zeinyu.
Currently Selected:
Matayo 18: NTKI57
Highlight
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
