Matayo 4

Satana Alindikile Yesu.

Mk. 1:12, 13; Lk. 4:1-13.

1Tondo Yesu asondelezizibue na Muuza mu kalula buno alindikue na Liabo, u Satana. 2Eiyombekile bindi makumi manazi, ntalia musi nu kindi, kusila kua bubo akule na nzala. 3Nu mulindiki avule nu amutendile bune, Ndi uwe u Muana wa Kalaga, kakizia makozi mamano mabe kampampa. 4Nuwe amuakuide bune, Buasanzilue, muntu ntanalama na kampampa tugu, umpanga neidagi linsania likutuka mu kanua ka Kalaga.#Dutelenome 8:3. 5Nu wozo Liabo, u Satana, amusondelezizie ku muino wasuagibua nu amuemanizie gantata ga mutondo wa numba nnene za kukumbamina, 6nu amubuide bune, Ndi uwe u Muana wa Kalaga, iyise gansi: kubuno buasanzilue bune,

Akakizie migenzi zage zikulange:

nu, Mu maboko mabo bakueke,

Unavua kukikitanua kugulu kuobe kuikozi.#Luimbo 91:11, 12.

7Nu Yesu amubuide bune, Buasanzilue lingo bune, Ntulindike Mukota Kalaga wobe.#Dutelenome 6:16. 8Nu lingo, wozo Liabo, u Satana, endile nage ku muiduko wasakama nunse, nu amulolesizie makota mansania ma kisi, nu malebo mamo; 9nu amubuide bune, Bibino binsania nakukase, ndi wankumbamina. 10Nu Yesu amubuide bune, Tuka Satana: kubuno buasanzilue bune, Kumbamina Mukota Kalaga wobe, nu nti wamukitila wenyene. 11Nu Liabo, u Satana, amusigile: nu migenzi za Kalaga zavule, zamukitide.

Yesu Esalinga Kusambalila Bantu Musagu wa Kalaga.

Mk. 1:14; Lk. 4:14-15.

12Gongule Yesu musagu buno, Yoana akandua, endile ku Galela; 13nu atukile ku Nazaleta, nu avule kuikala ku Kapenuma, uliko buigi na kiziba, mu miaga za Zebulona nu Nafatale: 14bubo lizindilile liatendagua na mulengania Yesaya bune,

15Kisi kia Zebulona nu kisi kia Nafatale,

Nzila za mu ntungo na kiziba, lisilia lia Yadene,

Galela za baBilongo,

16Bantu babezaga mu kapilo bamonine ku kiengi kinene,

Nubo beikalaga mu kisi kia kilimelime kia lukuo.

Kiengi kiababaside. #Yesaya 9:1-2.

17Kutukila nkungu zezo Yesu alingile kusambala, nu kutenda bune, Iyaniazi; kubuno bukota bua meigulu buse buigi.

Yesu Ekumana Petelo nu Andele nu Yakobo nu Yoana.

Mk. 1:16-20; Lk. 5:2-11.

18Nu gatabangaga mu ntungo mua kiziba kia Galela, amonine ku bantu babili ba muto neiselenzi, Simona wamanagua buno Petelo, nu muto wage Andele, beisaga kakila mu kiziba; kubuno babezaga bazubi. 19Ababuide bune, Nyangazi, nu namubike buno mube bazubi ba bantu. 20Nu kazanga kongo basigile tukila, nu bamuyangile. 21Nu gabede esalombozia, amonine ku bango bantu babili ba muto neiselenzi, Yakobo muana wa Zebedayo, nu muto wage Yoana, babezaga mu buato neisibo Zebedayo, balandaga tukila tuabo; nu abamanine. 22Nu kazanga kongo basigile isibo na buato, nu bamuyangile.

23Nu Yesu endile kunsania ku Galela, eigisagia mu numba zabo za musanganano, nu abasambalide musagu musoga wa bukota, nu onezie nsambo za nkita na nkita za bantu. 24Nu lukumu luage luasambedue mu ndenge insania za Sulia; nu bamuvuilide na basambi bansania, nu bansania bateikosagia na nsambo za nkita na nkita, nu babezaga na basumbu, nu babezaga na lungu, nu boma maboko; nu abonezie. 25Nu misanganano za bantu beingi zamuyangile kutuka ku Galela, nu ku Dekapoli, nu ku Yelusalema, nu ku Yudaya nu ku lisilia lia Yadene.

Currently Selected:

Matayo 4: NTKI57

Highlight

Copy